MISS MIZORAM | District Miss te nimin khan puang

Aizawl | March 29, 2024: Nimin March 28, 2024 (Ningani) khan district pangaah District MJA-te'n Miss Mizoram 2024-a an district aiawha tel turte puanna hun an hmang a, Miss atana an thlante hnenah miss crown khumtirin, miss sash an bahtir. District Miss-te hnenah a thlangtu District MJA-te chuan an inbuatsaihna atan pawisa an pài hlawm a ni. Heti hian, Miss Mizoram Finalist tur a chiang ta!

LUNGLEI

MJA, Lunglei District-in Miss puanna hun hi Lunglei Press Club-ah buatsaihin, Execuitive member F Lalngaihzuala'n a kaihruai a; khuallian K Lalrinawma, LMC Vice Chairman-in Miss Mizoram Lunglei a puan bakah thu a sawi. Lunglei MJA president Laltlanthanga'n thu a sawi bawk.

Miss Mizoram Lunglei atana thlan chu Jennifer Zothanzuali d/o Dr Vanlalbuanga, Ramthar Veng, Lunglei a ni a; Miss Chapchar Kut 2024 Zorrampari Hnamte-in miss lallukhum khumtirin, sash a bahtir a ni.

Jennifer Zothanzuali hi kum 24 niin, a san zawng 5'7" a ni a, zirna lamah B.Sc. zo tawh a ni. Miss Mizoram contest-ah PHE, Rural Watsan Division, Lunglei chuan an sponsor dawn a ni.

KHAWZAWL

Khawzawla MJA member-te'n Miss Mizoram 2024-a an district aiawh tura an thlan chu Rebecca Zothanpuii, Khawzawl Vengthar a ni a, zirnaah master degree zo tawh a ni.

Miss puanna inkhawm chu Khawzawl DC pisaah buatsaih a ni a, Miss Mizoram ni lai, lallukhum kawl mektu Zirsangpuii'n Rebecca Zothanpuii hnenah miss lallukhum khumtirin, sash a bahtir. Khuallian, Khawzawl bawrhsap K Lalrohlua'n thu a sawi bakah, Khawzawla MJA senior member Lalthlamuani Ralte, editor, Si*ar-in thu a sawi a; Miss Mizoram ni lai Zirsangpuii'n thu a sawi bawk.

MAMIT

Miss Mizoram Mamit chu district bawrhsap VL Remliana'n a puang a, Miss atana thlan Hmangaizuali d/o Hmangaihsanga (L), Mamit Lungsir Veng hnenah miss lallukhum a khumtir a, Hmangaihzuali chu Mamit district tan SVEEP Icon atan a puang nghal.

Miss Mizoram Mamit Hmangaihzuali hi kum 24 niin, a san zawng 5'6" a ni a; zirna lamah M.Sc. (Geography) niin, Govt Mamit Higher Secondary School-a thawk mek a ni. MJA, Mamit District chuan Miss Mizoram Mamit District hnenah hian Rs 10,000 leh thuchei an hlan.

CHAMPHAI

Miss Mizoram Champhai puanna inkhawm chu DC Bungalow-a Jericho Garden-ah buatsaih a ni a, district bawrhsap James Lalrinchhana'n Miss atana thlan Lalrinhlui hnenah miss lallukhum a khumtir bakah, sash a bahtir.

Miss puanna inkhawm hi Champhai MJA treasurer C Lalrinsanga'n a kaihruai a, secretary R Lalfakawma'n miss an thlan dan a sawifiah. Khuallianin thu a sawi bakah, MHIP Sub-Hqrs, Champhai aiawhin thu a sawi.

KOLASIB

Miss Mizoram Kolasib District puanna inkhawm chu Kolasib Press Club-ah hman a ni a; Miss atana thlan Lalhmingsangi d/o Lalhmunmawia Pachuau, Bilkhawthlir Saron Veng hnenah district bawrhsap John LT Sanga'n miss lallukhum (crown) a khumtir.

Miss puannaah hian Kolasib IPRO Dr Hmingthanzuala, Miss Millennium Lalmuanpuii, Kolasib MJA member-te leh Zoom Kolasib hruaitute an tel.

Lalhmingsangi (Sangsangi) hi kum 19 a ni a, a san zawng 5'7" niin, HSSLC result nghak mek a ni.

SERCHHIP

Miss Mizoram Serchhip district puanna chu March 27, Nilaini zan khan Lalro Digitals Studio, Serchhip Vengchungah buatsaih a ni a; Lalnunmawii, MIS, Serchhip IPRO-in Miss Mizoram-a Serchhip district aiawh tura thlan chu R Vanlalawmpuii d/o R Lalhlimpuia, New Serchhip Khawtetlang a nih thu a puang.

Miss puanna inkhawm hi Organising Committee, Serchhip chairman Kapliana Pachuau-in a kaihruai a; Miss Mizoram Serchhip hnenah hian Serchhip Chapchar Kut 2024-a miss atana thlan R Lalvenhimi’n crown a khumtir a, MHIP Sub-Hqrs. Serchhip president Lianthangi’n sash a bahtir bawk. YMA Sub-Hqrs Serchhip president Kawlthuama'n fuihna thu a sawi bakah, Serchhip Dist. MJA president C Lalhminghlua’n thu a sawi.

R Vanlalawmpuii hi kum 21 a ni a, a san zawng 5'5" niin, Serchhip College-a BA final year zir mek a ni.

Issued by: Miss Mizoram 2024 Organising Committee