ZPM-in sum an enkawl thiam lo tih a lang chho mek

Aizawl | Jan 1, 2024: ZPM sawrkarin sum a enkawl dan chungchangah Sawrkar hmasa sum enkawl thiamlo em em a an puhna chu anmahni ngeiin sum an enkawl hneh loh zia an pholang chiang ta mekah MNF chuan a ngai a ni.

December 2023 chawhnu lam ni 15 chhung khan Emergency a pekchhuah ṭul tak tak bak regular payment chu State Finance lamin Treasury te an tihtawp tir vek a. Hemi chungchang sawichhuaktu, Pu Lalchhandama Ralte MLA, Leader of Opposition chu thudik lo sawi ang hialah puh a ni a. Pu Chhantea hian thudik a sawi ngei a ni.

Sawrkar hmasa Finance Minister chu ZPM party hian sum enkawl thiam lo leh ti ṭha duh lo ang hialah an puh ṭhin a. MNF sawrkar laia Treasury-in sum pekchhuah a control zeuh zeuh ṭhin kha Treasury khar tiin an lo aukhum chamchi tawh a. Sum enkawl thiam tura insawi ZPM sawrkar chuan an rawn tawng ve ta a. An ṭawngkam cheh ang chiah an chunga tla ta chu anmahni ngumkhak hmu lo ang maiin, Treasury khar a ni lo tiin, an rawn tangkhawh leh ta a ni.

Heng an sum enkawla harsatna an tawh chu thup buai lo tur leh an harsat avanga Open Market Borrowing atanga Vaibelchhia 80 an puk hi sawimawi tum lovin, sum enkawl an thiam loah inngai se MNF chuan a duh a. Treasury thawktute hmanga insawi thiam tum chhen tawh lo turin a phut tlat a ni.