ZIDCO Chairman thar-in a office luah lut

Aizawl | February 1, 2024: Zoram Infrastructure and Industrial Development Corporation Limited (ZIDCO) Chairman JK Dawngzuala chuan vawiin ningani khan Office thar luahin Office Pathian hnenah hlanna hun hman a ni.

ZIDCO Chairman thar Pu JK Dawngzuala chuan, "Thuawih hi malsawmna a ni a, thawhrimna hi hlawhtlinna a ni. ZIDCO hian hmabak kan ngah hle mai a, kan ram sum leh pai dinhmun siam tha tur leh he Corporation chawikang tur hian theihtawp kan chhuah dawn a ni," a ti a. "Pathian leh mipui zarah ZPM in sawrkarna kan lo siam ta a, kan lo aupui fo thin Kalphungthar Mipui Sawrkar din turin kan hotuten hma an la char char a, kan hotute hi kan rin ngam a ngai a, kan ṭawngṭaipuinaah pawh kan hriatreng a pawimawh dawn a ni," a ti bawk.

Pu JK Dawngzuala chuan,"Kan policy tam zawk hi he Corporation hmang hian a tihhlawhtlin theih tih kan hria a, theihtawp kan chhuah dawn a ni," a ti a. "Sawrkar leiba siam belhtu ni lovin sawrkar leiba rulh puitu ni turin rim takin kan thawk dawn a ni," a ti bawk.

He hun hi Pu H Vanlalhlua, Secretary, ZPM Organisation South in a kaihhruai a, Major Rev. Dr. ST Dula'n hunserh hmangin Florence Zotluangpuii, Managing Director, ZIDCO, chhungkaw aiawh leh kalkhawmte atangin thusawi ngaihthlak a ni bawk.