Aizawl | Feb 14, 2024: Vawiin 14.2 2024 hian Aizawl leh Dist khawpui hrang hangah Valentines Day puala thisen pek runpui huaihawt a ni a. Aizawlah chuan Valentines Day puala thusen pek runpui hi Dawrpui Multipurposes Hall ah neih a ni a. Thisen pek hi a la kal zel a, chawhnu dar 2:30 pm thleng khan mi 237 in an pe tawh a ni. He hun hi Pu Lalnghinglova Hmar MoS chuan a hmanpui a. A mamawh tute tan thisen a pe ve nghal a ni.
Khuallian Pu Tetea Hmar chuan, "thisen pek ngai lova a pe theitu nih chu dinhmun duhawm leh ropui a ni," a ti a, thisen pek chu thil hlauhawm a nih loh thu sawiin, thalaite chu an thatlai hun chhunga a tam thei ang ber thisen pek hman tum turin a sawm a. Mizorama thisen pe hnem ber Tv C. Lalremruata inpekna entawntlak a tih thu sawiin, thalaite chu midang tana rawngbawlna a ni tih hriaa thisen pek uar deuh deuh turin a fuih a. Mihring nunna chhan nana pawl din Association for Voluntary Blood Donation-te hmalakna chu ropui a tih thu sawiin, an kalzelna turah duhsakna a hlan a. Kum tina her chhuak thin February ni 14, Valentine's Day chu tunge a ni tih pawh hriat lohte chunga hmangaihna lantir nana hman a ni thin chu ropui tiin, chin dan mawi tak leh midang tana malsawmna ni bawk chu chawinun zel a pawimawh thu a sawi bawk.
"Mi changkangin thisen an pe thin. Khawvel ah hian Ram changkang in thisen pek an uar a, thisen pek zawng zawnga 40% hi ram changkang atanga pek a ni. Ram changkanga kan tel ve theihna chu Thisen pek hi a ni." a ti a. " Thisen hi ka pe ve fo tawh a, thisen pek hi a in chhirawm loh a ni. Vawiinah hian Thisen pe theia kan awm hi malsawmna a ni. Engtikah emaw chuan Thisen pek ngai kan la ni mai thei, chumi hma chuan thisen i pe ve tawh em. A sawi uar ten an sawi dan phei chuan pek loh aiin a tha an ti a ni," a ti.
"Eng pawlah emaw chuan kan tel fur mai thei a, chung zingah chuan mihring nun chhan nana Pawl din pakhat AVBD a tel hi a lawmawm a, kalkhawm zawng zawngte duhsakna a hlan a ni."
He inhmangaihna ni (Valentines day) hi midang hmangaihna lan chhuah tir nana thisen pek ni atân AVBD in a buatsaih hi a hlu in lawmawm a ni, tiin Pu Tetea chuan thisen pek hlutzia a sawi.
Program hawnna inkhawm hi Dr Zoramdinthara, AVBD Vice President in a kaihruai a. GS Pu Lalrinkima chuan report pein V. Day puala thisen pek hi kum 2010 ah tanin nikum 2023 thleng khan thisen unit 9,853 pek tawh a ni, a ti.
AVBD President Pu C.Lalnunnema chuan Mizoramah thisen petu an pung zel thu sawiin thisen petute leh a thlawna thisen pek kawnga mi tangkai zawng zawng te chungah lawmthu a sawi a ni.
He hun hmanpuitu Sports & Youth Services Minister Pu Lalnghinglova Hmar chuan midang tana rawngbawlna leh malsawmna a ni tih hriaa phut let nei miah lova thisen pe ngam tam tak Valentine's Day pual Voluntary Blood Donation Camp huaihawta an tel thei chu ropui a tih thu a sawi a. Ram changkang apiangin thisen pek an uar thu sawiin, khawvela thisen pek za zela 40 chu khawvel ram hausa leh changkang an nih thu leh, a petute hi khawvela mihring awm zat atanga chhuta za zela 16 chauh an nih phak thu a tarlang a. Thisen pek chu changkanna leh hmasawnna intihhmuh tur chi tak a nih thu sawiin, thisen pek runpui bultantu leh chhawmnung zeltu bakah senso tumtute thahnemngaihna fakawm a ti a. Thisen pek chu thil inchhirawm loh tak a nih thu leh pek theih loh hun awm thei a nih avangin thisen pe theite chu hun remchang an neih mek bawhpelh lova thisen pek chhunzawm zel tum turin a fuih a ni.
Vawiin voluntary blood donation camp puala inkhawm tawi buatsaih hi Dr. Zoramdinthara, Vice President, AVBD Gen. Hqrs. Mizoram chuan kaihruaiin General Secretary Pu Lalrinkima'n report a pe a. HDFC Bank Ltd. hnenah voluntary blood donation camp 2024 buatsaih kawnga an hmalakna avangin chawimawina thuziak SYS Minister-in a hlan a. AVBD Gen. Hqrs. President Pu C. Lalnunnema'n lawmthu sawiin hun hman a khar a ni. Dawrpui Multipurpose Hall-ah hian a mamawh apiangte hman turin thisen pek runpui nilenga kalpui niin, blood donation camp hlawhtling tak neih a ni.
Valentine's Day pual thisen pek runpui hi kum 2010 khan Pi Chuauzikpuii'n thian thate sawmin Civil Hospital Aizawl Blood Bank-ah buatsaihin bul a tan a. Thupui atan "Show Love, Give Blood" tih chu hman niin thalai tam takte'n an hmangaihte puala thisen pein midangte tan malsawmna an lo nih phah ta a ni. Kum 2011 atangin AVBD General Headquarters nen tangdunin buatsaih chhunzawm zel a ni ta a, kum 2013 atangin District 4 (Aizawl, Lunglei, Serchhip, Lawngtlai) ahte he programme hi buatsaih a ni a. Kum 2014 ah khatih hun laia District awm zawng zawng (8) ahte AVBD leh Blood Bank tangkawpin he programme hi buatsaih a ni a, kum 2020, 2022 leh 2023 ah phei chuan Blood Bank awmna zawng zawngah thisen pek runpui hi hman a lo ni ta a ni.
He programme hi MSACS, NHM, Civil Hospital RKS, Bank leh mithahnemngaite'n an sponsor tlangpui a. A bul tan tirh 2010 khan Unit 146 pea bultan niin nikum 2023 khan Unit 1113 pek a ni a, kum 2010-2023 chhunga Valentine's Day programme bika thisen pek tawh zat hi Unit 9853 a tling a ni.
AVBD Mizoram chuan thalaite chu damlo thisen mamawhte tana thisen pek uar chhunzawm zel tur leh kum khat chhungin tum 2/3 tal thisen pek theuh tum turin a sawm a. Thisen pek chu mahni hriselna inchikna free medical check-up a nih pah thu tarlangin, thisen pe ngam ngei nupui pasal atana thlan nachang hre thar theuh turin thalaite a chah a. Hmangaihna lantirin a mamawh apiangte hman tur thisen pek chhunzawm zel turin AVBD Mizoram chuan thalaite a sawm a ni.
Valentine’s Day puala thisen pek runpui hi Association for Voluntary Blood Donation (AVBD), Mizoram State AIDS Control Society (MSACS), Blood Center - Civil Hospital, Aizawl leh Music Domain Mizoram (MDM) tangkawpin an buatsaih a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: