TRC-ah North-East Cultural Festival & Pre-Chapchar Kut hmang

Aizawl | Feb 29, 2024: Govt. T Romana College leh Mizoram Youth Commission (MYC) tangdunin an buatsaih North-East Cultural Festival & Pre-Chapchar Kut chu vawiin February 29, 2024 khan Govt T Romana College ground-ah hman a ni a. He hun -ah hian, "Unity and Integrity of the Nation through Culture," thupui atan hman a ni.

Festival hi St. Anthony’s College, Shillong leh Janata College, Assam atanga zirlai leh zirtirtu engemawzat lo kalin an hmanpui a. Aizawl chhunga College ten an hmanpui bawka. Pu Malsawmzuala Ralte, Chairman, MYC chuan khuallian niin he hun hi a hmanpui bawk.

Dr. Jenifer Lalbiakdiki, Principal, Govt. T. Romana College in inlawmna thuchah sawiin GTRC chanchin tawi a a tarlang a. Pathian hruaina avanga hetiang programme lian tham an buatsaih thei chu lawmawm a tiin State pawn atanga lo kalte chungah lawmthu a sawi.

He hun hi Colonel S.S. Kalia, C.O. of 1st Mizo BN, NCC in rawn hmanpui bawkin, NE hnam hrang hrang ten hetiang hun an hmang thei chu thil mawi ber zing ami a nih thu a sawi.

Chief Guest Pu Malsawmzuala chuan kalkhawmte chibai bukin mihringte hi intluk tlang vek kan ni a, hmasawnna lam pen zel tur kan ni tiin zirlai kalkhawmte a fuih. Khuallian leh Khualtha te hi chubai bûkna thil pek Pu R. Lalremliana Vice Principal in a hlan a. Dr. S. Lalnunpuia, organizing chairman chuan lawmthu sawiin hun hmasa tihtawp a ni.

Chawhnuah T. Romana College Music society te kaihhruainain hun hman zui a ni a, State pawn atanga lo kalte pawh item chi hrang hrang an entir bawk.

Govt T.Romana College hi kum 1992 a din a ni a. Tunah hian zirlai 1469 awmin zirtirtu 43 leh thawktu dang 17 an awm mek a ni.