Aizawl | Feb 22, 2024: Mizoram Baptist Kohhran (BCM) hnuaia ṭhalai pawl Mizoram Ṭhalai Kristian Pawl (MṬKP) rorèl vawi 70-na, BCM Biak In, Gilgal, Theiriat-ah neih chuan, sawrkar ṭha neih theih nan chaw ngheia ṭawngṭai a rel.
MṬKP rorêl vawi 70-na hi President Upa R. Lalrochama’n kaihruaiin, kum kal tàa ṬKP member ropuina rama kalte sûnna hun ngawi rengin minute khat dingin hman a ni a, Rev. ZD Rodingliana, Director, Fellowship Department-in an kalsan chhûngkua leh rawngbâwlpuite tâna ṭawngṭàisakna hun a hmang.
Vawiin MṬKP rorèlnaah hian rorêl palâi mi 573 kalin, palai riak lùt hi mi 189 an awm a, BCM General Secretary, Associate General Secretary – Service, Director, Fellowship Department leh Bialtu Pastor, BCM Theiriat Pastor Bial te bâkah, palâi sàwmte aṭangin MBKHP aiawh mi 2, MBMP aiawh mi 2 leh KNP aiawh mi 1 te’n rorèl hi an telpui a ni.
Secretary - Rev. F. Zorinkhuma hnèn aṭangin MṬKP hma lâkna hrang hrang report ngaihthlâk a ni a, kum 2023 rorèl leh 2024 rorèl inkârah ṬKP member ropuina rama kal mi 173 (Mipa 150 leh hmeichhia 23) an awm a, innei tuak 618 awmin, Kohhran Dân Puitlinga innei tuak 401 leh Dân tea innei tuak 217 an ni.
Finance Secretary Rbt. H. Lalruatkima leh Treasurer Nl. J. Lalrintluangi te’n sum dinhmun heti ang hian report an pe. Kum 2023 - 2024 chhûngin ₹ 60,83,978/- hmuh niin, hèng aṭang hian ₹ 56,63,067/- hman a ni a, kuta awm hi ₹ 4,20,911/- a ni. Ṭhalai Êntu Editor - Rbt. LH. Lalhmangaiha hnèn aṭangin Ṭhalai Êntu dinhmun ngaihthlâk chhunzawm a ni a, kum 2023 – 2024 chhûngin Ṭhalai Êntu copy 13,050 tihchhuah mêk a ni.
Kum 2024 rorèlnaah hian thu ngaihtuah tûr (Agenda) 36 awmin, hèng zînga 3 te hi MṬKP Executive Committee aṭanga thu lùt a ni a, a dang 33 te hi pastor bial ṬKP aṭanga thu lùt a ni. MṬKP Rorel vawi 70-na hian “Sorkar ṭha kan neih theih nân, MṬKP hma lâknain Pathianni tlâi vawikhat chaw nghei ṭawngṭài neih ni se” tiin a rêl a, kum liam ta – 2023 khân Mizoramah rorèlna dik a awm theih nân hmâ a lo la tawh bawk a ni.
Vawiin MṬKP rorêl hian kum 2024 - 2025 chhûnga hma lâkna tûr (Plan) hrang hrang heti ang hian a rêl a, budget ₹ 15,00,000/- ruahman a ni bawk. Chùngte chu –
1. BCM Pandal Structure siamna atân sum thawh ni se.
2. MṬKP hma làkna-a inzirtîrna hi kum khatah pakhat neih ṭhin ni se.
3. Kristian chhungkaw din chungchâng inzirtîrna neih ni se.
4. MṬKP Youth Centre pualin fehchhuah vawikhat neih ni se.
5. ṬKP Platinum Jubilee (2026) lawm ni se.
6. Sorkar ṭha kan neih theih nân, MṬKP hma lâknain Pathianni tlâi vawikhat chaw nghei ṭawngṭài neih ni se.
7. Ṭhalai Êntu Electronic form-a subscribe theih tûrin buatsaih ni se.
8. Hrisêlna chungchângah ṭhalaite’n hmâ kan sàwn theih nân hmâ la se.
9. ṬKP thutiam leh ṬKP dinchhan sawi rual dân inang tláng hmang tûra hma làk ni se.
10. MṬKP hruaitute’n Unit tê/tlêm zàwkte tlawh tam zêl ni se.
11. ṬKP member tinte’n Christian Hospital Lawngtlai-a Operation Theatre Light leh Adjustable Table lei nân ₹ 20/- ṭheuh thawh ni se.
Mizoram Ṭhalai Kristian Pawl (MṬKP) hnuaiah hian bial ṬKP 92 leh unit ṬKP 433 awmin, tun dinhmunah member 48,793 (mipa 29791 leh hmeichhia 19002), Headquarters area-ah 30089, Aizawl area-ah 10135 leh Lawngtlai area-ah 8569 an awm mek a, kum 2023 aṭanga member punna hi 1569 a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: