Kan inneih hlim e'ngemaw chen hnuah khan 'súl let' an tia, puzawnte khaw lamah khan kan zin phei a. Hreawm ka va ti tak! Hemi ṭum hian a ni chawheh aiin chaw ei theih loh a zahthlak zawk, tih chiang taka ka hriatna chu!
Kan inneih hnua Lawngtlai lama kan let leh kha, mi zawng zawng hian chaw eiah min sawm an tum ni mai hian ka hria a. Ei sen loh tak meuh meuh chaw eia sawmtu kan nei a. An phungthlu si!
Kei lah kha, zahthlak khawpin chaw ka ei thei lo a, ka thin a rim hlur mai bawk si. Kan nu tan khan a manganthlak hle awm e.
Khatih lai kha zu ka in nasat vanglai chho a ni a. Chaw hi ka ei thei miah lo tak tak a. Sa phei chu a hmui rim ringawt pawhin ka luak a pawt!
"Zu leh sa chen" an tih hi chu tih mai mai. Zu in tak tak chuan e, sa hi engah mah kan ti lo. An tui leh thlai chhum han vel tlem a zawng bak a ei theih loh!
Tichuan, chaw eiah min sawm zur zut mai si. Kei chaw ka ei thei si lo, ka ei thei lo naran lo. Ka eithei miah lo tak tak a! A va manganthlak tak!
Kan nu hnenah chuan tumahin min sawm tawh suh se, ka'n ti thla ngawt a. Mi an felin an hawihhawm si, chuti ngawt a ni si lo!
Chaw eina te'n min duh sak a, vawk thau lian leng lawng min han suah sak nawlh ṭum phei chuan ṭah a chhuak thei hial nia!
Ṭum khat phei chu kan nu ṭhiannu, Tuikuk khua vela zirtirtua a thawhpui, a ṭhian ṭha tak mai Heleni, Mampui (Lawngtlai aṭanga darkar 3 vel kal) te chuan, "Kan in leh lo min hmuhpui ve rawh u, chaw rawn ei nghal ula," min ti. Hnial ngam a ni si lo, ka va huphurh tak!
Tichuan, kan kal ta a. Zo ar an lo talh a, chawhmeh dang an lo siam nual bawk a. Chumi ṭum pawh chuan ka'n ei leh thei bar lo a nih kha!
Bean chhum leh anṭam tuihang tlem ka hawp a. Ka chaw chu ka khal ka khal a. Kan ṭhiannu khan min hrethiam a, "I ei thei ngang lo a ni maw," a ti ringawt! Zahthlak duh tak a ni.
Hemi ṭum aṭang hian chaw heh aiin chaw ei theih loh hi a zahthlak fe zawk tih ka hriat phah!
2009 kum laihawl vel kha a ni a. Heng hunlai hian Lawngtlaia hian rakzu no 1 hi 50 a ni a, a to fia fia hle a. Zing aṭanga in duh keini ang tan chuan 1000 chuang fe man in a ngai a. A sen chi phei chu beisei bo tluk a ni.
Hetiang a nih avang hian zu nghei tum teh ang, tiin zu nghei chu ka tum ta a.
Theih tawpin zu nghei tur chuan ka inpuahchah ta a. Ka in tlem telh telh a. Tichuan, ka nghei ta titih a.
Ka nghei zan chuan ka puzawn Pu TC Khawtinkhuma te in choka lam khumah chuan keimahin ka mu a.
Ka muhil dawn ṭhin a, ka harh leh zawk ṭhin a. Ramhuai te reuh te te hi thosilenah chuan an rawn dak fer a, min rawn en ṭhap a. Thosilen ka tlawh chet chuan an bo leh diak ṭhin a. An rawn dak leh ṭhin a. An bo leh ṭhin a. Chutiang chuan ka tlaivar ta ṭhak a.
Hetiang sawi takah chuan kan ṭhianpa pakhat zu nghei buai hi ṭum khat chu 7th Day Hospital-ah hian ka tlawh a. Ventilation kha a kawk a, "Maichael Jackson-a zai khi in hmu em?" a lo tia. Kan han thlek ngai pawhin kan hmu thei si lo!
Kan awm chhung zawng kha maimawm ril a hlum char char bawk a. A kut han en ila engmah a awm bawk si lo. Nuih a za duh hle.
Hetiang ramhuai hi a hlauhawm loh na a, an chimawm em em a ni.
Kan ṭhianpa pakhat erawh thung chu ramhuai tak tak a hmu a, a zu in nasat vangah an puh sak thung!
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: