2004 vel a ni ta awm e. Sikulpuikawn-a ka dah, ṭhiante tlawha ka leng chu, zan dar 12 velah haw tuma ka pan chu ka Scooter chu a lo awm ta hauh lo mai a. Chhe hle mah se, a hrihhai thlak khawp. Ka lenna nu U Mahlani pawisa puk chuan taxi kan la a, kan han zawng chiam a, a vang fu a ni!
A tuk khua a lo var a, ṭhianṭha te mai bakah thiantha lutuk lote thlengin min zawn pui a, kan zawng chiam chiam a. Rangvamual lam phei kha chu kan zawng taima hlawm fu. Kan rin deuhna lai te, kan rin em emna lai te, a awm kan rin chuan lem lohna laite thlengin kan zawng kan zawng a, kan dap a. Kar khat zet hnuah pawh hmeithai rual zinga sazu zawn ang hlauh a ni. Kan hmu lo.
Tichuan, Zemabawka tawngtaia thil hre thei an tih kha ka va pan ta a. Eng eng emaw a sawi nual a, "kawngsirah a awm ang" a ti ta a. Ka'n ring mai mai khawp a! Ka Scooter kha kawnglaiah hian an dah ngawt kha ka ring lo reng reng!
Kan Stephen Auhmun hian ka Scooter bo thu hi a lo hre ve a. "I dahna aṭanga chhuk lam hlir zawng rawh. I Scooter kha chho lam zawngin a tlan thei lo hrim hrim ang," a lo tia. "I scooter kha hralh la, tlem thawh belh la, t-shirt lei rawh," min ti fahran bawk.
Ni a liam a, kar a liam a, karhnih lai mai ka zawng ta. Kan la hmu chuang lo. Ka tihngaihna hre lo chuan kan chanchinbu Vartian Weekly (Jt Editor ka nih lai) ah khan ka Scooter bo thu te, ka mangan thu te, leina tur dang ka neih tawh loh thu te ka ziak a. Tin, ka Scooter chu a chhiat tawh em avangin a rutu tan pawh buaina mai thlen belhtu a nih ka rin thute ka ziak a. Bakah ka thiante pawhin ka Scooter rutu chu a inchhir hle an rin thu te, "Lena Scooter chuan Radio a man, zakkha rim a nam, maimawm ril a zam nuai" tia an sawi thin thute pawh ka ziak tel a.
Ka bialnu hreh zet chunga ka phurh chhuah tumin Bazar Bungkawn tak maiah tihnun ngaihna awm reng reng lo a min peih lohsan thute pawh ka ziak tel tak e.
A tuk thum tuk vel ni tain ka hria. Phone call ka dawng a, "I scooter kha a ni mai thei, hmanni deuh khan zanah Thakthing dam veng panna kawng pheiah mi pakhat hian kawngsira kan bike riah a rawn su phei chiam mai a, a scooter lah chu a tlansan daih lehnghal a. I ta a ni mai thei a ni," a rawn ti a.
"A nih dawn chu."
Phone dah ka tum a, "I sawi ang em em chuan a chhiat loh saw," a ti a.
Hmanhmawh em emin ka tlan phei a, ka Scooter chu a lo ni ngei a.
"Nia, khata two wheeler an dah kha a rawn hnawl phei a, amah lah a tlanchhe daih bawk sia. Tlanchhiat pah chuan 'PA TIAH TIAH ASIN' a la ti zui a. An um a, an man hman lo a nih kha," tiin a bula dawrte nghak chuan min lo hrilh a.
Eng pawh nise, ka Scooter rutu pa kha chu 'Pa Ve Tiah Tiah Tak' chu niin ka hria.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: