A kum tak ka hre ta mai lo. 2002 emaw 2003 emaw a ni ta awm e.
Johnson College-ah hian zanah class kan kal ṭhin a. Ka nau Muanchhana Sailo nen nasa taka kan inzui ṭhin lai a ni. Class kal zawh, engkim tih zawhah khan MCa hi an in, Zonuamah ka Scooter chhe tak khan ka thlah haw ziah ṭhin a.
Ṭum khat ka thlah haw leh chu Temple aṭangin switch off-in kan tlan thla char char a. Vaivakawn kan thlen thlak chuan switch ka on a, ka running ta. Ka'n running chiah chu ka Scooter chu a engine awmna lam chu a alh ta hluah mai!
Rang takin Scooter aṭang chuan kan chhuk a, Scooter chu ka namtlu rawk a. Kan ṭhelh ta a.
Petrol over nasa lutukin a plug ṭek a man a, a alh ta a nih hmel.
MCa chuan, "Lenmawi, hetiang hi ka la hre ngai lo reng reng," a tia. Kei chuan, "Kei pawh ka la hre ngai bik lo," ka tia, kan ṭhelh dun mawlh mawlh a.
Ka la hrereng. Dawr sira bawlhhlawh bawm a bawlhlawh an dahkhawm chuan kan leih a. A bawm, lehkhakhawng chuan kan vaw bawk a. Engtin tin emaw kan ṭhelh thei ta a ni.
Ṭum khat leh pawh thlasik lai a ni a. Muanchhan chu an veng, Zonuamah chuan ka thlah tla leh a. Ka haw lam chu Vaivakawn Zohnuai, dam huh dup mai, dai tla nalah chuan ka Scooter chuan ka tleng ta a. Khawthlang sang takah ka leng liam ṭep.
Tuna a awm ang khu a la ni lo a, in ding a la khat deuh a. Ka tlengna thlangah chuan vawk in a awm a. Vawkin chhak kawng metal chu ka tleng pel a, metal loh kawwgsirah chuan ka thleng chu ka ding hlauh a. Ka tleng tlang teuh ther ther hle!
Ka scooter chu metal loh chin kawngah a lu lam a awm a. A mawng lam chu ko pangah chuan a liam titih a.
Hnuhchhuah ka tum a, a steering-ah chuan ka pawt vak vak a. Awmzia a awm lo. Theih tawp tak meuh meuhin ka hnuk leh a, a che hrut a, kopang lamah chuan a tawlh thla dawn ta mai a. A manganthlak teh e.
Scooter chu ka thlah chuan a lum emaw a tawlh liam emaw dawnin ka hria a. Ka pawt fan fan a. Hnuhchhuah ka tum ngam tawh lo. A tlak loh nan ka uai tang ta a ni ber a.
Zanrei lam a ni tawh a, vei vak an awm si lo.
Chutia hun e'ngemaw chen ka uai tan buai hnuah chuan pa pakhat, um-a petrol khai hi a rawn kal ta hlauh a. Min puihna a zarah kan inlachhuak thei ta chauh a ni. Ka lawm hle.
Min puitu hi Luangmualah a Scooter petrol a zawh avangin black-a lei tur a lo ni a. Chumi a lei haw kea a lokal chuan min rawn nang fuh a lo nia. Lawmthu sawi nan a Scooter awmna thleng chu ka thlah ta a.
Hei lo pawh hi Scooter hi ka tlan alh leh. Scooter hran ka neih hnu a nia.
Dawrpui Vengtharah ka leng a, ka leng haw chu lenna tur dang ka nei nge ka hre lo. Upper Republic-a awm si kha Vaivakawn lam panin swith off-in ka tlan thla a.
Switch ka on a, ka running chiah chuan a engine awmna lam pang a alh leh hluai a. Ka Scooter chu ka namtlu rawk rawk a. Ka jacket chuan ka vawhlum thei ta hram a ni.
Scooter ṭawng deuh hi a tlan alh theih tih ka chiang fu mai.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: