Aizawl | Feb 14, 2024: Vawiin ni 14.2.2024 (Nilaini) khan MPCC hruaitu Pu Lal Thanzara, Senior Vice President, Pu Lalnunmawia Chuaungo, Vice President leh Dr. Lalmalsawma Nghaka, Treasurer te chuan Congress Bhawan, Lawngtlai leh Siaha-ah kum 2024 atana infuihtharna hun an hman pui.
Pu Lal Thanzara, Senior Vice President MPCC chuan, 'Mizoram Pradesh Congress committee Office Bearer tur inthlan chungchanga MPCC O.B meeting in Official Candidate a chhawpchhuah chungchangah dik lo taka sawi awm chungchang sawiin Pu Lal Thanzara chuan, Mizoram Pradesh Congress Committee hi India ram state hrang hrang Congress ang lovin mahni a inrelbawl theihna bik kan nei a. Party Official Candidate neih chu kan kalphung a ni a, a do zawnga beihna awm chu tihdan phung ni ngai lo a ni zawk a ni, a ti a, MPCC hruaitu inthlan tur hi Friendly match khel mai turah ka ngaih laia beisei phak baka boruak ti sosang zawnga chetna a thleng hi pawi ka ti takzet a ni, a ti.
Pu Lal Thanzara chuan, MPCC hruaitu turah hian MPCC OB meeting ngenna leh rawtna avanga pawm chauh kan ni a, kan mimal duhthlanna a ni lo, kan party hruaitute ngenna avanga tel kan ni, tih sawiin, Pathianin hun tha min pek hi awmze nei lo taka liam tir mai kan tum lo. Mizoram mipuite leh Congress Party mipuite hi thil danglam, an hmathlir hi hmuh tir hi kan tum a ni a, Pathian rinchhanin kan tithei tih kan hria a, kan inpumkhatna leh thawhhona tha tak hian chu chu min hruai thleng ang tih kan ring, a ti a, DCC pek chungchang sawiin Pu Lal Thanzara chuan, DCC hi mahni koa tlaa inrelbawlna a nih angin mawhphurhna leh in relbawlna mahniin keng zo theia in ngai te tan DCC neih hi MPCC chuan kan dan buah fel taka tarlan leh ziah thlap a ni a, a duh te tan harsatna a awm lo, MPCC hruaitu thlan avanga tiam thar ngai a ni lo, a ti a, Party hruaitu nih duhna vangin MLA Candidate tur leh MLA seat intiamna a lo awm hial te hi a pawi a ni, mahni aia midang thatna dah hmasa in theihtawpin ram leh hnam tan, kan party tan theihtawpin i thawk ang u, a ti bawk.
Pu Lalnunmawia Chuaungo, Vice President chuan, ram leh hnam tana kan thawhna kawngah ngaihdan in ang put put reng theih a ni lo. Mahse kan ngaihdan a nih loh pawha pawm dan thiam nih a tul. Keimah aia midang an duh zawk a nih pawhin midang duhdan hi ka zah sak tur a ni. Ram leh hnam tana hnathawk thei tura thawh chhuah hi a tul a, chumi atan chuan inpum khatna neih a pawimawh, a ti.
Pu Lalnunmawia chuan, MPCC inthlan turah MPCC OB meeting in President atana a chhawpchhuah Pu Lal Thanzara chu mahni in project ngai lo, a thil tih that intihlar tuma midang hmanruaa hmang ngai lo, mi nghet a ni, a ti a, India ram hmun tam taka Politician tam tak hi an chhungkaw chanchin zawh chian ngam chiah loh, harsatna a ruka tawk, mangang hi an awm fo. Pu Lal Thanzara erawh Politician senior, YMA hruaitu hlun, Kohhran bel tlat a ni. Politician ni chunga a chhungkua a rel fel thlap, a fate pawh Kohhrana a kul a taia tel tura chherchhuak thei hruaitu a ni, a ti a, Kum 2023 MLA inthlan laiin mi tak takin, kum 2023 hi Congress hun a ni lo, enchhin hun a ni, an ti a, mahse Central-ah chuan Kristian te leh hnam te nau zawk te rapbet a, chimral tum tu BJP paihthla turin Congress a sorkar a ngai, an ti vek. Kumin Lok Sabha MP thlan hi Congress kutah Mizoram mipuiin an dah mek a ni," a ti bawk.
Dr. Lalmalsawma Nghaka, Treasurer, MPCC pawhin thusawiin, ram leh hnam hruai turin Kohhran leh khawtlang pawhin an rin, an pawm, party pawhin sawi mawi chawp ngai loa kan support theih hruaitu Mizoram leh Political Party ten kan thlan a ngai, tih sawiin, chutiang atan chuan Pu Lal Thanzara leh Pu Lalnunmawia Chuaungo chu mi thlanawm ber an ni, a ti a. Hindu la ram din tuma nasa taka hmalatu Prime Minister Narendra Modi pawhin, Gujarat Chief Minister a nih lai pawhin Hindu sakhaw betute ai pawha a rin zawk chu Kristian tlangval Pu Lalnunmawia Chuaungo hi a ni, a ti.
Dr. Lalmalsawma chuan, Pathian hruaina in Party inthlan a zo anga, chumi zawhah chuan lungrual takin ram tana hna tha thawk turin nasa takin Congress party chuan ke a pen nghal dawn a ni, a ti bawk.
Vawiin Lawngtlai Congress Bhawan-a infuih tharna hun hi Pu J. Ropianga, President, LDCC leh Pu S. Hiato, MDCC te'n a kaihruai a, Lunglei Congress Committee atangin Pu ten MPCC hruaitute hi an tawiawm bawk a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: