Mizo film thar, 'Mo Sual' Chapchar Kût zanah!

Aizawl | Feb 24, 2024: Tintin Entertainment leh Runmawi Apps tangkawp te buatsaih, 'Mo Sual' chu March 1, 2024 Chapchar kut zan dar 8:00 hian Vanapa Hall-ah tlangzarh a ni dawn ta.

Zan lamah, Vanapa Hall-ah 'Mo Sual' film en pahin Kut hman a finthlak mai thei! Online a en theih tura dah mai lovin, Show a kalpui hmasak a ni dawn a. Tlangzarh zanah hian a duh apiang en theih turin an chhuah nghal dawn a, ticket ngaihvn vat chi a ni.

Sum ngainat na avanga chhungkaw kehdarh theih zia leh Mo in chhungkua a vuak darh theih zia tarlanna 'Mo Sual' hi Mizo tualzal nuna thil thleng ngei behchhan ziah leh siam niin, Director hi Mizo hmeichhe film director kan neih mek Melody G Fanai niin, Assistant Director hi KC George a ni. Videographer hi BS Picture a ni a, a thawnthu hi a lehkhabu ziah, 'Sihlipui' pawh Book of The Year a thlan lo ni tawh, Romuanpuii Zadeng ziah a ni a, Screenplay hi Nuna Hrahsel ziah a ni thung.

Film-ah chuan a changtute hi an pawimawh a, he film-ah pawh hian Miss Mizoram-ah sang tak lo thleng leh Driver Kima filma lo inlan tawh Esther Sailo, Ṭhian Lungdum leh Nutei Thingpui Dawr-ah te lo inlan tawh Alice Rintluangi, Mizo mipa film star hriat hlawh, Ambush, Call 112 bakah Rawng Chawhpawlh leh a dang danga hnehsawh taka lo chang tawh Eddie Tochhawng te kan hmu dawn a. Anni bakah hian, Immanuel Khawlhring, Vee Elly, Solomon Fanai, Lalrozama Ralte leh Laltanpuii Fanai te an inlan dawn bawk. Main role pawimawh tak rawn play turte bakah hian support role-ah an chanpual hnehsawh tak tak an inlan dawn bawk a ni.

He Movie ah hian thil la thleng ngai lo, Mizo movie a a vawikhatna ni turin Vohbik; a bikin Bengngawng leh Mitdel te pawhin an en ve theih tura chhawp chhuak sak a ni dawn a ni!

He film siam nan hian sum leh pai bakah a mamawh a hau tak hle a, Bungrua leh location pawh changkang tak tak a ngaih avangin CK-HYUNDAI, Pu Ronnie, MIZO CAR BAZAR te leh Seol Bakery te'n an property man to tak tak an hmantir a, Car an hman hi Verna Nuai 17 man niin, Vespa Scooter nuai 12 man (Vespa 946 Emporio Armani) hman a ni bawk.

An bungrua phal taka hmantirtu te chungah MO-SUAL team chuan thinlung takin lawmthu an sawi a, Release function-ah hian mi zawng zawng tel vek turin an sawm bawk.

Tlangzarh zan ah hian show nghal a ni dawn a Ticket hi cheng 200 man leh cheng 100 man a awm dawn a. Zarkawt-a Kristie House of Beauty leh Bylane-ah te ticket hi lei tur a awm dawn a ni.