LDSA hruaitu ten Education Minister an hmu

Aizawl | Feb 6, 2024: Vawiin Dt.6.2.2024 Tuesday tlai lam khan School Education leh Higher and Technical Education changtu Minister Dr.Vanlalthlana chu Lawngtlai District Students' Association hruaitute chuan Lawngtai ah hmuin, Lawngtlai District in zirna lama hmasawnna atana kan mamawh hengte hi an thlen.

1. Govt.Kamalanagar Higher Secondary School a thawktu in daih lohna

Lawngtlai District ah hian Mizoram sorkar in a pumhluma a enkawl Higher Secondary School pahnih a awm a, Govt.Kamalanagar Higher Secondary School (Arts stream) hi chumi pahnih zinga pakhat chu a ni. Tunah hian he school ah hian Education subject Lecturer hi pension a achhuah hnu ah adang dah ala ni lova. Tin, Economics subject Lecturer hi transfer anih hnu ah adang dah ala nilo bawk a ni. Heng subject pahnih Education leh Economics ah hian Govt.Kamalanagar Higher Secondary School naupangte te hian zirtirtu an neilo a. Subject dang Mizo, English, political Science leh Public Administration ah te pawh zirtirtu pakhat theuh chauh an nei a. Lawngtlai District Students’ Association chuan Govt.Kamalanagar Higher Secondary School a Education leh Economics subject zirtirtu an awmlo hi pawi a ti a. Heng subject pahnih a zirtirtu turte hi Academic Session thar ah chuan Samagrah atang tal pawha ngaihtuah sak turin Education Minister hi LDSA hruaitute chuan an ngen a. Tin, subject dang ah pawh zirtirtu pakhat theuh dahbelh sak turin an ngen bawk a ni.

2. Govt.Region Higher Secondary School Lawngtlai a Science Zirna tih changtlun chungchang

Tun dinhmuna Lawngtlai District a Class-11 leh 12 Science stream zirna Lawngtlai District in a neih function awmchhun chu Govt.Region Higher Secondary School hi a ni a, he science zirna hi Samagrah Shiksha hnuai a ni. Science zirna hi Doctor leh Engineering bakah thildang pawimawh tamtak zirna atana kailawn pawimawh anih avangin, Lawngtlai District in Higher Secondary School Science stream zirna tun dinhmuna function mek awmchhun kan neih hi thawm that saka, Mizoram sorkar hnuaiah seng luh sak turin Education Minister hi LDSA hruaitute chuan an ngen a. Samagrah hnuai atanga Mizoram sorkar hnuaia kan Science zirna, tun dinhmuna function awmchhun hi seng luh anih chuan, infrastructure tha zawkte alo awm theih tur thu leh, zirlai naupang ten tun aia hma an sawn ngei beisei a ni tih te Minister hi hrilhhriat a ni bawk. Tin, Samagrah atanga Mizoram sorkar hnuaiah he Higher Secondary School Science zirna Lawngtlai District in a neih chhun hi dah anih chuan, thawktu nghet zawk leh changtlung zawk a awm theih a beiseiawm tih Education Minister hi an hrilhhriat bawk.

3. Govt.Higher Secondary School Bualpui NG (Samagrah) building neihloh chungchang

Government Higher Secondary school Bualpui NG (Samagrah) hi Arts stream zirna ni in, an ni hian school building an la nei lova, tunah hian High School building luah hawhin naupangten lehkha an zir ve thu Minister hi hrilh hriat a ni. He school building hi kum 2022 ah te pawh sak tura en tawh a ni nachungin, vawiin thlengin sak hna tan anih loh bakah, a sakna tur pawisa pawh hi sanction a awmloh thu LDSA hruaitute chuan Minister hi hrilhin, Bualpui NG a Higher Secondary School zirlai he school a kalte hian, mahni school building ngeia zalen taka lehkha an zir ve hi LDSA chuan a duhsak thu leh school building rual hian school building in a kentel, computer room te leh infrastructure dang mamawh an neihte pawh ngaihtuah sak turin Education Minister hi LDSA hruaitute chuan an ngen bawk a ni.

4. Blue Mountain Higher Secondary School Sangau leh western HSS Diltlang South provisional Ad-hoc a hlankai chungchang

Blue Mountain Higher Secondary School Sangau leh western HSS Diltlang South chu, Provisional Ad-hoc GIA a hlankai anihna tura notification chu Dt.29th September 2023 khan School Education Department in a tih chhuah thu leh he ruahmanna hi zirna a Lawngtlai District in hma a sawn angaih zia hriatpuia, ataka heng school te hi provisional Ad-hoc a hlan kai anih thuai theih nana hma la turin Education Minister hi LDSA hruaitute chuan an ngen bawk a ni.

5. Sangau Higher Secondary School a Samagrah hnuaia Science zirna dah chungchang

Sangau Higher Secondary School a Arts stream chauh awm thin chu Samagrah hnuaiah Science stream hawnbelh a ni tur hi lawmawm an tih thu leh chutih rual chuan Science stream upgrade/extend na tur atana building sak lai mek chu tunah hian bill a tan avangin chhunzawm theih lohvin a awm mek a ni tih Minister hi hrilhhriat a ni a. He Higher secondary level science zirna Lawngtlai District in kan nei thar tur hi a lawmawm em em rualin, ataka hna hi zawh anih vat theih nan building sakna bill tang mekte hi achhuah thuai theih nana hma la turin Minister hi ngen a ni. Lawngtlai District mipuiin an nghahhleh em em, he Higher secondary level science zirna thar awmtur hi, Education Minister zarah tih puitlin anih thuai beisei anih thu LDSA hruaitute hian an thlen bawk.

6. Bualpui NG Higher Secondary school Upgradation chungchang

Bualpui Higher Secondary School hi September Ni.29, 2023 khan Lumpsum category B ah upgrade a nih thu leh he upgradation chungchang hi Mizoram sorkar in a en tha leh dawn ni in thu dawn a ni tih Minister hnenah LDSA hruaitute chuan an hrilhhria a. Lawngtlai a Lai Autonomous area atanga Bualpui NG Higher Secondary chauh hi Lumpsum Category B a hlankai anih thu leh upgradation notification alo chhuah tawh anga he school hi kaltlang pui nise an duh thu Minister hi LDSA hruaitu ten an hrilhin ngenna an siam bawk a ni.

7. *Udoygiri HSS, Longpuighat HSS leh Borapansury HSS upgradation chunchang*:

Lawngtlai District zirna ah a hnufual zia leh abik takin Lawngtlai West lam phei chuan zirna lama than a mamawh thu Minister hi hrilhhriat ni in. District dang aia Lawngtlai District pachhiat zia te hria a, Udoygiri HSS, Longpuighat HSS leh Borapansury HSS te Lumpsum categort-B a hlankaina tura notification, School Education Department in Dt.29th September 2023 a atih chhuah anga, he upgradation hi sut anih lohna turin Minister hi LDSA hruaitute chuan an ngen bawk.

8. *Mampui HS, Cheural Gospel Centenary HS, Longpuighat HS, Thingkah HS leh Radha Mohan HS provincialized chungchang*:

Dt.29th September 2023 a School Education Department in notification a

tihchhuah ah, Mampui HS, Cheural Gospel Centenary HS, Longpuighat HS, Thingkah HS leh Radha Mohan HS te hi provincialize tura tih a nih thu Minister hi hrilhhriat a ni a. Lawngtlai District zirna a ahnufual zia leh, District dang ai pawha nasa zawka dawmkan angaihna hriatpuia, heng Lawngtlai District chhunga High school te provincialize na tura ruahmanna awm tawh hi anih anga kaltlangpui turin Minister hi LDSA hruaitute chuan an ngen bawk a ni.

Education Minister hi LDSA hruaitu atangin President F.Lalkulhchungnunga leh Secretary Gabriel Zochhawna bakah Executive member atangin James Thanpuia leh Vanneihsangi ten an hmu a ni.