Aizawl | Feb 28, 2024: Finance Minister, Chief Minister ni bawk Lalduhoma’n nimin khan kum 2024-25 chhung atana Mizoram sum ruahman cheng vaibelchhe 14,412.12 chu assembly-ah a pharh a, kumin budget hi 2023-24 budget aiin Rs. vaibelchhe 202.17-in a tam zawk.
Budget a pharhah hian sorkar inrelbawlna senso, sorkar hnathawk hlawh leh pension bakah hmasawnna thawhna tur atana sum hman tur ruahman (revenue expenditure) hi Rs. vaibelchhe 11,957.04 a ni a, budget pum pui atanga chhutin za zela 82.97 a ni a; mipui hmasawnna atana sum hman tur (capital expenditure) atan Rs. vaibelchhe 2,455.08 dah a ni a, hei hi sum ruahman zawng zawng atanga chhutin za zela 17.03 a ni thung a, kum thar 2024-2025 chhunga sorkar sum puk tur zat ruahman chin chu Rs. vaibelchhe 1,992.03 a ni.
Finance Minister Lalduhoma hian Mizoram budget tur a pharh rualin hian kum kal laia sum hman ruahman belhna, Supplementary Demands for Grants 2023-2024 Rs. vaibelchhe 3,287.93 chu house pawmpui turin a pharh nghal bawk.
Finance Minister chuan revenue expenditure atana sum an ruahman chu sorkar kum 2023-2024 aiin za zela 6.75-in a sang zawk tih sawiin, hetia kum kal mek aia a san hretna chhan chu salary leh pension atan sum sen belh a ngaih vang te, kawlphetha leina, tui pump-na bill sang chho zel te, buhfai leina san hret zel vang leh private sikul thenkhatte dinhmun tha zawka hlan a nih vangte a ni, a ti.
Mipui hmasawnna atana sum hman tura ruahman chu kum kal mek aia a hniam a, hemi chungchang hi Duha chuan sawiin, “Tun dinhmuah hian state sorkar hian inenkawlna sum hman ngei ngeina tur a ngah avangin revenue receipt atang ringawt chuan a inenkawl zo lo va, capital expenditure atana sum dah tur chuan loan-ah a innghat lo thei lo,” a ti a, an sorar chhung chuan a tam thei ang ber hmasawnna hna thawhna tur ruahman chhoh an tum thu a sawi.
CM Duhoma’n a tarlan danin budget-ah hian sorkar flagship programme, ‘Bana kaih’ (hand holding) policy hmanga ram chhunga kuthnathawktute tihhmasawnna turin Rs. vaibelchhe 200 ruahman a ni a, thingtlang lam mi khawsak harsa zualte khawpuia an borala, an ruang phurh hawna atan Rs. vaibelchhe 5 ruahman a ni a, kawlphetha siam chhuah leh kawlphetha pek chhuah mumal zawka kalpui a nih theih nan Rs. vaibelchhe 20.13 dah a ni a, inkalpawhna kawngpui leh leidawh thawm that ngaite thawm that nana kum 2024-25 chhunga hman turin Rs. vaibelchhe 100 dah a ni bawk.
Kum khat Mizoram sum ruahman thlirna tawi
Kum thar 2024-2025 chhunga sorkar sum puk tur zat ruahman chin chu Rs vbc 1,992.03 a ni a. Heta tang hian Scheme for Financial Assistance to States for Capital Investment (SASCI) hnuaia kum 50 hnua rulh tul interest-free loan Rs vbc 500.00; Market Borrowing-ah Rs vbc 1,170.00 leh NABARD hnuaiah rural infrastructure tihchangtlun a nih zel theih nan Rs vbc 250.00 te hi a lian zualte an ni.
Sorkar laipui scheme CSS sum lo do letna tur te, EAP scheme-a state sum tum ve tur lo dah zel theihna turin counterpart funding atan Rs vbc 250 dah a ni.
Sorkar flagship programme, ‘Bana Kaih (Hand Holding) policy’ hmanga ram chhunga kuthnathawktute tihhmasawnna turin Rs vbc 200.00 ruahman a ni.
Thingtlang lam mi khawsak harsa zualte khawpuia an thihin, an ruang phurh hawna atan Rs vbc 5 ruahman a ni a. Social Welfare dept kaihhruaina hnuaiah buaipui a ni ang.
Healthcare lama indaih loh phuhruk nan kum 2024-25 atan Rs vbc 50 dah a ni. Hemi bakah Rs vbc 40 chu bill ba rulh nan 2023-24 RS-ah dah a ni bawk.
Power generation (siamchhuah lam) leh power supply mumal zawka kalpui a nih theihna Rs vbc 20.13 dah a ni.
Inkalpawhna kawngpui leh leidawh thawm that ngaite thawm that nan kum 2024-25 chhunga hman turin Rs vbc 100 dah a ni.
Thlai chi thlan bik 4 – sawhthing, aieng, hmarcha leh hmunphiah te hi minimum support price hmanga a tul dan anga loneitute hnen atanga leisak thei tura ruahmanna siam niin, budget ah pawh dah nghal a ni.
Finance changtu, Chief Minister Lalduhom chuan sorkar kum thar, 2024-2025 sum inremchem kumah hman an tum tih sawiin, “Sorkar kum thar chu leiba sang lutuk tihniam chunga sum dinhmun sawhngheh nan hman kan tum,” a ti.
Mizoram legislative Assembly budget session neih mekah nimin khan Lalduhoma’n kum 2024-2025 chhunga Mizoram state budget ruahman House-in a pawmpui tura a pharh hnuah chanchinbumite kawmin, kum 2024-25 hi sum leh pai inremchemna kum atan hman tum a nih thu sawiin, “Hetah hian fiscal deficit tihhniam leh theihtawpa kan leiba sang lutuk tihhniam hi kan tum ber a ni dawn a ni,” a ti.
Lalduhoma hian fiscal deficit tihhniam leh leiba tihhnaim an tum ber dawn avangin, sorkar kum thar (2024-25) a sum puk tur, public debt chu Rs vbc 697.69 zeta tihhniam a ni dawn tih sawiin, “Chumi atan chuan a bul tan nan kan sum hmanna te thlirin, tul baka kan hmanna nia hriatte tihtawp leh tihhniam kawngah hma kan la dawn a ni,” tia sawiin, he programme avang hian state pawisa hmanga project lian tham tak tak, counterpart funding tam tak theh chhuah ngai ang chi chu sorkar kum chhung hian an insum rih dawn niin a sawi.
Finance minister chuan state-in leiba a neih tam tak chu tihhniamin, a inrep thei ang bera kal an tum tih sawiin, “Kan sorkar kum khatna atangin inrep thei ang berin kal ila, a kum hnihna atangin kan ziaawm tawh kan inbeisei a ni,” a ti.
Chief minister chuan central scheme atanga state-in sum a thlawna a hmuh theih ang chite hi nasa taka um an tum tih a sawi a. State allocation pawn lama project tha si a awm chuan an dawnsawn theih reng thu sawiin, “State sum ei hek lo, project kan hmu teuh dawn niin ka hria a. Kan vannei a, kan sorkar tirh pawhin min rawn dawr sup sup a ni,” tiin foreign atanga investment tithei tur an hmuh a rin thu a sawi a. Ram sum seng lova project thawk thei tur an hmu teuh dawn a, chu chu an lawmna a nih thu a sawi bawk.
- The Zozam Times
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: