ENGTIN NGE PATHIANIN A FIAH CHE IN MAL A SAWM CHE

_Hmuh Theih Loh Indona_

Rick Warren

Feb 28, 2024

"Sum lem chungah mah in rinawm loh chuan tuin nge sum tam tak chu kawltir ang che u? Mi dang ta chungah mah in lo rinawm tawh loh chuan nangmahni ta chu tuin nge pe ang che u? Chhiahhlawh tumahin hotu pahnih rawng an bawl kawp thei lo; pakhat huain pakhat a duh ang, a nih loh leh, pakhat tanin pakhat a hmusit ang. Pathian leh sum rawng in bawl kawp thei lo ve.” Luka 16:11-13

Mi rinawm te chuan pek tur engmah an neih loh pawhin an thil phal tho thin. 

A chuang a liam neih chuan tu tan pawh thilphal a awl. Hunawl i neih tam chuan i hun chu mi dang tan i thilphal thei ang. Sum i neih tam chuan mi dang tan i sum chu i thilphal thei ang. Chakna i neih tam chuan chu i chakna chu mi dang tan i thil phal thei ang. Nangma tan hun i neih loh hunah chuan, nangma tan chakna i neih loh hunah chuan, nangma tan sum i neihloh hunah chuan, nangma tan talent i neih loh hunah chuan Pathian chuan heti hian a sawi, “Hei hi fiahna a ni. I thilphal leh phalloh ka en che a. I rinawm dawn em, min ring ngam ang em?” 

Pathianin a fiah dan che leh mal a sawm dan che kawng nga te chu:

1.Pathianin mi thilphal a hmuhtir che.

Pathianin thilphal turin a duh che a, amah ang tura a duh vang che a ni. A thu i awih chuan malsawmna i dawng ang. 

2.Pathian hmathlir ang i neih chuan hlawkna i tel ang.

Pathianin ti tura a tih che i tih chuan, i mamawh thil dang chu a hun takah a pe ang che. Hmathlir a neih tir che chuan i mamawh pawh a pe ang che.

3.Pathian ti tura a tih apiang che i tih chuan, i tih theihloh thlengin a ti ang.

Pathianin i tih theihloh thlenga i rinna ti lang turin a duh che a. I neih tlemte chu i pek chuan, Pathianin a tipungin a ti lian ang.

4.Mamawh i neih chuan, thil chi i tuh tihna a ni.

I nuna i thil mamawh apiang chu, chi i thlak a ni ang, i hnenah a lo kir leh ang.   

5.Thil chi tuh leh seng inkarah hun awl a awm ziah.

Chi tuh hun a awm a, seng hun pawh a awm a ni. Engtik hun nge a karawl chu? Chu chu rinna fiahna a ni. 

Tlemte chauh i neih laiin rinawm takin i pe thei ang em? Diktakin ila ti thei zel ang em? A man chu eng pawh nise, Pathianin ti tura a duh che angin i ti thei ang em? Chungah chuan i rinawm tlat chuan, Pathianin i chunga a hnathawhah leh a thilpek che ah mak i ti zawk ang.

Ngaihtuah zui atan

 

* Engtin nge i hun, sum leh talent hmangin i thilphal ang?

* Tlakchhamna i neih laiin thilpek kawngah engtin nge i tih ang?   

* Pathian buh seng lai hmu turin khawi atangin nge i nghah? I nghah mek laiin Pathian hnathawh engtin nge i hmuh?

*Vawiinah hian Isua i zui dawn em?*

Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theihnana Pathian thutiam chu ringturin i inpeih em? I inpeih anih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian emai min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*