Lungchhuan PES Kang

- Lalremruata

Lungchhuan Kohhran ten kum 2005-a Presbyrian English School kan din chhoh ve ṭawk ṭawk chu zanin Ni 21Jan. 2024 Pathianni zan dar riat rik hma hret khan engmah chuh hman loin a kang fai vek.

School building leh biak in hi tlang panga awm ve ve a ni a. Biak In chhim lam let liam hretah School buiding hi a awm a, biak in leh school inkarah hian Sunday School hall leh Kohhran Choka a awm bawk. Biak In aṭang hian Meter 200 emaw leka awm ni mahse biak in a ṭang hian a hmuh theih loh. Khaw chhung a ṭang hian School building hi chiang lutuk loin a lang a. A bul vel thingin a phen deuh bawk.

Khaw chhunga miten School kang an hmuh ṭantirh hian an rawn tlan chho vat nachungin thli a ṭhat a vang leh kang hi a lo nasat deuh tawh a vangin ṭhelh mih zawh a ni ta lo. Building hi Assam type a ni a. A bang hi thingphel a nih a vangin mei kang hi a chak hle a. Tlang thli tamna a lo ni leh zel bawk si a, a hmu hmasa te tan pawh chet lak ngaihna a awm ta lo bawk a ni.

A kan chhan hi hriat a la ni lova. Current kal dik lo chu a nih thei lo mai thei. A chhan chu kang mei chhuah ṭanna lam hi current line thlen loh chin, inkil a ṭanga chhuak a ni.

Kang mei a chhuah hriat a nih lai hi inkhawm ban hla sak lai a ni a. Hla chang tawp ber sak lai hian biak in tlar hnung lam a ṭhu te chu an chhuak tawh a. Inkhawm bang kan chhuah a mipui nawlpuiin kan bawh pawhin a lo kan nasat tawh em a vangin kan thlir ngawt mai a. Sunday school hall leh Kohhran Choka erawh chu bungraw awm ang ang thiar chhuakin a kang kai lo hlauh.

Lungchhuan Kohhran hi In 130 awrh chauh kan ni a. Tunah hian kan school-ah hian Zirlai 74 Zirtirtu 9 kan nei mek a. KG aṭanga Class VIII thleng hawn a ni a, class room leh Office te hi engmah chuh hman lohin a kai fai vek a ni. Synod leh kohhran ṭanpuina zara kal chho ṭawk ṭawkin tuna building kang ta hi Kum 2019 August ni 13 ah Upa R.Lalsawma Kohhran Chaimanin a hawn kha a ni. A pawi tih mai loh chu sawi theih kan nei ta si lo.