I RINHLELHNA CHU RINGHLEL ṬAN RAWH

_I Nundan Thlirlet La_

Rick Warren

Jan 23, 2024

"Sual thu-ah te thiam loh an chang ang, kei mi rin loh avang hian.” Johana 16:9

Sual awmna reng rengah Pathian rinhlelhna hi a bultumtu a ni tlangpui thin.

Isuan Johana 16:9 ah, "Sual thu-ah te thiam loh an chang ang, kei mi rin loh avang hian,” a ti. Awih lo mah la, Isuan ka ti ang a tih chu a ti thin, chu chu sual kan hriat ṭanna a ni. 

Pathian rinhlelhna i neihna chhan chu heng te avang hi a ni duh khawp thin mai.

I hlauhthawn emaw ngaihtha lo taka i awm hian, Pathian thutiam chu i ring lo tih hailanin a awm thin. Bible-ah thutiam 7,000 lai kan hmu a. Chu chu i beisei chuan i hlauhna leh ngaihthat loh rukna te pawh a tlahniam ang. Chu chu khawvela himna tha ber a ni. 

I dawhtheih loh viau chuan, Pathian hun tiam chu i ringhlel tih a tichiang. I nun atan Pathianin ruahmanna a nei a, nimahsela a hmanhmawh ngai lo. Nangma hun ruatah thlentir i tum chuan theihnghilh a awl reng a ni - chuvangin Pathian nghah ai chuan nangma kutzalin i tih phah thin a ni.

Mi huatna emaw ngeina emaw i neih chuan, Pathian finna i ringhlel tihna a ni. Pathian chu a fing a, a tha a, hmangaihna a nei. Nimahsela i ruahman anga thil a kal loh chuan emaw thil a tibuai nia i hriat chuan. Thil tha lo atangin thil tha a rawn chhuah ang tih i ring lo a ni.   

Sual nia inhriatnaah i awm reng chuan, Pathian ngaihdamna chu i ringhlel tihna a ni. Isua zuitute chuan sual nia inhriatna rilru engtia rei nge an put ang? Second khat a tawk. Chu chu sual puanna atan a tawk a ni. Sualna i neih reng chuan Pathianin a ngaihdamna che chu ringhlelin nangmah leh nangmah pawh i inngaidam thei lo tihna a ni. 

Tling lo nia i inhriat chuan, Pathian thiltihtheihna i ringhlel tihna a ni. Pathianin ka thiltihtheihna chu chaklohnaah hian a ni ka lantir thin ni a ti. Chu chu i rin loh chuan, thiltihtheihna chu nangmah atang chauhin a lo kal theiah i ngai tihna a ni. Chu rilru chu i put chuan i lungawi lo fo vang.

Hlauhthawnna te, dawhtheihlohnate, huatna te, sual leh tling lo nia inhriatnate chu lak kian i duh em? I rinhlelhna chu ringhlel tan rawh le. 

  

Pathian lehkha Thu hi i rin chuan, Pathian chungchang a sawina te leh a ngaihsakna che leh i chunga a rilru puthmang te chu i hre thei ang. Pathianin a thutiam a hlen thin tih ring rawh, hun tiam a nei a, chu chu a fing a, a ngaidam che, nangmah kaltlangin thiltihtheihna neiin hna a thawk a ni.   

Ngaihtuah zui atan

*I rinhlelh tan chuan Pathian thudik chu engtin nge i inhrilh nawn theih ang? 

*Tun hnaiah, Pathian i rinhlelhna hi a nasa nge a tlahniam zawk? Chu chu engvang nge?

*Eng sualna nge i buaipui ber? Chu chuan i rin lohna chu engtin nge a tihlan?

*[Lettu: Sangpuia]*