DI TAWNG LO VAL

~ maro colneya bungsut

Kum 1978 kum khan rawlthar kum 17 mi vel chauh thian zaho chuan nula rim turin nula awmna in kawngka an kik ngam lo a, chutih mek lai erawh chuan tleirawl tam takte ang thovin a ruka Zu han in zeuh zeuh chu an tih ve phung a ni.

Aizawl Bethlehem Venga Mualzawl, Phul hmunah chuan rawlthar rual chuan Tingtang perha an zai chu chulai bul hnaia awm Kohhran upa fam ta, Pu Thlenga meuh pawhin thiam a ti a ni ngei ang, "Lalhmangaiha te thianho an zai loh chuan mut a har," a ti hial a ni.

Rawlthar rual, nula rim ngam lo leh a ruka zu in zeuh zeuh te chuan phulzawlah an zaiho thin a.  An zingah chuan Lalhmangaiha chuan tingtang kuah chung chuan zan danga an hla hriat ngai miah loh hla chang khat leh thunawn a rawn sa chhuak a. Chu hla a sak chu an thianho chuan an hlimpui ngei mai. 

Lalhmangaiha chuan zan a mut pah chuan an thianhoa an sak chu mut pah chuan angaihtuah zawm a, rizai hnuaiah  chuan hla a phuah zawm leh ta. A tuk zingah chuan hla chang thum a ziak chhuak ta a ni. He a hla ziah chhuah zan lamah an thianho chuan thiam takin an sa leh thei nghal vek a ni. Chu chu a ni Di Tawng Lo Val lo pian chhuah dan chu.

Lalhmangaiha te thianho chu veng chhungah a kul ataiah in hmang an ni.  Aizawl khawpui chhunga thalaite zingah ruihhlo chi khat proxyvon rawn chhuak thar chu thalai zingah ruihpui an tam hle. Chung thalaite kai hruai tur chuan Bethlehem Venga YMA hruaitu zingah pawh thian zaho chuan thalaite kai hruai tur chuan ngaihtuahna an seng nasa hle. Infiamna lam sport hrang hrang hmang chuan thalaite infiamna an neih pui thin.

Kum 1990 krismas dawn hnaih chuan thalai rual tam zawkte sual lama an kal lohna turin concert buatsaih an tum ta a. December ni 23 leh ni 24 ah chuan thalaite chu concert neihpui tura ruahman a ni.  

Pu Lalngaiha chuan an band hming tur a rawn phuah a. "Mak An La Ti Ang" tih chu an pawm tlang nghal vek mai a. Mahse, an band hming chu a sei deuh tiin Pu C.Lalzawmliana chuan a tawi zawngin a rawn phuah ve leh ta. MALTA tiin an band hming chu a rawn phuah tawi a, chutah zet chuan an lung a awi ta hlawm viau a ni.

Chu an concert ah chuan Krismas hla an sa lova, Rotuiburi, Mamipa Mumang, Ka U Liana, MALTA tih hla chu an sa chhuaka, MALTA tih phei chu concert neih hma lawka Lalhmangaiha'n a phuah chawp a ni nghe nghe. Krismas dawna an concert hi a hlawhtling viau mai. Kumhlui thlah zanah concert an nei leh hial.

Kum 1991, April thla ah MALTA hming chuan Album an buatsaih ta a. Hla an record lai chuan hla 12 record turah hla chuan a daih lo a, recording studio ah chuan Lalhmangaiha chuan "Nunhlui" leh "Thuamtingtanga" chu studio ah chuan a phuah chawpchilh a, chumi an record zawh chuan hla chuan ala daih lo cheu mai.

Chutih mek lai chuan band member zinga mi chuan, "Hmana i phuah 'Di tawng lo val' kha" tiin a rawn sawi chhuak a. Hmangaiha chuan a han ziak chhuaka, a hla chang 3-na tak chu a theihnghilh ta hlauh mai. A hre chhuak zo ta lo. Chang 3-na chu phuah zawm ta lo chuan chang 2-na chu an sa nawn ta zawk a ni.

MALTA hian an album hmasa ber chu chhuahsak tur chuan mi 5 vel be kualin an lo hnar vek mai a. Chutianga an lo hnar zel avang chuan mipui lamah an hralh chhuak thei lo ang tih an an hlauthawng hman nasa ta mai a.  Beidawn tawpah Pu Lalruanga chu ngaihthlak tirin Pu Lalruanga chuan MALTA Album hmasa ber chu a lo sawisel sak nasa mai. Mahse, Rs.5000 chuan MALTA cassete master chu a lo leisak ta a ni.

A hnu lama an hriat leh dan chuan Lalruanga'n a sawisel tawh chu Album tha lo a awm lo, tih an hre leh si. Pu Lalruanga chuan a hnu lawkah Pu Hmangaiha hi a motor ah phurin, "I zarah motor ka neih theih phah..." a lo ti bawk. He an Album hi YMA Day, 1992 an release nghe nghe.

A mak ngei e thiana, Zan dang iang lo reng a;

Hlim zai i vawr tak mai, I di i tawng em ni,

Perhkhuang tingtang nena, Hlim zai vawr chu.

Di zawng kan tawng mawlh lo, Suihlungleng vala te hian;

Awmhar lunglen dam nan, Chawlhtui ningzu dawnin,

Lunglen a dam mahna tiin; A riang vala te hian,

Awmhar lunglen dam nan, Di tawng lo val kan rui.

Lung zawng a dam ngei e, Perhkhuang tingtang nena;

Chawlhtui ningzu dawn chu, Mahse, hai ang thangin,

Ka dawn thin kan nun te, Tahlai kan bang chuang lo.

.