DANGLAMNA NGHET NEI TURIN PUITU I MAMAWH

_Pathian Thutiam Mak_

Rick Warren

Jan 2, 2024

"Chutichuan, dawt sawi banin, mahni thenawm hnenah thu dik tak sawi theuh rawh u; inpeng tawn theuh kan ni si a.” Ephesi 4:25

Danglam tura thutlukna i siam rual khan, nangma tum tumin i lo tum maithei e. Nimahsela rintlak mi tlemte i neih loh chuan i hlawhtling ngai lo vang. Pathianin mahni chauha hringnun hi paltlang turin min ti lo va. Kan thawhho hian kan tha zawk a ni.

Danglamna nghet nei tur phei chuan mipui an tel ve a ngai. Thenkhat chu kan beih hi a lian em a, a huhova tih ngai thil te a ni thin. American Football-ah chuan, an tumpui te zingah palian tak a malkhaia hneh chi rual loh an awm thin a. Pawlho chuan inthuruala beihrawn a ngai thin. Chutiang chuan, i nun harsatnaah nangmah tanpui tur che i mamawh a. Pawlho (small group) i mamawh a ni.

Pawlho (small group) tih takah mi tlemte kha an ni mai a. I nunah danglamna liantham neih tum ta la, mi 25 hnenah chuan i langtlangin i rinawm vek thei lo vang. Nimahsela mi panga emaw mi paruk emaw hnenah chuan i rinawm thei ang. I hmelhriat hnenah i rilru zawng zawng i phawrh a tul lo va. I thiltih mek chu mi zawng zawng hnenah sawi vek a ngai kher lo -  amaherawhchu mi tuemaw tal chu i hrilh a ngai a ni.

I danglamna, i thanna leh i insiamrem chhoh mekna chu i la thutak viau a nih chuan i hlauhna te chu mi tlemte chungah i hrilh thei ang. Mi dang pakhat hnenah Pathianin danglam tura a siamchhan che i rinna i hrilh rual rualin chakna i nei nghal ang. Mi dang ke penpui tur i mamawh a ni. I rilru hahnate chu phurhpui tur mi dang i nei a ni.

Ephesi 4:25 chuan, "Chutichuan, dawt sawi banin, mahni thenawm hnenah thu dik tak sawi theuh rawh u; inpeng tawn theuh kan ni si a.” “Inpeng tawn theuh” tih awmzia hi eng nge ni - kan hrang theuh si a? I thenawm emaw i thawhpui emaw i school kalpuite an ni lo. Pathian chhungte tihna a ni. Kristian kan nih angin, Pathian chhungte vek kan ni.

Nangmah hmangaiha, kai che a, phurpui che a, i nun thlakdanglampui che pawlho (small group) te i neih hunah chuan Pathianin a siamchhan che ang tak i ni thei ang.

Ngaihtuah zui atan

* I Kristian thiante laka langtlang leh rinawm hlauhna eng te nge i neih? Mi dangin chu hlauhna chu an neih ve i ring em?

* Pathianin a siamchhan che anga i thanna leh danglamna kawngah engtin nge pawl ho (small group) in an puih che?

* Pawlho (small group) i nei lo a nih chuan, nagmah tanpui thei tur che i zawnna kawngah engtin nge tan i lak ang? Hei hian thingpui inpui tura thianho sawmchhuahte leh Pathian hnena pawlho (small group) dil te pawh a huam ang.

*[Lettu: Sangpuia]*