PEKAH PATHIAN I HNEH BAN THEI LO VANG

_Pathian Thutiam Mak_

Rick Warren

Jan 3, 2024

"Pe rawh u, chutichuan pekin in awm ang, thahnemngai taka teh a, beng muk a, sawi muk a, liam zawih zawihin, in mal chungah an pe ang che u. In tehna ngai bawkin an tehsak leh dawn si che u a.” Luka 6:38

Isua thinlung pu a i pek chuan, malsawm dawn i tum vang a ni lo vang. Mahse hei hi thudik chu a ni - Pathianin mal a sawm ang che.

Pekah Pathian i hneh ban thei lo vang. Pathian thilphal anga i thilphal chuan, thil tam tak pek a tiam che a ni. Hei hi Pathian economy a ni. 

Pathian chuan hetiang mai hian, “Tu nge pekah hneh ban thei i en ang. Min pe la, mi dang pawh pe la, tichuan kei pawhin ka pe ang che - tu nge chak kan en ang,” min ti a ni.

Pathian chu a chak zawk! A thu thianghlimah pawh kan thilphal chuan kan dawn let tur thu vawi tam a sawi a. A chang chuan malsawmna te chu sum leh pai te a ni ang. A chang chuan thinlunga thilphal te hnen atangin thlarau malsawmna a ni ang.

Isuan, "Pe rawh u, chutichuan pekin in awm ang, thahnemngai taka teh a, beng muk a, sawi muk a, liam zawih zawihin, in mal chungah an pe ang che u. In tehna ngai bawkin an tehsak leh dawn si che u a.” Luka 6:38

Isuan eng nge a sawi hi? Bazarah buhfai lei turah inngai la. Ip ruak keng la, chumi khat man chu pawisa pe la. Dawr neitu chuan buhfai a thun laiin, lo beng muk zel la. Ip chu han thing nawk nawk la, a leng tam zual ang. Buhfai chu a tam thei ang ber thun i tum a ni.

Isuan, Pathian malsawmna chu chutiang chu a ni a ti. Thilphal taka i pek chuan, tam tak a pe ang che a, pek tur pawh i neih belh zel ang. 

Ani chuan beng mukin a pe che a - nang chuan i thil phal pawhin a then chauh i pe zawk a ni. I pek ang zelin Pathianin a pe ve dawn che a ni. Amah anga thil phal ve turin a duh che a ni. I thil phal ve loh chuan amah ang i ni ve thei lo vang. 

Hei hi thutlukna i siam tur pawimawh ber te zinga mi chu a ni: Pathianin mal a sawm che angin i nun pawh pe chhuak tur i ni lo vem ni? He leia thil te kalsanin Pathian thutiam chu hlim taka beisei chungin i khawsa dawn lo vem ni?

“In tehna ngai bawkin an tehsak leh dawn si che u a.” Pathianin mal a sawm zat tur che chu nangma thutlukna a ni zawk a ni.

Ngaihtuah zui atan

* Kohhran leh mi dangte hnena i thilpek dan hian Pathian thutiam malsawmna i dawn tur chu a hrilin i hria em?

* I nunah Pathian malsawmna engtin nge i dil thin? Amah anga thil phal ve turin engti zawngin nge i tan i lak ve?

*[Lettu: Sangpuia]*