Central YMA in kum 2023-2025 YMA Kumpuan an hawng

Aizawl | Jan 17, 2024: Nizan Ni 16.01.2024(Thawhlehni) zan dar 7:00 ah khan Central YMA chuan kum 2023-2025 chhunga YMA Kumpuan “ Ram leh Hnam humhalh” hawnna hun Vanapa Hall ah an hmang a, Pu Lalhmachhuana, President, Central YMA in a hawng.

Kumpuan hawn inkhawm hi Prof. Lalnuntluanga, Vice President leh Kumpuan Sub-Committee Chairman in a kaihruai a. Prof. Malsawmliana, General Secretary in Branch hruaitute hriattur pawimawh leh CYMA hmalakna te a tarlang bawk.

Pu Lalhmachhuana, President chuan Kumpuan hawn paha thusawiin,,“ Mizoram chhung leh pawna Zofate hi tangrual tur leh inpumkhat tura tanlak a tul thu te, chibil inlakhran tumna tih hauh loh tur a nih thu te; khawtlanga sual do tura tanlak nasat a ngaih thu te, khawtlangah chimtu kan ngah tawh avangin veng leh khaw tina YMA hruaitu ten pem lut leh chhuak uluk taka chhinchhiah a tul zia te a sawi a. Hei bakah hian Kumpuan kaihhruaina in a sawi angin zirna kawngah te, sumdawnna kawngah te ngaihtuahna sen a tul thu leh Mizo hnam ziarang humhalh a tul thu a sawi bawk.

Kumpuan hawnnaah hian Aizawl khawpui chhunga YMA Branch 109 atangin mi 500 bawr vel an kalkhawm a ni.

“ Ram leh Hnam humhalh “hi kumpuan atan kum 14 zet hman a ni tawh a, tun tumah hian kum 2 chhung atan puan leh a ni bawk. Central YMA chuan kumpuan bawhzui dan tur “ Kumpuan Kaihhruaina” a siam a, hemi zui hian Branch, Group leh Sub- Hqrs ten an huamchhung theuhah hma an la dawn a ni.