- K Remruatfela
Author of "Mizoram Politics Bihchianna"
%20(16).jpeg)
Inthlanpui a awm reng reng hi chuan a chhunga lut ve si lo hian a phusa ber leh nuam ti ber te zinga mi hi ka nih ve thei ziahin ka inhria a. Kumin Inthlanpui pawh hi ka theih ang tawkin ka lo chik ve a. Chutianga mahni phak ang tawka kan lo zirchian ve na atanga party tin ka hmuh dan tlem azawng lo tarlang ve ila:
1. BJP:
Mizoram Inthlanpui kan hmachhawn tawhte thlirletin tun tum hi BJP ten beiseina an neih san ve ber tum a ni hial awm e. Tum dangah chuan seat 1 an lak theih chuan an lawm tawk viau thin kha a ni a. Nimahsela, tun tumah chuan seat 5 hi chu tling tura inbeisei ve ngamna an nei tlatin a lang a. An vanneih phei chuan seat 3 lai chu tlin theihna chance tha tak an nei.
2. MNF:
Anmahni chu Mizo nationalism chawinungtu party ah inngai thin mah se, a lo din chhoh danah patling lungfing zawkte rilru a dam theih loh avangin vawiin thlengin mi tam tak thinlungah ser nung an la neih phah niin a lang a. Thalai zawk ten kan ram political history kan ngaihven tial tial a, hnuhma pawr hai chhuah tur pawh a tam chho zel dawn niin a lang. Nimahsela, rorel lai party an nih miau avangin la buk rit viau tura ngaih chu an ni a. Amaherawhchu, corruption/nepotisim/financial management velah duhkhawp an hlawh loh em avangin mipuite hian chance kan pe leh duh kher ang em tih hi rin thiam a har hle. Term 1 lek an la sawrkar chhunga heti taka anti-incumbency wave a ri ring hi thil mak tak a tling bawk. Duhthusama bial tina ZPM la insawhnghet tawk lo leh Congress muthlu hi an vanneihpui viau thei thung. A lo indin chhoh dan chu thuhran ni se, tun hnuah chhawmnungtu mi tha tak tak an neih avangin bial tin han zir chian hian seat 13 - 19 vel chu lak theihna chance an neiin ka hria.
3. MPCC:
UT kan nih hnua kum 20 chuang ngawt min hruai tawh tu an nih avang hian mipui te hian kan chhang kham tan tawh niin a lang a. Hei tak hi siam tha turin President Pu Sawta hovin Congress thar din an tum a ni tih pawh a chiang reng a. Chumi bawhzui chuan thalai hip thei turin an inthuahfai nasa hle tawh tih pawh a hriat. Chutihlai erawh chuan thalaite hip tum ZPM vung chhoh lai tak a nih avangin ZPM auhla tho kalpui an tum hi awmzia a la awm lutuk thei rih lovin a lang. Amaherawhchu, Congress hi chu an la ding chhuak leh dawn tih hi a chiang a. Tuna an candidate te pawh hi mi tha leh awhawm tak vek vekte an ni a. Hun a la duh deuh ang tih mai chauh a ni. Tuna a lan danah chuan seat 5 - 7 vel hi chu an lak theih a rinawm.
4. ZPM:
Kalphung thar tlangahpuitute an nih angin party phur ber leh tha tho ber an ni tih a chiang a. A bik takin thalai leh neutral te thinlunga ZPM supporter nih chu changkanna leh tunlaina ang hawi zawnga ZPM brand an vawrh chho thei hi hruaitute an fakawm tak zet. Zep thu a chêng lova. Khaw tinah kal ila, party-a an nihna leh hawi zawng pawh hriat mang loh kan tihte hi chu a ruk takin ZPM silent supporter an lo ni deuh zel a. Heti taka neutral an hui thei hi thil mak a tling! Kumin inthlan hi an boruak tawn san lai ber tur niin a lang. Chutih lai erawh chuan ZPM wave hi a tleh nat viau lai hian bial tina an candidate te en hi chuan vote chakawm lemlo leh mimala weight nei lemlo hi an tam hle a. ZPM wave hian a dâwm kang chho thei hlawm a nih chuan thuhran a nih a. Chuti ni lova, hemi ZPM brand kan tih hi bial tinah a vung rual lo a nih vaih chuan boruak nei lian fu si hian bial chân hi an nei ve nuk thei tho mai. Tuna a lan danah chuan Seat 18 - 25 vel thleng hi chu la thei tur angin an lang a. Sawrkarna siam tura beisei awm ber chu an ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: