Aizawl | Dec 3, 2023: Mizo film thar 'KEIMI' chu nizan khan mipui en theih turin Vanapa Hall-ah tlangzarh a nia, mipuiin an en ho nghal.
Keimi film hi show a kalpui an tum a, veng leh khaw hrang hrangah show turin an biak theih dawn a ni.
KEIMI-ah hian Zohmingliana leh Zonunpuii (Zonuni Hnamte) te'n lead role an play a, supportingah Zairempuia Khiangte, Zodinpuia, Rualchhana Pachuau, Lalhmunsanga, Councilthanga, Biaksangpuii leh David Malsawmtluanga te an lang. Heng bakah hian Khawhai khuaa mi hrang hrang an lang bawk.
KEIMI Film Director hi Christo Pa niin, Asst Director hi K Lalawmpuia a ni a, Production Manager hi Lalruatfela Tochhawng niin, Asst. Production manager hi Vanlalthaa leh Lalremsiama te an ni. Story hi AB-a Hmar leh Dawm Pachuau te ziah niin, Cinematographer hi B Lego Pictures a ni a, Costume hi B Lalawmpuia leh Zodinpuia te'n an khawih a ni.
Mizo Pipute thawnthu behchhana siam KEIMI hi Christo Pa ziah leh direct niin, Story plot thenkhat hi Dawm Pachuau ziah a ni bawk a, scene thenkhatah Mizo thu leh hla thiam em em Aba Hmar kuthnu pawh hmuh tur a awm. Tin, Cinematographer Lalbiakthansanga (B Lego Pictures) hi Mizo Tradition behchhana film siam thiam tak niin, Music Video te bakah Short film hrang hrangah kuthnu a lo hnutchhiah nual tawh a. Chung zingah chuan THIM TIN chuan mite ngaihhlut pawh a hlawh hle.
Keimi Filma changtu te hi a tam zawk mi thar an ni a, Khawhai, Tlangpui, Biate, Farkawn, Leilet (Myanmar) bakah Chalrang, Lungtan leh Aizawl mite an ni hlawm. A changtu thenkhat zinga sulhnu nei ve deuh te pawh film panngai an chan vawikhatna deuh vek a ni.
Keimi Film inbuatsaih nan hian hun a duh rei hle a, He mi inbuatsaih vel nan ringawt pawh kum khat chhung hun hman a ni a. Chhun leh zan chawl lovin thla hnih chhung shooting hi neih a ni bawk. Vangtlang, Chalrang, Lungtan, Khawzawl, Dungtlang, Vangchhia, Tiau leh Chawngtui ram chhungah shooting hi neih niin, he film-ah hian Mi 100 chuang an inhnamhnawih bawk a ni.
He film atan hian tha leh tui an seng nasa hle a. Tukthuan pawh an buai luat avangin zan dar ruka ei changte pawh an nei fo a ni.
He film Director Christo Pa chuan, "Ke a kal ngai thui tak tak a awm chang a tam a. Thosi leh vaimite bakah rannung seh thei chi tam tak kara kan naute dawhtheih zia ka hmuh hian ka chhuang a. Film siam leh dawn pawh ni ila, an ni bak thlan tur an awm chuang lo." a ti.
"Mi hausa kan ni lo a, chhungkaw pawisa awm ang ang khawrh chhuaka risk la kan ni a. A changtu te an ni emaw Production team lam pawh a tha ber leh thiam ber ber kan ni lo a. Kan vawikhat film siamna tur ani leh nghal. Engkimah Mizo film lo siam tawh te kan tluk lo hle a. Hriatna leh thiamna kan neih pawh a beitham.viau mai. Mahse, Pathian malsawm tlaka hna thawh hi kan tum.ber a ni a. Pathian tanpuina pawh kan dawng nasa. A huhova tawngtai rual pawh kan nei fo a. A theih hram chuam shooting dawna Pathian hnenah kan inhlan thin. He film changtu leh siamtu te hian tlakchham kan ngah avangin engkim neitu Pathian chu kan au nasa a, min tanpui turin kan dil nasa," tiin Christo Pa chuan a sawi.
"Mizo mipui te beisei kan pha lo ang. Mahse, kan theihna zawng zawng kan hmang a ni tih erawh ka sawi duh a, Pathian puihna vang liau liau a Mizo mipui te tan ennawm chhuahtu kan nih ve hi kan beisei tlat a ni," a ti bawk.
He Movie hi Mizo pipute thawnthu behchhana ennawm thei tura phuah chawp liau liau a ni a. Entir pawh a nei lo a. Thu ril leh tha pawh hmuh tur a tam lo ang. Inhmangaihna viau hun a awm lo a. "Ka hmangaih che a sin" tih phei chu hmuh tur a awm lo hrim hrim. "A en tur pawhin mi hrisel tha tak nih a ngai," Pu Maawma, Asst. Director chuan a ti bawk
He film siamna atan hian Cheng nuai 5 chuang hret sen niin, he film a hlawhtlinna atana tha thawh zawng zawng suma chantir chuan hei aia tam daih hi sen a ni.
Director Christo Pa chuan, "he film kan puitlin theih nan hian Pathian tanpuina kan dawng nasa a. Film member te hi chang ringawt lo, hnatlan a ngaih pawha nileng thak thaka hnatlang kan tam a. Khawhai MUP phei chu A Joint MUP tawp a thawhchhuah an ngah khawp mai. Hei lo pawh sawi tur a tam mai. Sum leh pai beisei miah lova film a lo hlawhtlin theih nana tha leh tui sengtu zawng zawng te chunga lawm thu ka sawi a. He film hi cheng za hnih khat man chu phu khawpin hna kan thawkin kan hria a. A man phu tawk viau turin zo hnahthlak mipui te tan ennawm chu kan buatsaih ve tawkin kan inhria." a ti.
Show hi December thla chhung chu kalpui an tum a. Apps ah an dah a nih pawhin December thla tawp lamah chauh an dah chhuah hman chauh a ring a ni.
A hmuna entute zingah hmuhnawm tia sawi an tam a, an insual leh chezia a tak a ang hle. A changtute'n an chang thiam a. An insual lai phei chuan lo ṭan ve ṭung a awl. Entute zingah an ṭang lutukin kut lo beng tawk an tam hle a. Awrawl chhuah ta hluah hluah pawh an tam hle.
A changtute hi en mai chuan film lo chang fo tawh an ang a, aw tipuam lui kher lova an aw pangngaia thu an sawi mai khan a tiang zual a. Film ṭhenkhata an hrilh chawp an sawi zel emaw tih mai tur ang chi kha hriat tur a tlem.
Thuam chungchangah Mipa lam chu an inthuam dan a dik thlup a, mahse, hmeichhe lamah puan ze nalh deuh deuh nena lang an awm ta erawhin mit a tithlep! A thawnthu hriatthiam a har deuh a, a inzawm lo deuh em aw, tih tur a ni. A film kalhmang hriatthiam a har deuh a, mi nawlpui en tura duan a ni miau si a, mi nawlpui tana hriatthiam harsa a awm erawh a pawi!
Duh aiin Drone an hmang nasa em aw, tih tur a ni a, Documentary film ang maiin chung lam aṭangin ram thla a lang zut mai.
Film ṭha tak a ni a, a siamtute thawhrimna a fakawm tak zet a, an ti mai mai lo tih a chiang!!
- H Zate
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: