Home Minister K Sapdanga'n office luah lut

Aizawl, the 11th December, 2023: Mizoram Sawrkar thara Home Department, Urban Development & Poverty Alleviation (UD&PA) Department, Department of Personel & Administrative Reforms (DP&AR) leh Disaster Management & Rehabilitation (DM&R) Department changtu Minister Pu K. Sapdanga chuan vawiin chawhma khan a Pisa thar, MINECO ah a luah lut. Minister pisa thar hi MINECO Old Building First Floor (Room no. 101 & 102) ah a awm a ni.

Pisa thar luahluh puala inkhawm tawi hmanah Home Minister Pu K. Sapdanga chuan Sawrkar lama thawhpuite, thenrual tha leh Party lama thawhpuite nena Pisa luahluh leh inhlanna hun hman a ni chu lawmawm tiin, kalkhawmte lawmna thu a sawi a. Kalkhawmte chu ram leh mipui rawngbawl kawnga theihtawp chhuah puiah a sawm a ni.

He hunah hian Rev. Dr. K. Lallawmzuala'n hunserh hmangin Pisa thar leh thawktute hlanna neiin fuihna thu a sawi a. Kalkhawmte inhmelhriattirna hun hman a ni bawk.

Vawiin Home Minister Pu K. Sapdanga Pisa luahluh pual hun hmanah hian a nupui Pi Darpuii leh a fate, AMC Councillor Pi Christina Roluahpuii Sailo, a enkawl Department hrang hranga hotulute, MJA hruaitute, party atanga a thawhpuite leh a chhungte engemawzat an tel a ni.