MLA bial 40 awmah MNF chuan bial 26 ah hnehna chan ngei kan in beisei tawh - MNYF Vice President

Aizawl | Nov 1, 2023: Mizo National Youth Front Vice President Zodinpuia chuan vawiin dar 2 khan Aizawl Press Club-ah thuthar thehdarhtute kawmin, "MLA bial 40 awmah MNF chuan bial 26 ah hnehna chan ngei kan in beisei tawh," a ti a. "bial 14 dangah pawh MNF hmasawnna chak takin a kal mek a ni." a ti bawk.

MNYF vice president chuan, "Kumin 2023, November ni 7 a Mizoram inthlanpui neih turah MNF chuan Pathian leh mipuite duhsakna avangin sawrkarna chan leh ngei kan inbeisei a, hnehna chang ngei tur pawhin theihtawp kan chhuah a ni." a ti a.

"Tunah hian Mizoram a MLA bial 40 awmah MNF chuan bial 26 ah hnehna chan ngei kan in beisei tawh a, bial 14 dangah pawh MNF hmasawnna chak takin a kal mek a ni.  Constituency hrang hrang dinhmun kan thlirin bial 9 ah Congress party nen fal takin kan inbuan mek a, MLA bial 4 ah hian BJP in min rawn hnaih ber a, MNF leh BJP inbeihna Constituency pali (4) ah hian ZPM member ten BJP candidate an pui tan niin thu kan dawng vek thung a ni." a ti.

"Mizoram inthlanpui lo awm turah hian MLA nih tum Nomination file mi 174 an awm a, heng zing atang hian criminal case nei mi 6 awmin, chung zinga mi 4 lai chu ZPM party official candidate an ni. Criminal case nei mi pali (4) ngawt vawrhchhuak tu ZPM party hian an candidate te sum lakluhna a thianghlim em tih pawh an ngaihtuahlo niin a lang a. Mi hausa leh milar ringawt buaipuitute hi kum 5 chhung ram rorelna fawng chelh turin mipuite’n enchhin tlakah an ngaih kan ring lo a ni." a ti a.

Zodinpuia chuan, "Eptu party thenkhatin MNF hi a chhe thei ang bera puh a, mipui rilru hruaikawi tum thin mahse Pathian leh mipuite zarah MNF chuan hengte avang hian sawrkarna chan leh ngei kan inbeisei a ni." a ti a.

"Politics ah itsikna avangte in nasa takin kan inchirhtheh thin a, chutichung chuan tun kum 5 chhung hian MNF MLA leh Minister te zingah zu leh sa, nulat tlangvalna kawng a hmingchhia an awm lo te, eiruk leh hlemhletna kawngah thubuai nei an awmlo te hi Pathian min hruaina ah kan ngai a, ram hruaitute tana bang lova tawngtai thintu zawng zawngte chungah lawmthu kan sawi nawn leh a ni." a ti bawk.

He hunah hian mipuiin MNF an thlan leh chhan turte an sawi.

1. MNF in ram hmasawnna hna tam tak a thawh avangin.

Kum 2018 December ni 15 ah Pu Zoramthanga kaihhruai Mizoram sawrkar lakluh a ni a, kum 1 vel chauh sawrkar a kal hman tih in hripui leng in min tibuai a, hrileng avang hian Lockdown pawh ni 718 lai puan a ni. Covid-19 avang hian MNF sawrkar term hi kum 2 leh a chanve zet chu pawhtawi in a awm a tih theih hial awm e. Heti chung hian sawrkar chuan ram hmasawnna turin hna tam tak a thawk a, hmachhawp tam tak a nei bawk a ni.

Hripui lengin a tihbuai lohna hnuaiah MNF chuan hmasawnna hna chakzawk a thawh chhunzawm zel a tum a, hmabak tamtak kan neihte chhunzawm turin mipuite pawhin MNF ah rinna an nghat a ni.

2. MNF chu Mizoram Political party zawng zawng zingah hruaitu nei tha ber a nih avangin.

Tuna political party dang, Congress, ZPM leh BJP a an hruaitu leh an Chief Minister tura an vauchher ho zawng zawng hi MNF a lo awm hmasa tawh vek an ni a, MNF hruaitute erawh hi chu political party dang a la zuanglawr ve ngailo. Mizo nun a bet tlak, rinawmna leh huaisenna vawng rengtu te an ni.

Mizo hnam hmangaihtu MNF rilru diktak pute chu an rinawm thin a, lungawilohna kulhbang chimin a nem thluk zawhloh hruaitu nei kan ni.

3. MNF chu Mizo hnam venghim tura Pathian min pek a nih avangin.

Kum 1966 March ni 1 ah MNF chuan India sawrkar awpbehna lak atangin zalenna a sual a, hemi hmalam hian kan Mizo khawtlang nun chu hnamdang awpbehna hnuai ah a tlu tlut hman viau tawh a ni.  Mizo thalaite’n hnamdang thuam inbel te chu changkanna ah an ngai hman hial a, Sakhuana leh Culture ah pawh hnamdang bawih ah Mizote chu kan tlu lut thui viau tawh a, heng zawng zawng hi MNF chuan rawn thiat in, Mizote thinlung ah Mizo Nationalism a rawn tuh thar leh ta a. Kan chhehvel hnam hrang hrangte chimral an nih tawhlai a Mizote chimral kan la nih ve loh chhan hi Pathianin Mizo hnam venghim tura MNF min pek vang chauh a ni.

4. MNF chu Mizo thalaite leh zirlaite ngaihsaktu a nih avangin.

MNF hi thalaite din leh kaihhruai chhoh a nih avangin vawiin thlengin MNF hian thalaite a ngai pawimawh a, party chhung inrelbawlna leh sawrkar ang a hmalakna ah pawh thalaite hmasawnna lam hawi in nasa takin hma a la thin a ni. Hun hmasa lama la awm ngailo College zirlaite excursion a kalna tur Budget ah a dahsak a, College zirlai admission leh tuition fee-te College tih hmasawnna tura dahsak tu a ni. Central services leh All India services a Mizo thalai kan tlin theihnan MNF sawrkar hian nasa takin hma a la a, kumin 2023 ah pawh hian Full sponsorship pe in Mizo thalai rual te India ram a IAS coaching academy thaber pawl, Vision IAS,New Delhi ah a kaltir leh mek a, hemi atan hian Budget ah cheng nuai 50 dawn a dah a ni. Hei bakah hian Mizoram chhung hnalak hrang hrangah thalaite an tlin theihnan MYC kaltlangin free coaching pek an ni a, India ram leh Foreign thlengin MNF sawrkar hmalakna avang hian mi tam takin hna an hmu tawh a ni.

Tin, hei bakah hian thalai mahni ke a eizawnna din duhte puihna tur Youth Oriented SEDP ruahman thar a ni a. Thalai mahni kut ke a eizawn tum leh ruahmanna neitha te (entrepreneurs) tan, project siama bul an ṭanna tur SEDP hnuaiah hian ruahmanna a siamthar bawk a ni. 

5. MNF chu Mizo mipuite hnena politics dik min zirtirtu a nih avangin.

Politics dik hnuai ah chuan kan ram leh hnam, kan sakhua a him tur a ni a, thangthar te thinlung a ram leh hnam, kan sakhua hmangaihna min tuhsak tu chu MNF a ni.

 Mizoram ah hnamdang an duh duh a an rawn lut theilo te, hnamdangin In hmun lo ram an nei theilo te, sumdawnna an duh ang anga an kalpui theihlohna chhan te hi MNF thawhrah a ni.

India Danpui (Constitution) hnuaia Mizoram bik humhimna dan a awm theihna chhan hi MNF thawhrah a ni a. Article 371 G hnuai ah hian, Mizoten kan hnam nunphung leh sakhua, kan hnam in chindan kan lo neih thin ah te India ram rorelna sang Parliament hian tidanglam turin thuneihna tawp nei lova, India ram rorelna sangber pawhin a khawih chet theih loh tura Mizo hnam nun leh sakhua humhimtu chu MNF a ni.

Tin, Mizoram chhung a sawrkar hnalakna zawng zawngah "Knowledge of Mizo Language upto Middle School Standard" dah a nih chhan hi Mizo thalaite sawrkar hna ah hnamdangin an chuhbuai theihlohna tura ruahman a ni a. India ram state dangin an neih ve loh rawn siamchhuaktu chu MNF a ni.

6. Ram leh hnam hmasawnna tura pawimawh, ‘Infrastructure Development’ din kawng ah MNF aia hnathawk tha an awm loh avangin.

Mizoram chhung a hmasawnna lian zawng zawng hi MNF kutchhuak deuh vek a ni. Inkalpawhna kawngpui siam chungchang ah te, Power lama kan intodelh theihna turte, Zirna in din kawngah te, sawrkar office leh sumdawnna hmun hrang hrang siam kawngah te, thalai infiammite tan hmun hma tamtak a buatsaih a, Mizoram hmasawnna tura infrastructure development siam kawngah MNF aia hma la nasa hi an awm lo.  

7. Mizoram leh hnam himna tihder thawn a awm changin MNF chu sorkar laipui hlau lova hnial ngam leh do ngam thin a nih avangin.

Kan ram leh hnam, kan sakhua himna hi MNF ngaihpawimawh ber a nih avangin, hemi tichhe thei thil reng reng chu huaisen takin a do mai thin a. Mizoram himna hi MNF chuan a dah pawimawh hmasak ber a nih avangin sorkar laipui dan siam tamtak pawh kan ram leh hnam, kan sakhua himna tiderthawng thei tur ni a a hriat chuan na takin a do mai thin. Citizenship Amendment Bill chungchang ah te, Uniform Civil Code chungchang ah te pawh nasa taka dodalna a lantir avang leh, Mizoram Assembly House ah hial duhlohna a resolution-a pass avangin CAB te pawh Mizoram ah chuan hman a ni ve talo a ni. 

8. Mizoram ramri humhalhna kawngah MNF aia huaisen an awm loh avangin. 

Thenawm state te nen ramri buai kan neih chungchang ah Mizoram humhimna turin MNF chuan silai a hmetpuak ngam mai a, vawiin thlengin kan thenawm state te chuan ramri chungchang ah Mizote min tibuai ngam tawhlo a ni.

9. Khawvel hmun hrang hranga Zofate kuahkhawmtu a nih avangin.

MNF chuan Zofate rorelna pakhat hnuaia kan awm hi a tum leh a ngahhlelh ber a nih avangin ‘Foreigner is a Foreigner’ ti mai lovin khawvel hmun hrang hranga cheng Zofate a kuahkhawm thin a. Myanmar, Bangladesh leh Manipur atanga kan unaute, vawiin thleng a Mizoram ah thlamuang taka an awm theihna chhan hi Chief Minister Pu Zoramthanga leh a kaihhruai MNF sawrkarin huaisen taka sorkar laipui thu a hnial ngam vang a ni.

10. MNF sawrkar hnuaia hnalak ah sawisel tur a awm loh avangin.

Kum 2018 December ni 15 a Pu Zoramthanga kaihhruai Mizoram sawrkar lakluh a nih atangin hnathar tamtak lak a ni tawh a, heng hnalakna ah te hian party induhsakna awm lovin a tling leh tlakte lak an ni thin. Tun kum 5 chhung hian Mizoram sawrkar hnuaia hnalak ah sawisel tur eptu party te tak ngial pawhin an hre lo a ni.

11. MNF sawrkar hnuaiah chuan Buhfai leh Gas a hnianghnar thin avangin.

Mizoram a MNF in sawrkarna a chanloh a piangin Buhfai leh Gas ah ram mipuiten harsatna kan tawk a, tlaivar a Gas chan ngai thinte, Buhfai lak mumal theihloh a awm thin kha MNF sawrkar hnuiah chuan mipuiten hnianghnar takin kan dawng leh ta a. Hei hi chhungkaw Pa eizawngtu tan leh in lama awm Nu tan pawh thawk huaina tham a ni.

12. MNF chuan Kohhran leh Tlawmngai Pawl te nen thawhhona tha a neih thin avangin.

Mizoram a Political party hrang hrang zingah MNF aia Kohhran leh tlawmngai pawlte thawhpuina nei tha an awm ngai lo. Kohhran ngenna angin MNF chuan zu zawrh a titawp a, tlawmngai pawlte ngenna angin Mizo society mil in sikul kai hunbi a thlak danglam leh a. Mizoram a thilthleng liantham a awm dawnin MNF chuan Kohhran hruaitu leh tlawmngai pawlte nen zaikhat in ke an pen tlangzel thin a ni.