Aizawl | Nov 1, 2023: Mizoram Pradesh Congress Committeee Media cell chuan vawiin khan Aizawl Press Club-ah thuthar thehdarhtute kawmin, "Mizoram sorkarin sum a tuakna hmanraw pawimawh tak State Lottery hmangin corruption leh inrawkna nasa takin a kalpui mek nia hriat a ni." an ti.
Congress Media chuan, He corruption-ah hian Minister lawk leh sawrkar officer lian enge maw zat inrawlha sawi a awm a. Hemi thilah hian private sumdawng leh sawrkar mi inthlunzawmin mimal hlawkna tel an awm ngeia hriat a ni a. Hei vang hian Mizoramin nasa takin sum leh pai a hloh phah thung.
Video:
Mizoram hian hun rei tak lottery hi a lo kalpui tawh a, a kalpui dan felfai vang leh mumal taka monitor anih thin avangin India ram pumah hriat a hlawh phah hle. Tun kum 5 kalta atang erawh kha chuan corruption leh inrawkna hmanruaah changin, Minister lawk thenkhat, sawrkar hnathawk lian leh private sumdawngte hlawknaah a chang zo ta mai em ni tih theih turin thil a kal kual nasa a.
Mizoram State Lottery official ten Supreme Court hmaa statement an pek atanga a lan dan chuan Mizoram State Lotteries in ni khata revenue a siam theih hi a tlem berah cheng nuai 20 niin, kum khatah cheng 72,40,00,000 (vaibelchhe 72 bawr) a ni. Mizoram sawrkarin kum 5 kalta chhungin cheng 2,75,60,00,000 (vaibelchhe 275.60) lai a la lut thei tur anga chhut theih tihna a ni.
Minister lawk zingah leh sawrkar hnathawk lian thenkhat zinga corruption a nasat em avang hian Mizoram sawrkar chuan kum 5 kalta chhung khan cheng 31,34,13,730 (vaibelchhe 31.34) chiah a la lut a. Chumi awmzia chu he thil an tih khawloh vang hian kum khata lottery hmanga sawrkar sumdawnna atanga cheng vaibelchhe 72 chuang zet la lut thei tura chhut khan kum 5 chhungin cheng vaiblechhe 31 awrh an la lut a. Kum khat chhunga lakluh theih zat chanve vel awrh MNF sawrkar kum 5 chhung hian an lalut tihna a ni.
Mizoram sawrkar leh Distributor te inkara inremna (agreement) ang a kalpui anih chuan, sawrkar hian kum 5 kalta chhung khan cheng 2,57,81,52,623 (Rs 275.60 crores) lai an la lut tura chhut a ni. He thiltih chingpen vanga Mizoram sawrkarin sum a hloh chu cheng vaibelchhe 226,47,37,893 (Rs 226.47 crores) ang vela chhut theih a ni.
Sawrkar leh private sumdawng, a ruka tang dunin Mizoram State Treasury-a lut tur an paipawn zo vek a, tun kan sawrkar hrawn mek hi heng private company te nen hian thawk hovin mimal hlawkna umin inremsiamna mak dangdai tak an kalpui nia hriat a ni.
Mizoram sawrkar chuan M/S Skill Lotto Solution leh M/S BS Enterprise nena inremna (agreement) an siam chu an titawp (terminate) a, heng company ngai vek hi a hmaa an inremna aia rate hniam zawkin inremna (agreement) an ziah pui leh a. He thil hi enge a awmzia tih sawrkar hian chiang taka mipuite hmaa sawifiahna tur tanchhan tha tawk a nei em (?) tih hi kan zawhna a ni.
Sl. No. Particulars Rate in agreement dated 19.08.2029 Rate in agreement dated 04.08.2022
1 Skill Lotto Solutions Pvt. Ltd. 74,232 40,500
2 BS Enterprises 1,26,900 42,750
Heng kan tarlante atang hian sawrkar minister lawk te, sawrkar hnathawk lian thenkhat leh private sumdawng i.e. Skill Lotto Solution Pvt. Ltd. leh BS Enterprise te hi a ruka thawk hovin Mizoram Sawrkar sum bawm a pawisa lut tur hi an lo paipawn nasa viau em ni? Heng atang hian tute nge hlawkna tel tih hi mipuiten an hriatfiah ngei theihna turin sawifiahna felfai tak a awm kan phut a ni.
Sum lama harsatna kan ramin nasa tak a tawh lai leh leiba ringawt pawh vaibelchhe tam kan neih lai te; ti thei fa ten pawisak nei lem lova mipui nawlpui leh chhuanchham zawkte ngaihtuah lek lova nuam an tawlna sawrkarah hian han beisei leh chuan tur a awmin a hriat loh a. Sawrkar awmze nei leh kalphung felfai zawk a din theihna turin Congress party chuan Pu Lalsawta kaihhruaina hnuaiah ruahmanna felfai tak kan siam a. Pathian leh mipuite zara sawrkarna fawng chelhtu kan nih theihna tur leh heng kan ramin harsatna khirhkhan tak tak a tawh mek te chinfel anih theih nan Zoram mipui zawng zawng thawhpui atan kan sawm a che u.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: