37th National Games Goa khelh mekah Lalthlamuanpuian Silver a la

Aizawl | November 1, 2023: 37th National Games Goa khelh mekah Lalthlamuanpuian Silver a la.

Lalthlamuanpuia hi Taekwondo Poomsae Individual category ah khelhin mi 9 inelna semi finalah SSCB nen point in ang chiahin an hmu sang ber a. Finalah mi 4 lutin, finalah pawh hian an tha fal dun leh hle. Services hian point score ah 6.80 hmuh laiin Thlamuanpuia hian 6.67 a hmu a, Silver a la ta a ni.

Venghlui tlangval Thlamuanpuia hian Hrawva School atangin Moses Lalsangzuala hnuaiah Taekwondo a zir tan a. Republic Vengthlang Club a zawm hnuah Remlalhlimpuia leh R.Lalchhandam ten an hrual leh a. Tunah hian Gidae Taekwondo Academy hawngin a zirtir mek bawk.

Vawiin(31.10.2023) veka inkhel Sepaktakraw-ah Mizoram Team in UP 19-21, 21-17, 18-21 in hneh lo va. Swimming-ah Lalrinpuii Fanai in 50m Freestyle hleuhin Heat a paltlang lo bawk a. Lalrina Renthleiin Snooker-ah quarter final a paltlang lo bawk.

Ni 1.11.2023 a khel turte Sepaktakraw-ah Goa leh Assam an tum ang a. An chak ve ve chuan semi final an lut ang.

Taekwondo-ah Daniel Lalhumthanga & Vanlalhmangaihi te tan dunin Poomsae Pair an khel ang a, Swimming-ah Lalrinpuii Fanai in 50m Breaststroke a hleuh ang.