I TAWRHNA CHUAN PATHIAN THIL TUM A TARLANG THIN

  _Pathianin Bahlahnate Dinchhuahlehnaa A Chantir Dan_

By Rick Warren 

— Nov 1, 2023

“Pathianin keimahni min thlamuanna ngeiin hrehawm eng anga awmte pawh chu kan thlamuan ve theihna turin ani chuan kan hrehawmna zawng zawngah min thlamuan thin … Nimahsela, hrehawma kan awm leh, nangmahni thlamuanna tur leh chhandamna tur a ni a; thlamuana kan awm leh, nangmahni thlamuan vena tur a ni a, chu chuan kan hrehawm tuar bawk hi chhel taka in tuarnaah chuan a thawk thin a ni.” 2 Korinth 1:4, 6

I tawrhna chuan Pathian thil tum a tarlang fo. Pathianin hrehawmna hi a thlawnah a chantir ngai lo a ni.

Natna i paltlang a, chu natna chu Pathianin mi dangte tanpuina turin a duh a ni. Chu i nuna harsatna atang chuan mi dang tanpuia rawngbawlsakna nei turin a hmang thei che a ni. Chumi awmzia chu, i zahna ber thil kha i rawngbawlna pawimawh leh tangkai tak a ni zawk thei a ni.

Sum leh paia tlachhia chu sum leh pai lama lo tlachhe tawh vekin a tanpui thiam ber a. Ngawlvei chu ngawlvei vekin a enkawl thiam ber zawk bawk a. Chutiang bawkin fa hloh chu fa hloh tawh bawkin a tanpui thei ber zawk bawk a ni.

I nuna i thil huat ber chu Pathianin a tha zawngin i nunah leh mi dangte nunah hmang turin a duh bawk che a ni.

Bible chuan, “Pathianin keimahni min thlamuanna ngeiin hrehawm eng anga awmte pawh chu kan thlamuan ve theihna turin ani chuan kan hrehawmna zawng zawngah min thlamuan thin … Nimahsela, hrehawma kan awm leh, nangmahni thlamuanna tur leh chhandamna tur a ni a; thlamuana kan awm leh, nangmahni thlamuan vena tur a ni a, chu chuan kan hrehawm tuar bawk hi chhel taka in tuarnaah chuan a thawk thin a ni.” 2 Korinth 1:4, 6

Chu chu tuarna phena malsawmna a ni - Pathianin natna i tawrhte chu mi dangte tan malsawmnaah a chantir a ni. 

Chu chu Isua tih dan a ni. Isua krawsa a thih khan, thih kha a phu lo a ni. I chhandamna tur leh vanram i kalna turin i tan a tuar a ni.  

I tawrhna, na leh hrehawmna te hian chhan an nei vek a ni.

A chang chuan ngaihdan dik lo tak i nei thin a. Entirnan, i neih phak loh tur thil i lei chuan; nakinah chuan ba i nei teuh ang a, i in hial i chan ang tih a hlauhawm a ni. Chutiang hunah chuan, “Lalpa, engvangin nge ka in min hloh tir?,” i ti thei lo vang. I duhthlanna dik lo avangin Pathian i puh thei lo vang. 

I harsatna tawh thenkhatah chuan tihsual i nei lo. Nimahsela mi dang sualna leh pawisawina avang pawhin i tawrh chang a awm thin.

I tuar chu eng anga nasa pawh ni se, Pathianin a tuam dam thei. Tuarchhuak turin a tanpui thei che a, chu chu mi dang tanpuina hmanrua atan a hmang thei bawk.

Ngaihtuah zui atan

* Engtiklai khan nge Pathian hnenah engvangin nge a tuartir che tih chu i zawh?

* Harsatna i paltlang lai kha engtik nge. Chu i harsatna chu mi dang tanpui nan engtin nge i hman tangkai ang?

* Pathianin a thil tum hi engvangin nge a tihlan kher thin loh nia i hriat? Kan tawrhna chhan te hriat loh chang kan neih pawhin engtin nge tawrhna chu kan hmachhawn ang? 

*[Lettu: Sangpuia]*