Aizawl | October 31, 2023: Congress Media chuan vawiin chawhnu dar 1 khan Aizawl Press Club-ah thuthar thehdarhtute kawmin, "MMF sawrkar hnuaiah Mizoram Healthcare dinhmun a chhiain a tla bal" niin an sawi.
Congress media chuan, "Kum 5 MNF sawrkar chhunga kan chian em em chu kan nunna leh kan ram hi MNF rorel tlak lo, pawisak nei lo leh hlemhletna laka fihlim lo kutah hian kan dah ngam tawh lo tih hi a ni. He election lo awm tur hi min rawktu leh kan healthcare system tikhawlotute laka kan lungawilohna tihlanna ni mawlh rawh se," an ti.
"Khawvel huap natna hlauhawm tak tak leng reng karah hian kan sawrkar lai hi chuan inenkawlna lam tih hmasawn ahnekin dinhmun hlauhawmah mipui min dah zawk a, kan mamawh inenkawlna tur pawh min pe thei lo a ni." tiin MNF kaihhruai sawrkar chu an mawhphurhna hlen loah an puh.
Congress chuan, "Khawvel pum hripuiin (Pandemics) min nuai hrep hnu hian Mizoram sawrkar sum dinhmun hi alo derthawng hle tih a hriat a. A chhan chu healthcare system thuamthat aia project hman tlak leh chhawr tlak mang loha MNF- in mipui sum tam tak an khawh ral vang a ni." an ti a.
"Mizoram hi “Cancer State” tia koh hial niin Mizoramah hian cancer natna vei kan tam em em a, Kum tin mai mi za chuang fe cancer natna avangin kan chan ziah a. Heti chung hian kum 5 chhung khan MNF hian an bengkhawn mumal duh miah lo a, inthlan dawnah mipui bum nan Cancer Research Centre siam turin lungphum a phum tha ve leh hnuhnawh a ni." an ti bawk.
Congress hian, "MNF-in chhungkaw tin tan Mizoram State Health Care Scheme (MSHCS) hnuaiah health insuarance nuai 2 a tiam a. He scheme hi a hlawhchham chiang hle a, he scheme hian cancer leh natna khirh dang a huam leh si lo te hi a dik lo a ni. Kum 2023-24 budget-ah khan MNF sawrkar chuan health sector atan cheng vaibelchhe 751 an dah a, khawnge vbc 751 chu a awm pawh kan hre tawhlo a ni. Heti chung hian mipuiin sum an hmuh let tur (reimbursement) an hmuh let loh sawrkarin a bat sak zat hi cheng vaibelchhe 63.88 lai a ni hem mai ani. Hetih lai hian 2021-2023 chhunga mipui atanga Health Care Premium an dawn Vaibelchhe 15 chu thawktute hlawh atan an hmang vek anih chu! Thingtlangah hian nasa lehzualin sawrkar enkawl public health sector hi a tla bal lehzual a. Natna awlsam te a enkawl mai theih tur pawh harsa chung chungin Aizawl an pan a tul a ni.
He state pachhia, kil tina leibain a um mek hian sum leh pai (funding) hi National Health Mission (NHM) ah hian a innghat hlawm tawp," an ti bawk.
MNF sawrkar hian World Bank hnen atangin US dollar million 32 lai mai loan an la a, chumi chung chuan Mizoram mipui tam zawk awmna thingtlang lamah dam lo enkawlna (healthcare infrastructure/facilities) hian an sawrkar hun kum 5 chhungin hmasawnna lian tham a nei lemlo tih theih ani a. Hripui vanga buaina khan loh theih loh a thiltih tul a awm avangin ruahman lawk em em pawh nilo hmasawnna eng eng emaw a rawn hring chhuak ve chauh zawk ani. Lunglei a RT-PCR khawl chungchang a MNF sawrkarin chhim bial mipuite mangang aurawl a hawisan hmiah thei mai te khan mipui rilru a hliam nasa hle a ni, tiin an sawi a.
"Naupang hriselna lam pawh an ngaihthah hle a, taksa mamawh khawp chaw tha hmuh loh avanga naupang thanthu (stunting) zat hi kum 5 hnuai lamah zaah 28.9% lai a ni a, North East state zingah Mizoram hi a sang ber pawl a ni. Naupang chaw tha hmu lo leh thanthu (stunting) tih rem a puihna tur Cetral atang fund kan hmuh zinga hman tak tak chu zaah 67 (67%) chauh a ni." tiin an sawi bawk.
congress hian, INC chuan health insurance hi chhungkaw tin tan nuai 15 thleng an in tiam a, Rajasthan-a Congress sawrkarin heihi a hlawhtlinpui mek nia sawiin, Mizoramah pawh hlawhtlinpui ve ngei an tum, tih an sawi.
Heng bakah hian, Cancer leh natna khirh dangte enkawlna turin Congress chuan cheng vaibelchhe 5 fund dah an intiam bawk a. district hospital tinah diagnostic centre changtlung tak dah vek a, a changtlung thei ang bera damdawi in te pawh thuam that vek an tum a ni.
.
Post a Comment
He post chungchanga i ngaihdan lo sawi ve rawh: