Aizawl | November 2, 2023: "Mizo Kristian tana hlauhawm em em chu Hindutva ideology kalpui burtu BJP te hi an ni," tiin MPCC chuan vawiin dar 1 khan Press mite kawmin an sawi.
Congress party in ngaih pawimawh bera a neih chu kan ram, kan hnam, kan sakhua himna tur a ni a. Hengte hi a him lo a nih chuan hmasawnna hi awmze nei lovah a ngai, tiin MPCC Media chuan an sawi.
"Mizo Kristian tana hlauhawm em em chu Hindutva ideology kalpui burtu BJP te hi an ni a. India ram Hindu lal rama din tum bur tute hi Congress party chuan vulh len tum chi ah a ngai lo." an ti a.
"Chutihrual erawhin political party zingah BJP te nena inmawngzawm hreh hauh lo an awm reng hi a pawi kan ti hle a. Heng party te hian ram leh hnam hralh an pawi ti hauh lovah kan ngai a ni.
BJP leh ZPM hotu Pu Lalduhoma inlaichhina hi thilthar a ni lem lo a, kum 2014 March thla daih tawh khan Pu Lalduhoma leh BJP te hian thawhhona thuthlung anlo ziak tawh a. Kum 2015 kuma AMC Election leh Aizawl North –III bye-election ah pawh khan Pu Lalduhawma leh a hote chu NDA Candidate angin election anlo contest daih tawh a ni." an ti bawk.
Congress chuan, "Chumi hnuah phone call leak out atangin Pu Duhoma hian BJP te hi a thawhpui hreh loh thu leh BJP Mizorama an len theihna tur daltu lian tak chu MNF annih thu alo sawi tawh bawk.
Tunhnai lawkah mi nawlpui hriat lohvin Guwahati lamah te zin thlain thawhpui turte nena inbiakna te a ruk a nei nia sawi a ni bawk a. A ruka thawhpui a tum, a hma pawh alo thawhpui tawh BJP te pawh hian amahah rinna an nghat viau in a hriat a. Central lama an hruaitu rawn kalte pawhin Pu Lalduhoma leh ZPM hote chu an dimdawi thiamin sawrkarna siampui theih mai tura inngaiin Chief Ministerial candidate puang hauh si lovin, Deputy Chief Minister Candidate te an han ruat ve tawp mai a ni. Hei hian BJP hotute leh Pu Lalduhoma hian mipui nawlpui leh an party mi tam zawk pawhin an hriatpui lem lohvin inremsiamna thutlung anlo nei daih tawh tia ngaih theihna a siam lian hle." an ti a.
"Tunhnaiah ZPM hotupa thurawn an rawn ngaihpawimawh ta viau nge ni BJP sawrkar chuan Income Tax official te rawn tirin CM Pu Zoramthanga tana tangkai tak Kamrul Laksar in te an rawn dap tih hriattur a awm ta hial a ni.
BJP hian an party malin kua an hreuh theihlohna tur nia an hriat Mizoram bakah India ram state dangah pawh regional party te thawhpuiin sawrkarna chang anga tarlan hi an chin than pakhat a ni a. " an ti.
Sawi chhunzawmin, "NDA a rei tak anlo thawhpui tawh MNF hi sawrkar siampui theih tura an ngaih chiah loh avangin MNF thlakna tur atan regional party dang ZPM belbulin tlinna bial tur pawh nei mumallo khan Deputy CM Candidate an han nei ngawt ngam mai hi ZPM party leh an hotupa Pu Lalduhoma mit siai an hmu anih ngei a rinawm.
Heti hian zawi zawia MNF thlauh thla in ZPM chu thawhpui theih zawka an ngaih vangin BJP hian ruahmanna felfai tak an nei thlap niin a lang. Tun dinhmuna kan ram dinhmun dik tak hi chu MNF leh ZPM hian NDA/BJP a tlatlum zawk nih hi an inchuh mek a. Mipui hriatah a hmingin han inbei ve bawk thin mahse blood group pakhat nei annih avang leh hman atanga lo thawkho thrang annih avang hian an tan sawrkar in\awm siam turin thian hlui chaweikhawm ang chauh kha ani mai dawn a ni." an ti bawk.
"RSS/BJP leh an Hindutva politics a tira atanga dodal tluan chhuak awm chu Congress party chauh hi a ni a. He thuthlung hi Congress chuan thuneihna chan chak satliah vangin kan hralh ve thianglo a, kan hralh ve ngai dawn bawk lo a ni.
Chuvangin mipuiten rilru rimtak nena duhthlanna kan siam a. Kan ram, kan hnam, kan sakhua alo him zel theihna tur leh ram sum leh pai enkawlna mumal zawk neia hmasawnna rahbi kan rah ve theihna tur chuan Pu Lalsawta kaihhruai Congress party dinna leh hmachhawp te hi a rintlak a. Chutah ngei chuan in vote hlu tak lo thlak vek turin kan sawm a che u." tiin mipui an sawm a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: