Miss Northeast 2023 2nd runner-up atan Jennifer Renthlei thlang

Aizawl | Nov 6, 2023: Miss Northeast 2023 chu nimin khan a tawp khar a ni a, Mizoram aiawhtu Jennifer Lalrinzuali Renthlei chu pathumna / 2nd runner-up a ni.

Sikkim khawpui Gangtoka neih zawh tak Miss Northeast ṭum hnihna hi Sikkim CM in a telpui a, Northeast state pariat aṭangin state aiawh an tel.

Anamika, Kenei, Jennifer

Nagaland nula Kenei Ritse chu Miss Northeast 2023 atan thlan a ni a. Pahnihna/1st runner-up ah hian Assam nula Anamika Borah a awm a, Mizoram aiawhtu Jennifer Renthlei hi pathumna a ni thung a ni.

Jennifer Renthlei chuan, "A hmasa berah chuan hetiang dinhmun min hruai thlengtu Pathian chu fakin awm se la . Min support a duhsakna min hlan tu te zawng zawng chungah ka thinlung zawng zawngin lawmthu ka sawi e😭🫶🏽" a ti.

Govt Aizawl College Miss 2022 lo ni tawh, Jenn, Rinzual, Popo tia a thiante leh amah hretu te'n an koh thin Jennifer Renthlei hi a laiah hming chu Jennifer Lalrinzuali niin, 28 June, 2000 khan Zodingpuii leh Jacob Lalrintluanga te inkarah a lo piang a. Aizawl veng nuam leh fai - Republic vengah an awm a, Kohhran lamah chuan Baptist Church of Mizoram-a lawi an ni.