LAWMNAA NUN TIHKHAH DAN

_Hun Khirh Tak Kara Ke Pen Dan_

- Rick Warren

28 Nov 2023

"Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a.” 1 Thessalonika 5:18‬

Hun harsa leh hrehawmna tam tak i paltlang lai khan, engtin nge lawmna nun i neih zel theih?

Harsatna tam tak leh thil tha lo hrang hrang karah pawh, Pathian hnena lawmthu sawi hi chin thanah lo neih rawh.

Chu nun chu 1 Thessalonika 5:18 ah kan hmu a, "Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a.” 

Chumi awmzia chu eng dinhmunah pawh lawmna thinlung nei zel rawh tihna a ni. Thil tha lo hrim hrim entirnan cancer emaw tawhsual emaw tawh avangin kan lawm tur tihna chu a ni lova. He khawvela thil tha lo awm te avang hian kan lawm tur a ni tihna chu a ni chuang lo.

Lalpa hnena lawmthu sawi tura i hun i hman hian - rimawi, hmun mawi tak emaw, Bible thu emaw hian - i nun ruak chu rawn hnawhkhatin kal zel turin chakna a pe thei che a ni. Lawmna nun thlan chu nangma thatna tur a ni a; nun duhawm zawk nei turin a pui che a ni.

Kan nun a hlim a thil duhawm lo thleng a awm lo a nih chuan lawmthu kan sawi mai thei a. Hun harsa rei tak hmachhawn hian lawmthu sawi hi a harsa talh thin a ni. Nimahsela chu chu lawmthu sawi a tul hun tak a ni si.

Hun harsa tawkte tana entawn tur tha tak chu Joba chanchin kha a ni. Pa hausa leh hlawhtling tak a ni a, nimahsela ni khat thil thuah engkim a hloh vek a ni. A chunga thil thleng chu a hrethiam vek lo va, thinurna tur tam tak a nei a ni. Chung piahlamah chuan, lawm takin Pathian chibai a buk a ni. A hun thim berah pawh, leiah tluin Pathian a bia a, “Lalpa hming chu fakin awm rawh se” a ti a ni. Joba 1:21

Thil tha deuh i tih nghal mai theih chu nitina lawmna tur thil siam hi a ni. Nitin minute nga thuin hetiang hian inzawt thin la, “Engvangin nge ka lawm ang?” Beidawng taka i hun i hman pawhin lawmna nun i neih fo chuan kal zel turin chakna a pe ang che.

Kan hun thim berah pawh, Joba nun entawnin Pathian chibai kan buk ang a, kan tana tha tur a ngaihtuah avangin engkimah lawmthu kan sawi ang.

Ngaihtuah zui atan...

* Lawmna thinlung neih chuan Pathian tha tak kan nei a ni tih engtin nge a lantir?

* Thil kalphung pangngai anga i ngaih thenkhatte Pathian hnena lawmthu sawina tur vawiin atangin engah te nge i neih?

* Hun harsa i tawh lai pawh a lawmna thinlung i neih tlat avanga chakna i neih phah hialna kha engtik nge?

*[Lettu: Sangpuia]*