Aizawl | November 4, 2023: ZPM ṭhalai chuan vawiin tlai dar thum khan Aizawl Press Club-ah thuthar thendarhtute kawmin, "Dy CM-in a hawn Greater Aizawl Water Supply III chu hawn ni-ah bâk tui a pump thei lo," an ti a. MNF chu Vote hmuhna tur a nih phawt chuan pawisak nei loah an puh.
ZPM Ṭhalai General Secretary Malsawmtluangq chuan, "26.9.2023-a Setlâk Lui-a Greater Aizawl Water Supply Phase III, Dy.Chief Minister Pu Tawnluia, UD&PA minister ni bawkin a hawn chu a hawn ni bâk tui a pump theih loh tih ZPM Ṭhalai-in ni 1.11.2023 khan a hmun ngeiah kalin kan finfiah," a ti.
Sawi chhunzawmin, "MNF sawrkâra mi pawimawhte hi tlâng bum zawngin term tawp dawnah hawn tur zawngin an phi ruai niin kan hria a, hna thawh hun chhûng kum 5 teh meuh an nei chunga term tawp dawna hawn tur zawnga an phi ruai mai hian thinlung leh tihtakzeta Zoram veitu an nih lohzia leh vote hmuhna tur a nih phawt chuan pawisak an neih lohzia a târlang chiang hle." a ti bawk.
"'Mizoram politics-ah Pathian ram lo thleng rawh se' tih hi ZPM innghahna a ni a, kan ram hruaitu lu-te'n vawiin thlenga an vote duh luat avânga lemchan politics an la bânsan thei lo hi a lungchhiatthlâk kan ti," a ti a, "hnathawh ṭhat hmanga sawrkâr nawn tum lo party, mipuite buma sawrkâr tum party hi mipuite'n an hnawl ngei dawn niin a lang." a ti.
ZPM Ṭhalai GS chuan, "Pu Zoramthanga kaihhruai MNF sawrkarin an kum 5 term tawp lamah pawh hna thawh zawh loh hawngin mipui bum politics an kalpui mek a, an vote zawnna atan kum 5 chhûnga an thil ṭha tihin a daih ngang lo a nih pawhin hmachhawp ṭha zawk neia mipuite hnena ngaihdam dil chunga vote zawng tur an nih laia, hmachhawp ṭha zawk pawh nei chuang lova mipuite bumna politics bawk an kalpui mipuite zah lohna lian takah ZPM Ṭhalai chuan a ngai," a ti a. "vote hmuhna tur a nih phawt chuan MNF hian pawisak an neih lohzia a lang chiang hle a, fimkhur taka lo awm tur leh nghet taka ding turin Mizoram mipuite kan ngên," a ti.
Post a Comment
He post chungchanga i ngaihdan lo sawi ve rawh: