China rama Pneumonia hri leng mek chungchang sawiho

Aizawl | November 29, 2023: Vawiin khan SAD Conference Hall, MINECO-ah China rama pneumonia hri leng mek chungchang leh he hrileng laka Mizoram a him theihna tura hmalak tulte sawiho a ni a. He hunah hian Health Department Principal Secretary Pi Esther Lalruatkimi, Special Secretary Pu Vinay Kumar, Principal Director Dr Vanlalsawma bakah Health & Family Welfare Department hotu lian te an tel a ni.

Health Department Principal Secretary Pi Esther Lalruatkimi chuan China rama pneumonia hri leng vanga nausen thi an awm thu sawiin sawrkar laipuia Ministry of Health & Family Welfare lamin a tul anga lo inpuahchah tura hriattirna an tihchhuah avangin keini lam pawh kan lo inbuatsaih a ngai a ni a ti a. Ministry lam atanga lehkha rawn kalah pawh tun dinhmunah chi-ai na tur a awm loh thu an ziak tih sawiin mipuite chu chi-ai lo turin a chah nghal a. Hmalam hun hriat lawk a nih loh avangin kan phak tawk china lo inbuatsaih hi a pawimawh a ni a ti a. COVID hripui len laia inkaihhruaina dan te kha fimkhur thilah zawm tur chin te ngaihtuah a, health sector a thawktute dinhmun leh damdawi, hmanraw neih te lo in hrechiang tura hriattirna dawn a nih thu a sawi a ni.

Health Department hotute chuan China rama pneumonia hri leng chu zirchian mek a nih thu sawiin, tun dinhmunah India ram tan hlauhthawn tur a awm leh rih lo ni a a lan thu an sawi a, chutih rualin inthlahdah chuang si lova India ram chhung a bikin Mizoram hnaih State hrang hrangte dinhmun thlithlai reng a tul thu an sawi a ni. Vawiin meeting-ah hian Health Department hnuai thawktu hrang hrangte dinhmun bakah damdawi in hrang hrang, hmanraw neih te leh damdawi kawl mek te dinhmun sawiho a ni a, a tul anga inthuam chak dan tur te rel a ni bawk.