`ARSENE WHO?' KHA KA HRE TA!

- Tetea Hmar

September 16, 1996 khan Arsenal chuan French pa langsar lo tak, hnuhma lian tham pawh nei mang lo chu 'Japanese club' atangin manager turin an lalut. He pa hi Arsene Wenger a ni.

A lar lo a, a langsar lo a, English club lian enkawl tura rin kai a ni lo. London Evening Standard chanchinbu chuan headline-ah 'Arsene Who?' a ti kuau mai a, 'Arsene-a chu tu maw a nih a?' tihna tluk a ni.

Press lamin an ring lo a, fans lamin an ring hek lo - a laluttu Arsenal hotupa David Dein an dem a, hmelhriat loh French pa hi an lawm lo, English top flight football-ah French coach hi hriat an ni ngai lo.

Tunah erawh Arsenal fans mai ni lo, khawvelin chu Arsene chu a hre tawh. Coaching a chawlhsan hnuah pawh a thiam leh finna avangin FIFA Chief of Global Football Development-ah an ruai mêk - ka kawm ve ngat tawh!

WENGER LEH MIZORAM!

November 21 khan India ram tlawha zin mêk Arsenal manager hlui nen hian kan inhmu a, Bhubaneswar Airport-ah mi tlem tein kan lo hmuak a, pangparte kan lo hlan a, inchibai pahin tunge ka nih ka hrilh ve nghal a, Mizoram hming pawh a hre ve nghal ngei ang - a theihnghilh zui mai thei bawk a!

Wenger-a ruala lo kal FIFA team zingah hian Aizawl FC Joint CEO pawh ni tawh kan thianpa Prince Rufus pawh a rawn tel ve a, "Wenger hlir an lo hmuak a, tunah chuan hmuaktu ka nei ve ta che," tiin a rawn fiamthu hlut a - Wenger-a ka chibaina kut sil loin airport ațangin hotel ka pan a😊

HIGHBURY-A SEI LIAN

Cable TV leh internet kan ban phak hmaa BBC radio leh Bangladesh TV atanga English football ngaihven ve țhin tan chuan Arsenal kha an khelmual hmasa Highbury nen a inzawm tlat a, chu chu Wenger nen hian a inzawm tlat bawk.

Arsenal a thlak danglam dan, ni lo, English football a thlak danglam dan zawng zawng chu kan ziak seng lo ang.

Tun hnua 'modern day football coach' an tihte hman lar video leh technology hmang thiam hmasa a ni a, pa ropui a ni - Arsenal a chhuahsan dâwn khan Facebook leh IG lamah a chanchin tlem ka ziak tawh.

Emirates Stadium-a an insuan luh hnua kum 2014-a London ka zin țuma a țhutnaa ka zuk țhut ve dan, suitcase nena stadium chhunga ka kal dante pawh ka ziak tawh a, he pa naute 'The Invincibles' chanchinte kha ziah tur va tam.

Chu pa, ka ngaihsan em em, a chawlh dâwn pawha, 'He pa hi ka ngaisang a, zahna chibai bukin ka kun hniam e,' tih thu ziak hmanga ka thlah, Highbury mawitu kha ka hmu ta tlat a - ka kawm ve ta hial a!

WENGER-A KA ZAWHNA

Tichuan, a tawi zawngin Wenger nena inkawmna ni a lo her chhuak ta. November 22 a ni. Hman remchang ni ila a thlenna hotel-ah Tukțhuan va eipui theihna remchang a awm a, nimahsela keini lam meeting nen a innang ta si a, ka va phei ta lo.

Chhun lama FIFA Talent Development Scheme hnuaia din AIFF-FIFA Academy hawn hnuah tlai lamah Wenger nena inkawmna hun kan nei ta.

Zawhna ka zawt hmasa ber a, "Monaco i enkawl a, sawmna i nei nual a, Bayern Munich meuh pawhin an dawr che a, i kal lo. Engvangin nge 1994 khan Japanese club Nagoya Grampus Eight kha i zawm?" tiin ka zawt phawt.

Ka sawi zau ta a, "J League an țan dâwn khan ka theih ang angin ka lo zir ve a, tun hnua an hlawhtlinna hi a mak ta ti vak lo. Nang meuh pawh i kal duh kha a nia. Hei, tunah Indian football hi hmasawntir kan tum nasa a, ISL pawh sum tam tak sengin tun hnaiah kalpui a ni... J League bul țan laia Japan-a kal kha i ni a, ISL bul țan khan i player hluite pawh an lo kal a, tuna India leh khatihlai Japan khan inanna a nei em? J League lama i tawnhriatah khan India tana țangkai tur a awm em?" ka ti ta zel a.

A zawhna hi sei bawk mah se a chhanna phei chu sei tak a ni. Wenger hian, "Zawhna ka beisei loh tak, zawhna țha tak ni si ka chhang dâwn a..." a ti te te a, a sawi ngaihnawm ngei mai.

SENDEROS PAWH A TEL

Wenger-a naute zingah hian Arsenal defender hlui Philippe Senderos pawh a lo kal ve a, ani nen phei chuan kan inkawm rei hle.

Arsenal player hlui Freddie Ljungberg, Nicolas Anelka, Robert Pires-te ISL lamah kan hmuh thute ka hrilh a, ani pawhin a lo hria a, an pu Wenger a ngaihsan thute min hrilh bawk a.

Mizoram atanga lo kal ka nih thu ka hrilh chiah chu, a thianpa FIFA Talent Development Scheme (TDS) lama an hotupa a va bia a, "Hei kan duh tak chu kan hmu ta e," a ti a, AIFF-FIFA Academy lama trial mêk Mizo naupangten an mit a lo la chu niin, "India kan tlawh leh hunah TDS lamin Mizoram tlawh kan tum ang," tiin min thlah zui a - National Sub Junior Football Champion Team lama kan naute țhenkhat trial-a awmte hi he academy-ah hian lut thei se a duhawm ngawt mai.

"ARSENE, PLEASE JOIN US"

TDS ho nen thla kan la chu Wenger hian min lo thlir reng a, "Arsene, lo tel ve rawh," tiin ka va sawm a, lo phei pah chuan, "I thought you don't want me in the group" tiin a tel loa thlalak kan duh zawk a ni lo'm ni, tiin min rawn fiam a.

Kei lahin, "Boss ber tel loin a dik thei lo," tiin ka fiam lêt a, an zinga pakhat chuan, "This gentleman is from that northeast region," min lo ti zui a, Wenger a nui suk a - kei ka nghilh deuh dup a!

1996-a Arsenal a zawm dâwn khan media lam chuan amah an hre lo a, tunge a nih zawhna nen an tiel.

Arsenal a chhuahsan meuh chuan khawvelin a ngaisang a, kum 74 a nih hnuah pawh kan la ûm lawm lawm a, football khawvelin Arsene Wenger a hre chiang ta - a chanchin ziakna lehkhabu 'Arsene Who?' an tih ngat pawh a hralh a kal hle.

Wenger hian he thu hi a sawi, "Football-ah pawh, thil dangah pawh a pawimawh chu zirna (education) a ni a, Indian football hmasawnna tura pawimawh chu zirna bawk a ni," tih a sawi - ka pawm e, ka Pu.