Albania panin Mizo MMA fighter leh refree feh chhuak

Aizawl | November 18, 2023: November ni 20-25 chhunga Tiran, Albania-a International MMA Federation (IMMAF) huaihawt World Amateur Mixed Martial Arts championship awm turah MMA India national federation aiawhin fighter 5 leh official (Referee & Judge) 4 an kal ve dawn a, chu'ng zingah chuan Featherweight (-65.8 kgs)-a fight tur Mizoram State MMA Association (MISMA) fighter Zarmawia, Chite veng leh Referee hna thawk tur MISMA Technical Chairman Samuel Lalrozama, Dawrpui te an tel.

Fighter-te hi kumina national event hrang hrang aṭanga ṭha berte national federation chuan a thlang a, official tur erawh hi chu World body-in a thlang ve thung. Zarmawia hi weight pathumah national champion niin India rama record holder ni mek a ni a, SPES Martial Arts gym, Aizawlah training thinin world championship bik inpuahchah nan hian Bali MMA gym-ah ngawrh takin hun eng emaw chen chu training a nei a ni.

Tin, sports lama world federation tam zawkte hian international referee & judge an neih zingah ITO (International Technical Official) an tih hi thlan bik an nei theuh va, chu'ng mite chu full sponsor an pe ṭhin a ni. Tun ṭumah pawh hian mi 40 an thlang a ITO turin, chutah chuan Samuela hi a tel ve; hetianga thlan bak hi chu experience duh vangin mahni sensovin an kal ve thei thi ṭhin bawk.

MISMA President T. Lalrinpuia chuan Zara lakah beiseina sang tak an neih thu a sawi a, MISMA hian a tum ber chu professional fighter, mahni thiamna hmanga ei zawng thei tur, a tam thei ang ber chher chhuah a nih angin Zara hian medal a lak chuan nakkum lamah professional line-a a luh chhoh theihna kawng a inhawng dawn a ni, a ti. IMMAF hi BRAVE leh UFC nen inthlun zawm a nih angin chance a ṭha hle a, IMMAF international medalist 20 chuangin UFC-ah contract an sign tawh thu a sawi bawk. Tin, MISMA hian theih chin chinah ram pawna zin turte chu sum leh paiin a tanpui ṭhin a, a changin national kal tur phei chu full sponsor te a pe thin bawk. Tun tumah pawh hian MMA Senior Vice President Jeremy L. Pautu chuan MISMA aiawhin pocket money tur Zara hnenah cheng singkhat leh Samuela hnenah cheng sangnga a pai a, Mizo hming a ṭha zawnga khawvel hriata kan pho chhuah theihna kawng a ni tih a sawi bawk.

Zara hi LPS leh MISMA ṭangkawpin an huaihawt Mizoram Fight League champion lai a ni a, MISMA chuan kumin December leh nakkum lamah lian deuha MFL an huaihawt leh tur thu an puang bawk.