Zotrek-in khawvela sandstone cave thui ber lut dawn

Aizawl | October 23, 2023: Zotrek Adventure Club chuan vawiin aṭang hian khawvel a Sandstone Cave thui ber Krem Puri, Laitsohum, Meghalaya a awm chu an lut dawn.

Zotrek Caving Expedition team-te hi October 21, inrinni tlai khan Aizawl Municipal Corporation (AMC) Deputy Mayor R Thanglura'n Vanapa Hall kawt atangin a vailiam a ni.

 Zotrek Adventure Club-te hi aizawl atangin ni 21st October ah Laitsohum, Mawsynram district, Meghalaya an pan.

Ruahman dan chuan, Vawiin October 23 leh naktuk 24 October-ah puk hi an lut in, ni 24 tlaiah Aizawl panin anlo haw leh ang. 

Zotrek hi Mizoram Adventure Club lian ber niin club member 120 chuang an awm mek a. He caving expedition-ah hian club member Mipa 20 leh Hmeichhia 10 an vaiin mi 30 an kal a ni.

Flagoff programme tawi neih ah AMC Dy Mayor R Thanglura chuan thusawiin Zotrek Adventure Club-in khawvel sandstone cave thuk ber lut tura an inbuatsaih leh chona an nei chu fakawm a tih thu a sawi a, mi nazawng tana tih ve theih loh thil ani a ti. Caving a kal te pawh hlawhtling tak a puk lut chhuak turin duhsakna a hlan a. Pu Thanglura chuan Zotrek Adventure club in kum 10 chuang Adventure activities hrang hrang tana proggramme an lo buatsaih thin leh Adventure sport lama tui mi thalai leh kum lam a upa zawk thlenga club tha tak ani chu a hlut thu sawiin, Zotrek kal zelna turah duhsakna a hlan ani.

He caving expedition a, expedition leader F Vanlalhriata’n puk luh tur chanchin sawiin, Krem Puri hi khawvel a sandstone cave thui ber niin 24.5 kms lai a thui a ni a. He puk hi Liatsohum, Mawsynram dist, Meghalaya a awm niin, Shillong atangin 56 kms vela hla a awm ani. Krem Puri hi kum 2016 khan hmuhchhuah a ni a. International expert team, scientist leh experience cave explorers rual, ram hrang hrang atanga kal khawm ten ni 25 chhung (5thfeb atang 1st march, 2018) survey neiin a puk hi an zir chiangin an teh chhuak a ni. Survey an neih lai hian puk chhung atang hian kum makdatuai 66 kalta vela dinosaur ruhro ni a hriatte pawh an hmu chhuak ani. International team hian puk kawkel/passage survey hman loh tlem an neia, Zotrek team hian a theih chin chinah luh chhuak an tum dawn bawk ani. 

Expedition Leader F Vanlalhriata chuan hetiang puk ropui leh khawvel a puk ber kai, Zotrek Adventure team in an lut thei tur chu thil chhinchhiah thlak leh thalai te chona thar anih thu a sawi a. Caving hi recreation activity tha tak a nih mai bakah kawng hrang hrang scientific study neihna atan thil tangkai tak a nih thu a sawi.

Zotrek Adventure Club hian kum 2014 khan Krem Mawmluh cave, Meghalaya an lo lutchuak tawh a, Krem Mawmluh hi leilung chanchin zirna a puk pawimawh tak a ni a, International Union of Gealogical Sciences, first 100 Cave zing a mi a ni. Zotrek hian Mizoram chhungah puk hrang hrang an lut in anlo teh chhuak tawh thin a, Mizoram chhunga cave exploration nasa zawk a la kal pui zel pawh an tum a ni. Caving bakah hian adventure activities hrang hrang programme an buatsaih thin a, khamkara mi chhan chhuah ngai leh accident thleng ah pawh nasa takin tha anlo thawh tawh thin ani, ramngaw leh nungcha humhalh kawngah leh environment dimdawi taka enkawl member te zingah an inzirtir reng thin a ni.

Zotrek Adventure club hruaitute chuan he caving expedition an neih theih nana sum leh pai, bungruate a tanpuitu leh tha thawhtu zawng zawngte chungah thinlung takin lawmthu an sawi.

.

.