Kum 2018 kan election Manifesto bawhzui kawngah kan thawk tha hle - MNF adviser Lalruatkima

Aizawl | October 21, 2023: MNF Adviser leg Publicity Board chairman Lalruatkima chuan vawiin dar 1 khan Aizawl Press Club-ah chanchinbumite kawmin, "Kum 2018 kan election Manifesto bawhzui kawngah kan thawk tha hle," a ti.

"Kan manifesto-ah hian hmalak miah lohna kan nei lo hialin kan hria a, chuti chung chuan han tihhlawhtlin nghal rum rum theih loh chi a awm a, chu’ngte chu kumin 2023 Election Manifesto-ah hian an telh zui leh a ni." a ti bawk.

MNF adviser hian, Aizawl khawpui aṭanga Assam rifles sawn chhuah nan MNF sawrkarin theihtawp a chhuah thu leh, hemi hlawhtlunna atan MNF a sawrkar leh ngei a ṭul thu a sawi tel bawk.

Press statement kimchang:

MNF hian kan manifesto kan siam hian kan ti mai mai lo a, ram leh hnam tana tha tur uluk taka zirchiang chungin kan duang a. Kan sorkar hnu pawhin Party leh Minister-te hian kan Manifesto bu keu chung hian ram hruai hna kan thawk. Pathian zarah kan tihlawhtling tam reng a, dan pawh kan siam tha tam a, dan thar pawh kan siam tam a ni. Min beitute hian hrechiang lo leh zirchiang lovin min bei thin a, tawngkam an thiam si a, an sawi tam bawk si a, tak tak emaw lo ti tawk tam tak an awm a ni.

Kan manifesto-ah hian hmalak miah lohna kan nei lo hialin kan hria a, chuti chung chuan han tihhlawhtlin nghal rum rum theih loh chi a awm a, chu’ngte chu kumin 2023 Election Manifesto-ah hian an telh zui leh a ni. 

Kan Manifesto hi za-a 80% vel hi chu kan tihlawhtlingin kan hria a, kan tihlawhtlin rih lohte pawh nasa taka hma kan lak mekna te a ni hlawm a. Kan ti tha thawkhat hle a ni.

Kan manifesto-a tel lo, kan Chief Minister zahawm tak, vision nei ram siam kawnga ngaihtuahna nasa tak sengin a vei em em thil dang a sawi a awm nual a. Chu’ngte chu - kawngchhawng siam te, leiverh te leh a dangte an ni. Hengah te pawh hian hmalakna kalpui mek zel a ni a. Leiverh lian tham tak siam turin DPR peih fel a ni tawh a tender tihchhuah tawh a ni. Kawngchhawng pawh Aizawl hmun hnih Vaivakawn leh Bawngkawnah siam tumin niin mithiamte pawhin an rawn en fo tawh a, hri leng avang bakah thil lian tham tak a nih avangin tum angin thil a kal rih mai lo a ni.

Pathian leh mipui khawngaihna changa MNF kan sorkar leh a nih chuan he ram leh hnam tan hian hnathawh zawh loh tam tak kan la nei a. Hengte hi thatho tak leh taima takin kan thawk zui dawn a ni.

Kum 2018 MNF Election Manifesto kan tihlawhlin dan leh hmalakna te han thlir thuak thuak ila, a sei tham deuh avangin a tawi thei angin kan rawn la tawi a ni.      

Mizo National Front Election Manifesto 2018

 Kan hma lawka MLA inthlanpui lo awm turah Pathian leh Mipuite zara MNF-in sawrkar-na kan chan chuan, heng a hnuaia mite hi kan ngaihpawimawh leh hmalakna tur te an ni.  

POLITICAL :

1. UN Declaration on the Rights of  Indigenous  People Ni 13.9.2007-behchhanin, Zofa/Zo hnahthlak ram hrang hranga thendarh a awmte thuneihna sang zawk neia, rorelna pakhat hnuaia awmkhawm turin hmalak a ni ang.

Hmalakna: Zampui tlangdungah Inpumkhatna Bus tlan tir a ni a, Manipur leh Tahan lamah pawh tlan tir tura thui tak hmalak a nih tawh hnuah ram a buai tak avangin chhunzawm theih a ni ta lo a ni. Hei bakah hian inpumkhat nan Shillong-ah leh Zampui tlangah te Zokutpui buatsaih a ni bawk. Myanmar, Bangladesh leh Manipur-a Zofate’n buaina an tawh chungchangah pawh India duhdan hnawlin heng hmun atanga rawn raltlante hi buaipui a tuamhlawm a ni a, zirna thlengin pek an ni. 

2. Mizote Sakhua leh Hnam Dan, tawng leh Nunphung vawnghima, chawisang zel turin hmalak a ni ang.

Hmalakna: Mizo Language Board din a ni a, chak takin hma an la a, pipu nun chawisang a, Mizo nunmawi vawnhim a nih theih nan ‘Zonun’ tih chu zirlaibuah telh thar a ni a. Mizo hnam hla Pu Rokunga phuah ‘Ro min rel sak ang che’ tih chu sikul zawng zawngah sak thin tura tih a ni.

3. Kum 1986-a MNF leh India sawrkar Inremna avang a Mizorama tun thlenga muanna awm zui ta hi vawn nun zel a; Accord-a thu thenkhat la tih puitlin loh awm apiang bawhzui leh tipuitling tura hmalak a ni ang.

Hmalakna: Bawhzui mek zel a ni.

4. Hnam Pasaltha leh Martar chhungte tan Special Scheme siam tum a ni ang.

Hmalakna: In hmun leh lo ram e’ngemaw zat pek an ni a, Housing Complex siam turin hmalak a ni a, e’ngemaw chen  kalpui a ni tawh a. Intodelhna kawng an zawh theih nan Ex MNA Multipurpose Society hnenah Hmunpui ramah mau chin tir an ni a, nuai tam tak sen a ni tawh. Journalist thenkhat chuan kan tlawh tawh nghe nghe kha. Ex MNA-te hi MNF sorkar hian a ngai hlu a, phatsan a tum lo.

 

5. Mizoram veng him turin hmalak a ni ang a, ramri chhehvel a chengte tan hmasawnna chak zawka kalpui a nih theih nan hmalak a ni ang.

Hmalakna: Ramri-ah hmasawnna hna nasa takin kalpui a ni a, sawi mai sen loh khawpin MNF sorkar hian ramriah development a kalpui a ni. Ramri min chhuhsak tumtute lakah silai hial hmeh puah a nih zia pawh kan hriat vek kha. MNF sorkar hian ramri-a kan hmalakna te hi kan chhuang khawp mai.

6. Mizoram Village Level Citizen Registration kalpui a ni ang.

Hmalakna: Assembly-ah pass a ni tawh a, Governor-in accent a la pe lo a, a la inchiah rih a ni.

7. Inremna Thuthlung angin Minority-te dikna leh chanvo humhalh a ni ang.

Hmalakna: Mizoram Gurkha Census MNF sorkar hmasa siam ennawn a ni. An chanvo an chang lo em, tihte uluk taka thlithlai a ni. 

8. Inremna Thuthlung angin Border Trade tipuitling tura hma lak a ni ang.

Hmalakna: Zochachhuah, Kawngpuichhuah leh Zokhawthar lamah te chak taka hmalak mek zel a ni.

ADMINISTRATION :

 Sawrkar hmalak mek chhunzawm tlakte bawhzui a ni ang a, rin ngam, langtlang, mawhphurhna hmachhawn ngam, rorelna fel leh thianghlim, thuneihna semzai phal sawrkar tha,  mitin huapzo tur, Mipui Sawrkar din a ni ang a, chumi tihlawhtling tur a hmalakna tur tlangpui chu hetiang hi a ni ang:

1. Hlemhletna (Corruption) hmachhawn tur Vigilance Commission / Lok Ayukta din a ni ang. 

Hmalakna: Kan intiam angin Lok Ayukta din a ni a, chak takin eirukna doin hma an la mek zel a ni. Sorkar tharah tihchak lehzual zel kan tum bawk a ni.

2. Langtlang Sawrkar ni turin, MNF sawrkar laia din Mizoram State Information Commission leh RTI Act, 2005 hi mipuite tana \angkai lehzuala hman a ni ang.

Hmalakna: RTI zawhna te online hmanga zawh theih turin siam a ni a, mipui tan RTI zawhna zawh a awlsam ta hle.

3. Aizawl Municipal Corporation hi tihchangtlun a, thuneihna leh sum pek belh te, Local Council-te thuneihna leh member-te hlawh tihpun tum a ni ang a. District khawpui dangah a remchan dan angin  Municipal Council/Board din a ni ang.

Hmalakna: AMC tichangtlung turin hmalak a ni a, hei bakah hian Lungleiah Municipal Council din a ni a, inthlante neih niin tha takin a function mek zel a ni.

4. Decentralization tihlawhtlin nan India Danpui Act. 243 tlawhchhanin,  Autonomous District Council nei velo te enkawl nan Mizoram mil turin District Development  Council leh Village Council Dan siamthar a ni ang a, an thuneihna India danpui in a tarlansa te hi pek an ni ang.

Hmalakna: Sialkal Range Development Council din a ni a, an area mite tan theih tawpin hma an la mek a, Sinlung Hills Development Council inthlan buatsaih theih ni lo thin chu inthlan buatsaih a ni a, Lunglei Municipal Council din a ni bawk.

5. Sawrkar hnathawk lak chungchangah a thiam, tling leh phu-te ngei lak an nih theih nan Employment Exchange leh MPSC te hnathawh tur ennawnin tha zawka hna an thawh theih nan thuam an ni ang a, sawrkar hnathawk awm lohna chhungkua tan chanvo (reservation) siamsak tum a ni ang. 

Hmalakna: Hnalak awlsam leh dik zawk neih a nih theih nan Mizoram Subordinate Services Selection Board (MSSSB) din a ni a, theih tawpin hmalak a ni a. Hripui avanga sum harsatna avangin hna thar lak erawh duh angin kalpui theih a ni lo.  

6. Tunlai thiamna hmang tangkaiin, e-governance lamah uar takin hmalak a ni ang.

Hmalakna: Tui leh electrict bill te pawh online hmangin pek theih a lo ni ta zel a, Gas-te pawh online booking a tih theih ta.

 

7. The Mizoram Land Revenue Act, 2013 a tul lai ennawn a ni ang a; Land Reform lamah hmathar lak a ni ang a; The Mizoram Urban Areas Rent Control Act hi awmze nei zawka hman theih tura siam a ni ang.

Hmalakna: The Mizoram Land Revenue Act, 2013 hi siam that a, ennawn a ni tawh a ni.

8. Contract leh Supply hna pekah ram leilung fate a theih chin chinah duhsak an ni ang.  

Hmalakna: A theih chinah hei hi kalpui a ni.

9. Lirthei chhiah lak dan-te, STA hnuaia Vehicle Replacement chungchang leh chhiah chi hrang hrang lak dan ennawn a ni ang.

Hmalakna: Hei hi ennawn nghal a ni a, lirthei neitute tan kum 5, kum 10 leh kum 15 atan te chhiah pekna dan siam rem a ni a. Vehicle replacement dan pawh siam rem a ni a, vawi khat chauh phal sak ni thin kha vawi 2 replaced phal sak an ni ta a ni.

10. Sawrkar hnathawk chi hrang hrang harsatna neite, Sipai bangte, Muster roll-te, Contract Employee-te hamthatna turin hma lak a ni ang.

Hmalakna: Muster roll-te Provisional Employee-a hlankai an ni a, an hlawh leh hamthatna hrang hrang tihpun sak an ni. 

11. Aizawl atangin Assam Rifle sawn chhuah a ni ang.

Hmalakna: Assam Rifle an chhuah theih nan hian nasa taka hmalak a ni a, Union Home Minister Amit Shah ngei Aizawl-ah rawn kalin April ni 1 khan Zokhawsanga AR insawnna tur hmun a rawng hawng a. AR lam hi an chhuak hreh em em a, chhuak tura an hotute’n an ti tawh chhungin chhuanlam chhete te siamin an la chhuahsan lo a, e’gemaw zat chu an insuan tawh niin kan hria a ni. Term tharah nasa taka nawr a ni ang.  

 

12. Aizawl khawpui chhunga harsatna tam tak awm thin te hi Civic Law siamin chinfel tum a ni ang. 

Hmalakna: Hmalak mek a ni.

13. Mizoram sawrkar PWD hnuaia Contractor  Registration Rules ennawn a ni ang.

Hmalakna: Tihhlawhtlin tawh a ni.

EI LEH BAR ZAWNNA (ECONOMIC DEVELOPMENT):

1. Socio Economic Development Policy (SEDP) hnuaia hmalakna tur hrang hrang ruahmante bultan thei turin hma lak a ni ang.

Hmalakna: Nasa takin hmalak a ni a, SEDP hmangin infrastructure thahnem tak siam a ni a. Family Oriented SEDP hnuaiah pawh 1st Phase-ah chhungkaw 60000 hnenah Rs. 50000/- theuhin pek an ni tawh a, 2nd phase-ah chhungkaw 60000 hnenah vek Rs. 25000/- theuh pek leh niin 3rd phase-ah chhungkaw 60000 tho target-in selection neih chhoh mek a ni a, inthlan puanin a nang ta rih a ni.

2. Buh leh bala kan intodelh theih nan, Kuthnathawktute tanpuina leh khaichhuah nan SEDP kaihhruaina anga pek an ni ang.

Hmalakna: Nasa taka hmalak a ni a, sawi mai sen a ni lo hial zawk a ni. 

3. Ranvulh, Lo, huan leh thlai hmanga eizawng ten puihna an dawn mai bakah, awlsam leh man man zawka an Thlai tharte an hralh theih nan sawrkar-in a lei leh hralhna (Market) chungchang a buaipui (facilitate) ang a, Minimum Support  Price leh Market Intervention Scheme-te hman \angkai a ni bawk ang. 

Hmalakna: Sawhthing, tomato, laikhuihthei, dragon fruit etc.-te hralhna tur sorkar-in ruahmanna a siam a, hemi kawngah hian nasa taka hmalak a ni. 

4. Thlaithar Sawngbawlna (Food Processing) leh vawnthatna changtlung zawk buatsaih a ni anga, Sawhthing leh Thlai dangte awlsam leh man man zawka hralh thei turin sawrkarin hma a la ang. Hei hi chipchiar zawkin a Bu-a buatsaih a ni.

Hmalakna: Nasa taka hmalak a ni.

5. Khawpui leh Thingtlang lama mahni kutkawih leh thiamthil hmanga eizawng ten eizawnna ngelnghet an neih theihna atan - Dinchhuah pui tham Dawmkanna (Special Development Scheme)  ruahman a ni ang.

Hmalakna: SEDP hmangin trade hrang hrang thlan tirin hmalak a ni. 

6. Industry hrang hrang-ah SEDP-a ruahman sa angin hmalakna lian zawka kalpui tum a ni a, Thilsiam chhuah leh laih chhuah lam mai bakah, Khualzin hipna (Adventure/eco Tourism)-ah te, Damdawi lam (Pharmaceutical and Herbal Industry) ah te, Thing leh Mau leh Ramhmul hausakna (Agro and Forest based Industries)–ah te nasa takin hma lak a ni ang.

Hmalakna: Nasa taka hmalak a ni.

7. Kuthnathawktu leh nitina inhlawhfa-te tan Zakhamna (Insurance Scheme) huapzo leh changtlung tak siam a ni ang a, Hnathawhna, Hriselna leh kawng hrang hranga chhiat an lo tawk palh a nih pawhin, a phu tawk sum fai an dawn theih nan hmalak a ni ang.

Hmalakna: LESDE kaltlangin hmalak a ni a, Covid hripui len lai khan free ration, covid vei enkawlna leh thi te ralna Covid avanga tanpuina atan cheng vaibelchhe 30 dawn hman a ni.  

8. Mizoram Building and Other Construction Workers Welfare Board kalhmang ennawnin, kuthnathawktu ten hamthatna tam zawk leh an chanvo dik tak an hmuh theih nan hma lak a ni ang.

Hmalakna: Nasa taka thuam that leh hmalak a ni a. A chungchiah kan tarlan ang khian Covid lai pawhin hma an la nasa hle a ni.

9. Remchan zawkna atan leh hriselna leh thianghlim zawkna atan Thlai thar, Sa, Sangha etc zawrhna changtlung zawk siam a ni ang.

Hmalakna: Thahnem tak siam a ni.

HMASAWNNA RUHREL DIN (INFRASTRUCTURE):

1. Kan kawngpui neih sate hi tha taka enkawlin tih changtlun an ni ang a. Kawngpui \ha leh zau zawk (East-West Corridor, North-South Highway) a tul anga siam belh a ni anga. A theihna apiangah lawng kawng (waterway) siam tum a ni ang.

Hmalakna: Khawpui kawng leh khaw kar kawngpuite nasa takin siam that a tihchangtlun a ni a. Lawng kawng pui tham tak Khawthlang tuipuia siam a nih theihna tur Project pawh Transport Minister TJ Lalnuntluanga chuan September ni 15, 2023 khan a hawng tawh nghe nghe a ni.

 

2. Kuthnathawktu-te huan leh lo ram awlsam taka kal pawh zung zung theihna tur (Economic/Agricultural link road) siam belh bakah a awmsa te tih changtlun tum a ni ang.

Hmalakna: Link road thahnem tak cheibawl that a ni a, thahnem tak laih belh a ni bawk.  

3. Thlawhna tum hmun (Airport) kan neih mek ti changtlungin, Chhim lam leh hmundang remchang ah Airport kan neih theihna turin hma lak a ni ang.

Hmalakna: Kan thlawhna tumhmun tichangtlung turin nasa takin sum tam tak senga hmalak a ni a, chhim lamin Airport an neih theih dan tur pawh kawng zawn mek zel a ni.

4. Lunglei hi tun aia khawpui pawimawh zawk ni turin hma lak a ni ang a, HPC chak zawk leh awmze nei zawk te, Police Southern Range te, University Campus te, Sawrkar Office hrang hrang leh Commissioner dah belh tura hmalak a ni ang.

Hmalakna: Lunglei Municipal din a ni a, Lunglei hmasawnna turin hmalak mek zel a ni bawk.  

5. Kawlphetha (Hydro/Solar/Renewable Energy) siamchhuah lamah \an lak a ni ang a, District Headquarters  zawng zawng hi Solar City/Town ah siam tum a hma lak a ni ang.

Hmalakna: Hmalak mek zel a ni a, tunah Mega-watt 20 pechhuak thei Vankal Solar Park pawh hawn a ni tawh bak a ni. 

6. MNF Sawrkar laia bul lo tan tawh, khualzin hipna tur Tourist Resort chi hrang hrangte leh State Institute of Hotel Management tihpuitlin tum a ni ang.

Hmalakna: State Institute of Hotel Management chuangchang hi Cabinet hnuhnung berah pawh rel a ni a, hmalak mek zel a ni a. Tourist Resort hrang hrangte cheibawl that a ni nasa hle bawk a ni. 

7. Mizoram chawm zo ngei tur FCI Kudam, eirawngbawlna Gas thunna lian leh Oil dahkhawlna lian (Rail-fed  LPG  Bottling  Plant and  Oil Depot) siam tum a ni ang.

Hmalakna: Hei pawh hi chak taka hmalak a ni a, Mualkhangah Gas Bottling plant tihzauhna tur ram bigha 60 lei fel a ni tawh a, Sihhmuiah oil depot ram lei tum mek a ni a, FCI Kudam ram lei fel a ni tawh a, sak tuma hmalak mek a ni.  

8. Mizorama lei hnuai hausakna (Oil leh Gas) hai chhuah tumin hmalak a ni ang.

Hmalakna: Hmalak mek zel a ni.

MIPUI  VANTLANG  HAM|HATNA (SOCIAL SECURITY):

1. MLPC Act, 2014 hmanga Zu zawrh tih tawp a ni anga, Zu leh Ruihhlo bawiha tangte chhanchhuah a enkawlna mumal tak siam turin, Kohhran, NGO leh mitha hnemngaite hmalakna thawhpuia, a tul dan ang zelin Rehabilitation Centre thar pawh din belh a ni ang.

Hmalakna: MLPC Act, 2014 hmanga Zu zawrh tih tawp nghal a ni a, ruihhlo ngai enkawlna tur Jordan Centre changtlung taka siam a ni.

2. Damdawi In leh Health Centre neihsa te tih phuisui a ni ang a, Doctor leh Nurse indaihlohna sutkian tum a ni ang.

Hmalakna: Damdawi In sak thar thahnem tak a awm a, Health Centre-te pawh nasa taka tihchangtlun a ni a. Hriselna lam hawia MNF sorkar hmalakna hi chhuanawm tham a tling a ni.

3. MNF sawrkar laia bul lo tan tawh, Mizoram State Health Care Scheme hi ennawn-in chhunzawm tum a ni ang.  

Hmalakna: Changtlung taka kalpui zui a ni a, sum harsatna avangin duhthusam erawh chuan kan kalpui thei lo.  

4. Tar pension hi a dawng tur dik tak ten an dawn kim vek theih nan hma lak a ni ang.

Hmalakna: Hmalak a ni a, Mizoram sorkar-in sum a tum ve tur pawh a leta tihpun a ni.

 

5. Pianphunga harsatna neiten an dikna chanvo an chan theih nan PWD Act a nihna ang taka hman a ni ang.  

Hmalakna: Hmalak mek a ni.

6. Hmeichhia leh Naupang-te dikna chanvo humhalhin an hmasawn-na ngaih pawimawh a ni ang.

Hmalakna: Women Commission nasa taka tihchangtlun a ni a, Child Rights Commission pawh nasa taka tihchak niin Secretary puitling, Superintendent puitling leh legal officer te lak belh a ni bawk. 

7. Chhiatrupna leh Vanduaina tuartute tana chhawmdawlna (Relief and Rehabilitation) mumal tak siamin, tanpui vat theihna tur dan siam a ni ang a, Chhungkua a eizawngtu ber a boral a nih phei chuan chawmdawlna mumal tak pek tum an ni ang.

Hmalakna: DM&R leh LESDE atangin hmalak a ni.

8. Mipui vantlang nitin mamawh, Tui, Electric, Gas, Buhfai-te awlsam zawka kan lei theihna turin hmalak a ni ang a; tunhma a Ration a kan lak tel thin Chini sem leh a ni ang.

Hmalakna: Hemi kawnga hmalakna hi a tha thawkhat hle tih kan hre tlang vek awm e. AAY hnenah Chini thla tin kg 1 sem thin a ni bawk.

9. Khawpuia cheng, in hmun neilo ten In hmun an neih theih nan hmalak a ni ang.

Hmalakna: Mualpui leh Chekbawk House site plan-ah ram nei lote hnenah ram mi 464 hnenah pek an ni.

10. Zonunmawi (Tlawmngaihna) tlahniam zel hi chawinun leh tumin hmalak a ni ang.

Hmalakna: Zonunmawi tlawmngaihna chawi nun leh a nih theih nan Zirlai naupangte zirlaibu atan “Zonun” telh a ni a, hmalakna hrang hrang kalpui a ni bawk.

ZIRNA LAM LEH THALAITE HMAKHUA:

1. Kan Khawtlangnun milin Sikul kai hun leh Sikul Calendar ennawn a ni ang. 

Hmalakna: Mizo nunphung milin sikul kai hun hi sorkar tirhin thlak danglam nghal a ni. 

2. Zirlaite Scholarship, a nihdan tur taka pein, Zirna sang zawk, Mizoram mamawh zir duh tan Student Loan awlsam zawka siam a ni ang.

Hmalakna: Zirlaite Scholarship a nih dan tur angin tha taka pek a ni a, Student loan pawh hmalak a ni. an lo haw khan bul tan duh tan hmalak 

3. Zirna (Education) kalphung siamthat ngaite siamthat a ni ang a, Mizoram chhung ngeiah khawvel ram dang el phak Zirna kawng hrang hrang din turin tan lak a ni ang.

Hmalakna: Kawng hrang hrangin hmalak a ni.

4. Zirna In neihsa te ti changtlungin, Zirlaite leh Zirtirtute hamthatna hrang hrang siam belh a ni ang a, Zirtirtu indaihlohna pawh siamrem a ni ang.

Hmalakna: Sikul building thahnem tak sak niin thawmthat ngaite thahnem tak thawm that hna thawh a ni a, Sikul thanhnem tak dinhmun chawisan a ni. SEDP teacher sang chuang lak an ni bawk a ni.   

5. Central Sponsored Scheme-a thawkte leh Sawrkar enkawl Society hrang hrang (Eg. ICPS, NHM, MSACS adt.) a thawkte, Kohhran, Private leh Aided  Sikul-a Zirtirtute tana hamthatna chi hrang hrang: Provident Fund, Pension scheme, Health Insurance etc. a tul angin ngaihtuah sak an ni ang..

Hmalakna: Hamthatna thahnem tak siam a ni.

6. Medical, Paramedical, Engineering, Technology leh Management zirna changtlung zawk kan neih theih nan hma lak a ni ang. 

Hmalakna: Engineering College Lunglei Pukpuiah sak zawh tawh a ni a, Champhai, Kolasib leh Mamit-ah Politechnic Building sak zawh tawh a ni a, District dangah pawh sak mek zel a ni. Nasa takin theih tawkin hmalakna kawng hrang hrangin kalpui a ni.

7. Thalaite kawng hrang hranga an thiamna leh theihna peipung a, Mizoram leh khawvel zau zawkah hlawk zawka pen chhuak thei tura pui turin hma lak a ni ang a; ‘Man Power Development’ lamah hmalak a ni ang.

Hmalakna: MYC kaltlangin nasa taka hmalak a ni a. Sap ramah nurse turin e’ngemzaw zat thawn an ni a, All India Service-a Mizo kan luh theih nan nasa taka hmalak a ni a, coaching tha an kal theih nan Delhi-ah full sponsor pe-in tum thum zirlai thiam thei bikte thawn an ni tawh a, zirlai thawnte hi an vaiin mi 65 an ni.  

8. Infiamna (Sports) kawng hrang hrangah tun aia hma kan sawn theihna atan Olympic  Charter zulzuiin Sport Policy thar siam a ni ang. Infiamna hmanrua leh hmunhma bakah Infiammite hamthatna atan Sum tam zawk ruahman sak tum a ni ang.

Hmalakna: Sport policy siam a ni a, thalaite tan hmalakna hrang hrang a tam hle. Sawi mai sen loh khawpin a tam a ni.  

9. Zirlai thiamthei leh tithate tan lawmman (Incentive Award) siamin, All India leh Central Service a Mizo thalai tam zawk an luh theihna turin hma lak a ni ang.

Hmalakna: MYC kaltlangin nasa taka hmalak a ni a. Super IAS hnuaiah zirlai thiam thei falte sponsor an ni a, hei bakah pawh hian hmalakna nasa takin kalpui a ni.  

10. Zirlai, a mamawhtu-te tan District Headquarters leh hmun remchang dangah Hostel siam a ni ang.

Hmalakna: Lawngtlai, Serchhip, Aizawl leh Khawzawlah te Girls Hostel siam a ni a, hmun dangah pawh hmalak mek a ni.

11.Thalai mahni kut ke ngeia eizawn tum leh ruahmanna nei tha-te (Entrepreneurs) chu sawrkar-in kawng hrang hrangin a tanpui thin ang.

Hmalakna: Hmalak a ni a, term tharah SEDP hnuaiah nasa lehzual zawka hmalak tumin inbuatsaih mek a ni a, Youth oriented SEDP siam a ni dawn a ni.

TLIPNA:

Heng kan hmalakna tlangpui zawr zawr han en pawh hian kan thawk tha thawkkhat hle tih a lang thei a, MNF sorkar hi ngawi renga hnathawk mawp mawp mai thin, inpuangzar ve vak vak lo kan nih avangin, kan hmalakna tam tak hi mipuite hian an hre tawk lo fo a. Hetiang a nih avang hian hnathawk mang loa min puhtute min puhna pawh hi thutaka lo ngai tawk an awm thin.

Pathian leh mipui zarah MNF hian sorkarna kan chang leh ngeiin kan ring a, hrilengte a ziaawm chho zel ang a, boruak zalen leh pangai hnuaiah nasa lehzualin mipuite rawng kan bawl thei ngei ang tih kan beisei a ni.