Zirtirtu sawn vanga lawngawi lo Govt Saiha College zirlaiten kawngzawh

Siaha | October 23, 2023: Vawiin 23-10-2023 khan Government Saiha College, Siaha student chuan kawngzawhna neiin Pi Lalrinpuii Rokhum, Associate Professor, English department a an regular Teacher chu J. Thankima College lama sorkar in a sawn tak avangin an lungawilo hle, he transfer order hi sut leh nghal vat tura Sorkar thuneitute an phut thu an tlangau pui a ni.

SU, Government Saiha College, Siaha chuan 22-9-2023 khan Dr. R. Lalthangliana, Minister, H&TE chu Office ah lengin kan College in harsatna kan tawh mek chu thlenin kan va hmu a, heta kan thu thlen ber chu Teachers indaihlohna leh kan College a Geography department din tura hma min lakpui turin kan ngen a; chumai bakah kum 2008 a Science leh Commerce din tura thuchhuah awm sa min bawhzui sak turin kan ngen nghal bawk.

Chutiang anih laia hmalakna hmuh tur pawh a awm hma hauhin kan regular Teacher Pi Lalrinpuii Rokhum, Associate Professor, English department chu Government J. Thankima College, AizawlaAizawl lama min attached sak ta mai hi keini Students' Union, Government Saiha College, Siaha chuan hriatthiam harsa kan tiin kan duh lo hle a. Tun, chu bakah tunhnaia English department atanga mi 3 an lakchhuahna a ni ta a. Tunah hian regular Teacher pakhatmah kan nei ta lo va, Siaha zirlaite chuan a lungchhiatthlak kan ti tak zet a ni tiin thuchhuah an siam a ni.

Government Saiha College, Siaha zirlaite chuan Pi Lalrinpuii Rokhum, Associate Professor, English department transfer order hi sut nghal tura Mizoram sorkar an phut nawn leh a, a hlawhtlinna an hmu lo a ni chuan atul anga hma an lak chhunzawm zel tur thu an sawi bawk.

Vawiina Government Saiha College, Siaha zirlai kawngzawhna hi College atangin Bazaar Traffic Point - New Siaha Vety Kawn thleng a ni a. Bazar Traffic point leh Vety kawn, New Siaha ah hian Government Saiha College, Siaha hruaituten thusawina an nei a ni.

- Moonlight