MZP Lunglei-in hnamdang pasal nei ram rorelna chelhtu an nih loh nan theihtawpa hma lak tum

Aizawl | October 23, 2023: Vawiin Dt.23.10.2023 (Thawhtanni) Dar 11:30Am khan MZP Headquarters: Lunglei Office Bearers Meeting neih a ni a. Meeting hi Lalpeksanga Chenkual, President in a kaihruai. Meeting chuan kan hma lawk-a MLA General Election lo awm tura Lunglei South Constituency-a INC Official Candidate Pi Meriam L Hrangchal hnamdang pasal nei chungchang chu ngun takin a ngaihtuah.

MZP Meeting chuan MZP-in Party tinte MLA Election lo awm tura hnamdang pasal neite Candidate a dah lo tura a ngenna Congress Party-in zah lova, hnamdang pasal nei candidate-a dah luih a ni chu MZP chuan pawi a ti takzet a. Tun hnuah hetiang hi thleng nawn tawh lo se a duh tak zet a ni.

Hnamdang pasal nei candidate-a dah luih a nih chungchangah MZP Headquarters: Lunglei chuan MZP General Headquarters: Aizawl hmalakna hi a thlawp tlat a, an hmalak leh zelna turah theihtawp a chhuahpui zel dawn a ni.

MZP Headquarters: Lunglei huamchhung, Lunglei South Constituency a MZP Sub-Headquarters leh Branch-te pawh MZP hmalakna hi lo tawiawm a, hnamdang pasal nei kan ram rorelna chelhtu an nih loh nan theihtawpa hma lo la turin MZP Headquarters: Lunglei chuan a ngen nghal bawk a ni.

MZP chuan Ram leh Hnam himna tur a ngaihtuah thin a. Kan ram leh hnam a him loh chuan tumah kan him bik dawn loh avangin, MZP hmalakna hi Mizo Mipuite tawiawmna leh thlawpna MZP chuan a ngen tak meuh meuh a ni.

.