Aizawl | October 16, 2023: Vawiin ni 16.10.2023(Thawhtanni) khan Central YMA hruaitute leh Madhup Vyas, Chief Electoral Officer ( CEO) te chu CEO Office ah an inkawm a, Mizoram Assembly Inthlan result puan hun chungchang leh Tripura- a pem thla Tuikuk Vote chungchang an sawiho.
Central YMA hruaitute hian Mizoram Assembly inthlan result puan ni atana ruat December 3,2023 chu Pathianni a nih avanga Election Commision of India (ECI) hnena sawn tura Tlawmngai pawl hrang hrang, MKHC, MPF leh Political Party ten an ngen chungchang an sawi pui a. CEO hian Mizorama atanga dilna lut zawng zawng an dawn khawm chu hlawm khatin ECI ah karhmasa Zirtawpni khan an thawn thu a sawi a, a hun sawn tur pawhin beiseina an nei sang hle tih a sawi. Chutihrualin ECI atangin thu thar an la dawng lo tih a sawi bawk. Hetihlai hian Pawl hrang hrang ten inthlan vote chhiar hun sawn tura ngenna hi ECI ah Email hmangin an thawn hlawm bawk a ni.
Tripura a mahni duhthu a pem thla Tuikuk te chungchangah Mizoram Electoral Roll atanga paih vek an nih tawh avangin anni tan inthlan chungchangah engmah ruahmanna siam a ngaih loh thu a sawi bawk.
.
Post a Comment
He post chungchanga i ngaihdan lo sawi ve rawh: