MLA bial 40-ah mi 170 chuangin chuh tum!

Aizawl | October 20, 2023: Mizoram Legislative Assembly inthlanpui 2023 lo awm tura MLA candidate turte tana vawiin kha nomination thehluh hun tawp a ni a, he thu buatsaih lai thleng hian mi 174 in nomination an thehlut tawh.

Candidate te hi INC, MNF leh ZPM te'n 40 theuh an nei a, BJP in 23 neiin, AAP in 4 an nei leh a, independence a ding hi 27 an ni thung. Heng zing aṭang hian bial 18 ah hmeichhe candidate an awm dawn a ni.

Thu dawnnain a tarlan danin, Aizawl dist. chhunga bial hrang hranga ding turin mi 55 in Returining Officer-te hnenah nomination an thehlut a, Lunglei dist chhunga bial hrang hranga ding turin mi 27-in nomination an thehlut bawk.

Siaha Dist-ah mi 9-in nomination an thehlut a, Champhai dist chhunga Assembly Constituency hrang hranga ding turin mi 10-in nomination an thehlut a, Kolasib dist-a bial pathum- Kolasib, Serlui leh Tuirial-a ding turin mi 13-in nomination an thehlut thung a ni.

Serchhip District chhung Assembly Cosntituency pathuma MLA Inthlan chuh turin mi 15-in Nomination an thehlut a, Lawngtlai District-a bial pathum, Tuichawng, Lawngtlai West leh Lawngtlai East-ah MLA Inthlan chuh tuma hming thehlut 13 an awm bawk. Mamit dist. chhunga MLA bial 3 chuh turin mi 14 in hming an pe lut thung.

Khawzawl dist-ah chuan mi 4-in nomination an file a, Saitual-ah mi 11-in file bawkin Hnahthial Dist-ah nomination file pathum an awm bawk a ni.

Vawiin khan mi 56 in inthlana chuh tumin hming an pe lut a, Aizawl district ah tam berin 13 an ni a, Lungleiin dawtin 9 an ni a, Siaha hi 8 an ni thung.

Naktuk Oct 21 hian hming thehlutte hi an endik dawn a, inhnukdawk duh tan October 23, thawhṭanni thleng a inhnudawh theih dawn a ni.

November 7, ah vote thlak a ni ang a, December 3 ah vote chhiar a ni thung dawn a ni.

December 5 ah chuan inthlanna leh a behbawmte zawhfek vek tura ruahman ni bawk.

• Noti tichhuah hun- Oct 13, Zirtawpni

• Nomination tih hun tawp - Oct 20, Zirtawpni

• Scrutiny - Oct 21 Inrinni

• Inhnuhdawh theih hun tawp - Oct 23, Thawhṭanni

• Inthlan ni - Nov 7, Thawhlehni

• Vote chhiar - Dec 3, Pathianni

• Election leh a behbawm zawh hun tur - Dec 5.