Lirtheia eizawng ten Lirthei tlan loh titawp rih

Aizawl | October 10, 2023 (Tuesday): Vairengte leh Sairang inkarah bungraw phur lirthei tlan tawh hrih loh an rel chu vawiin tlai an an titawp rih.

Pawl hrang hrang MTOA, MTDA, MTA, MOTDA leh KDDWJAC ten Vairengte leh Sairang inkarah bungraw phur lirthei tlan tawh hrih loh an rel chu MLA inthlanpui neih tur puan a nih tak avangin vawiin tlai atang hian an call-off.

Mahse, kawng hi siam chhunzawm a nih loh chuan inthlan zawh veleh kalpui chhunzawm lehnghal an tum tiin Kolasib Aw chuan a tarlang.

Lirthei neitu leh driver pawl pangnga — Mizoram Truck Owner Association (MTOA), Mizoram Truck Drivers Association (MTDA), Mizoram Tipper Owner & Driver Association (MTA), Mizoram Oil Tanker Driver Association (MOTDA) leh Kolasib District Driver Welfare Joint Action Committee (KDDWJAC) te intelkhawmna Joint Action Committee chuan October 5 khan Aizawl Press Club-ah chanchinbu mite an kawm a, Vairengte leh Sairang inkar bakah Kawlkulh leh Hliappui inkar kawng chhe lutuk chu zawh tlakah an ngai tawh lo a, chief minister hnena an thu thlenin awmzia a neih loh avangin October 9, 2023 zing dar 7:00 aṭangin heng kawngpui te hi siamṭhat a nih hma chuan zawh tawh loh an tum thu tih an lo sawi tawh a ni.

Pawl 5 inzawmkhawm te chuan Mizoram ei leh bar lakluhna hnukpui ber Vairengte leh Sairang inkar kawng chu motor lian rit phur tan zawh a hreawm hle niin an sawi a, sorkarin a siamṭhat mai an beisei avangin an zawh hram hram tih an sawi. Kawng hi a chhiat em avangin motor tlu pawh a tam tawh hle a, driver ṭhenkhat phei chu an tlan ngam tawh lo niin an sawi bawk.

Chief Minister pawh hemi sawipui tur hian hma an la a, appointment te pawh dil ṭhin mahse an hlawhtlin theih loh thu leh hun tiam siamin ziakin hma laksak rang tur leh hmalakna a awm loh chuan din mai an tum thu te an thlen niin an sawi. Heti chung pawh hian an ngenna chuan awmzia a nei thei lova, October 2, 2023 khan pawl hruaitute chuan a hmunah kawng hi enfiah lehin hmalakna awm ve bawk mah se mamawh phuru khawp an hmuh loh avangin October 4, 2023-a Joint Committee chuan sorkarin chak zawka a siam theih nan October 9, 2023 aṭangin heng kawngte hi zawh rih loh an titlu ta niin an sawi.