Dam lo kanna sum a chheprelh hi Pu Lalduhoma hian pe thuai rawh se - MNF

Aizawl | October 25, 2023: MNF General Secretary (Media & Publicity) VL Krosshnehzova chuan vawiin khan Aizawl Press Club-ah thuthar thehdarhtute kawmin, "Dam lo kanna sum a chheprelh hi Pu Lalduhoma hian pe thuai rawh se," a ti.

"ZPM Chief Ministerial Candidate Pu Lalduhoma’n a biala dam lo a kanna tur Rs 2,49,000/- a tham then sak duh mai hi mak kan ti hle a. MLA zin loh bill a lak, mipuiin a eiruk kan hriatchhuah tak avanga a kir leh ang khan, he dam lo kanna sum a lo chheprelh hi a dam lo kan tur Pi Zoremsangi hi pe vat turin kan ngen a ni." a ti bawk.

VL Krosshnehzova chuan,  "Dt. 7.9.2023 Aizawl Press Club-ah hian thuthar lakhawmtu zahawm takte kawmin, ZPM Chief Ministerial candidate leh Serchhip MLA ni bawk Pu Lalduhoma’n MLA fund a hman dan chungchang kan lo sawi tawh a. Kha mi tum khan Pu Lalduhoma hian a MLA fund atang hian 2021 - 2022 (kum 2) chhung lek hian dam lo kan nan cheng 16,42,000/- (nuai sawm paruk chuang) a hmang tih kan sawi a. Mak kan tih thu kan sawi a nih kha. Pu Lalduhoma’n dam lo kanna atana a sum hman hi a dik ngei em tih kan chhui zui a, thil dik lo inphum a lo awm ngei tih kan hrechhuak ta a ni." a ti a.

"Pu Lalduhoma fund hmanna Pu Lalthanmawia Hauzel, New Serchhip-in RTI hmanga a dilna chhanna December ni 22, 2022-a a lan danah chuan, Pu Lalduhoma hian Pi Zoremsangi, Serchhip Dinthar W/O H Zoramsiama chu ‘Grant in aid for Health Purpose’ atan Rs 2,50,000/- (nuai hnih singnga) a pe angin a inziak a ni."

"Pu Lalduhoma’n cheng nuai hnih singnga (2,50,000/-) pe anga ziah, Pi Zoremsangi hnenah hian Pu Lalduhoma hian Rs 1000/- dam lo kanna chiah a pe a. Pawisa emaw a hriselna enkawlna tur engmah dang pek a nei lo. He thu hi Pi Zoremsangi pasal Pu H Zoramsiama pawhin nemnghetin Pu Lalduhoma hian Pi Zoremsangi hi Rs 1000 bak a pek loh thu a sawi a. Pi Zoremsangi pawhin Serchhip MNF hruaitute hnenah Pu Duhoma hian Rs. 2,50,000/- a pek loh thu hi a sawi bawk a ni."

"Pi Zoremsangi pasal Pu H. Zoramsiama hi Serchhip Dinthar, ZPM Village Council President ni lai a ni nghe nghe a. Pi Zoremsangi hi tunah chuan a hriselna te pawh a lo tha ta a, kan lawmpui hle a ni."

Hengte avang leh a bial mipuite dawt a hrilh tam em avangin Pu Lalduhoma hi a bialah a awm ngam tawh mang lo a. Tun inthlan hnai tawh takah pawh hian a bial a thutchilh ngam lo a, a tlawh zeuh zeuh chauh a. Serchhip bial ZPM hote chu arpui no hruai, a pui muin a laksak ang maiin an chavai hle a. MNF Candidate Pu J Malsawmzuala Vanchhawng hian Pu Lalduhoma a lehthal dawnin kan hria a, kan lawm hle a ni, a ti bawk.

.