Sawrkar hian jail leh jail tangte hi a ngaihsak lo hle

Aizawl | September 1, 2023: AAP Mizoram President Andrew Lalremkima chuan vawiin chhun dar 12 khan Aizawl Press Club-ah thuthar thehdarhtute kawmin, "AAP Mizoram chuan tunhnai hian Mizoram jail dinhmun zirchianna kan nei a, chuta tanga kan hmuh chu sawrkar hian jail leh jail tangte hi a ngaihsak lo hle a ni." a ti.

AAP Mizoram President chuan, "Mizoram Jail a hmun (Cell) neih leh tang kan neih te hi a inmil lo em em a, vawi tam tak sawiselna lut tawh CJ(A)-ah pawh Prison Department Office in an website a MIZORAM PRISONERS DAILY POPULATION REPORT, Ni 30th August 2023 an tarlanah chuan mi 438 awmna tura ruahmanah mi 939 lai hnawh khawm an ni a. Hei hian tun thlenga ngaihsak a hlawh thei lo hi a mak kan ti em em a ni." a ti.

" CWJ ah pawh hian mi 96 awm theih naah ah mi 301 lai dah mek an ni a. Mizoram puma Jail hrang hrang dinhmun lakkhawmah pawh mi 1386 awm theihna turah mi 2125 dah mek an ni a. Hetiang a nih chuan mihring 10 awmna turah mi 18 vel bawr zel dah luih ang an ni a, vawi tam tak hriattir an nih tawh hnu pawha thuneitute’n an beng an chhu ngawng lui tlata hmalakna tha zawk engmah a la awm lo hi hriatthiam a har kan ti takzet a ni." a ti a. "Thuneitute hian an bengkhawna an ngaihsak a tul kan ti tak zet a ni." a ti bawk.

APP chuan, jail a thawktu lak theih zat hi 429 a nih laiin mi 280 chiah chhawr mek an ni a, post 149 hi hnawhkhah lohin a awm mek a ni. Mi pakhat in tang 300 vel zel enkawl ang reng tihna a ni, tiin a tarlang a.

AAP President Andrew Lalremkima chuan, Mizoram AAP kan dinchhan ber chu chanhai zawkte leh aw chhuah ve theilote tan a aw chhuah tur kan nih angin vawiin ni hian Jail a hrehawm tak a tang mekte hi Kristian kan nih ang leh Mihring mihrinna atang pawhin tun aia nasa zawk a ngaihsak leh enkawl hi an chanvo a ni tih kan au auchhuah pui a ni," a ti bawk.