RINNA KAWNGA RAHBI DAWT CHIAH CHU RAP RAWH

  _Ni 50 Chhung Rinna_

By Rick Warren 

— Sept 13, 2023

“Isuan a hnenah, "Kal tawh rawh, i rinna hi i dampui a ni e," a ti a. Tichuan a hmu thei ta nghal a, kalkawngah chuan Isua a zui ta a..” Marka 10:5

Rinna kawnga i rahbi hmabak chu eng nge ka hre lo va, i mamawh erawh chu ka hria a ni.

I hmabak chu i nuna Isua Krista pawm emaw baptisma chan emaw a ni maithei. Kohhrana tel emaw, lawmna lantir zual, mission trip-a kal, mamawhtu te tana inphal, hahchawlh, mahni ai chuan Pathiana a rinna nghah emaw a ni thei.

I hmabak chu eng nge ka hre lo, mahse he thil pakhat hi ka hria. Rinna kawngah thuk zawka i kal theih nan ṭan a la zel ang. Hmabak a siamsak zel ang che. 

I rahbi hmabak i rah zel loh chuan, khuarah i tang zel ang. Khuar leh thlanmual inanlohna chu a seizawng chiah hi a ni. Hmalam pana i pen loh chuan, i lo chau ang a, Pathian i hlat tial tial ang. Rahbi pakhatna i rah hma chuan, rahbi pahnihna, pathumna leh panganaah te pawh a pui lo vang che.

Engemaw ti tura Pathian ṭanpuina i dil chuan, heti hian a zawt ang che, “Ti tura ka hrilh che kha eng vangin nge i tih loh?” Thil ruahman i nei maithei e. Ruahman chu tawpsan la, ti nghal mai rawh.

Mitdel Bartimaia chuan rinnain Isua a ko va, Isuan a tihdam a ring a ni. Bartimaian Isua a hmuh hma khan kawng sirah a ṭhu ṭhin a. Lalpan a mit a tihvar hnu chuan, “kalkawngah chuan a zui ta a.” (Marka 10:52)

Eng ṭawngkam zawk hian nge i nihna a sawi fiah: Kawng sira ṭhut nge kalkawnga Isua zui? Eng zawk khian nge i nun tihlim zawka i rin? Eng zawkin nge hlimna, lungawina leh awmzia neia i hriat? Eng zawk khian nge i nun aiawh se i tih?

Kalkawnga Isua zui dan kawng khat chiah a awm: Rahbi dawt chiah rap rawh.

Rinna hi chu awih tih aia nasa zawk a ni. Rinna chu ngaihtuahna, ṭawngkam, Isua duhzawng ngaihtuah aiin a nasa zawk. Rinna chu thiltih a ni. Chetvelna a ni a; thiltih a ni. Rinna chu engemaw tih hi a ni. Bible chuan Jakoba 2:14, “Ka unau te u, miin, “Rinna ka nei,” ti mah sela, thiltih a neih si loh chuan eng nge sawt ang? Chutiang rinna chuan amah a chhandam thei ang em ni?"

Bulṭan thar turin khawi aṭangin nge rinna i lak ang? Thil pakhat chiah a awm: Isua Krista.

“Nangni erawh chu ama zarah Krista Isuaah chuan in awm a ni; ani chu Pathian hnen ata kan tan finnaah siam a ni, felnaah te, thianghlimnaah te, tlannaah te nen” (1 Korinth 1:30).

Bartimaian khami ni khan Isuan a rawn paltlang ang tih ngaihna reng a hre lo. A tan chuan, ni dang ang tho a ni. Mahse Pathian chuan bulṭan tharna hun a pe tlat a ni.

Pathianin hun remchang thuhmun chiah a pe che a. Ti khawtlai suh. Hun remchang chu a liam hmain i rinna rahbi dawt chiah chu rap rawh.

Ngaihtuah zui atan

* Vawiin hian kawng sirah i ṭhu nge kalkawng aṭangin Isua i zui zawk?

* I nunah rinna rahbi thar rap turin eng nge i nghah le? Ti khawtlai turin eng chhuanlam nge i neih le?

* Rinnaa ke pen tur leh Isua zui turin vawiinah eng rahbi thar nge i rah dawn le?

*Chhandamna atana Rahbi hmabak chu rap rawh*

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he email Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.

*[Lettu: Sangpuia]*