Loretta Khawlhring lehkhabu pahnihna 'Mala Malna' tlangzarh a ni ta!

Aizawl | September 1, 2023: Instagram leh Flyer-a thu ngaihnawm leh hlimawm, lung kuai tak tak 'Chicks Magnet' tih hminga a chhuah thin vang leh lehkhabu 'Chicks Magnet' a tihchhuah vanga thalaite duh leh ngainat hlawh em em Loretta Khawlhring chuan a lehkhabu pahnihna 'Mala Malna' chu August 26, 2023 khan a tichhuak leh ta.

Explore Mizoram leh Lorettaa Khawlhring inkawmna:

https://www.exploremizoram.com/2020/08/loretta-khawlhring.html

Thu leh hla a thiam vanga mi tam tak ngainat Loretta Khawlhring hian Chicks magnet lehkhabu a lo sual chhuak tawh a, ngainat a hlawh em em a, tuna a lehkhabu pawh hian ngaihven a hlawh hle a ni.

He lehkhabu 'Mala Malna' hi Lehkhabu dawr hrang hrangah cheng 250 in lei theihin a awm mek a, thian mai bakah kan ngainat zawngte thilpek atana tha leh thlan tlak a ni.

'Mala Malna' lehkhabu hi phek 185 chuanga chhah niin, thu leh hla 55 lai dahkhawmna a ni. Hemi chhungah hian 37 hi chu thuziak, thu ngaihnawm leh ngaihtuah tithui thei tak tak an ni a, a tawp lam 18 erawh hla huang niin, ngaihnawm a nih mai bakah chhiar a nuam.

He lehkhabu chungchangah hian a ziaktu Loretta Khawlhring hian, "'Mala Malna' tih bu hian vawi tam pindan thimah min tawmtir a. Rei lote zalenna min pek pawh chèn hleithei lovin min kuangkuah leh ṭhin. Chung nun bumboh leh mittui hringnun, thuruk thuhruk ṭhenkhat chu he 'Mala Malna' bu-ah hian chhiar tur a awm dawn." tiin tlangzarh hmain a lo post tawh a, heng atang ringawt pawh hian he lehkhabu hi thuruk thuhruk inphum thin hailanna a ni tih a lang chiang mai awm e.

'Mala Malna' lehkhabu-ah hian fuihna kan hmu a, natna hmuh theihin a awm a, Pathian thu lam a awm a, hmangaihna thai lan a ni bawk, ni e, chu chang a la ni lo, hringnun zinkawng hlutzia tarlanna a ni a, mi pakhatin mi dang hriat ngai loh tura a lo dawn khawl tam tak phochhhuahna a ni bawk.