FEATURING: Thu ril leh ngaihnawm ziak ṭhin Chicks Magnet, oh! Loretta Khawlhring

Mizo Quotes an sawi a, rilru-a lo lang tel thin 'Loretta Khawlhring' hian Thu ril leh ngaihnawm tak tak a ziak a, thu tawi ril leh chhiar nuam nen. Chung a thu phuah leh ziahte chu Instagram lamah a dah a, mi ngainat leh ngaihhlut a hlawh a, duhtu an tam a, amah ngainatu pawh an tam. Thu leh hlaa a tui vang ni maw, Nikkum khan lekhabu a lo tichhuak  hial tawh a ni.
 

WhatsApp status leh IG story thlenga i hmuh thin 'Chicks Magnet' buatsaihtu ngei kha lo hmelhriat ve rawh.

(EXPLOREMIZORAM.COM website a thu awmte hi  tlawmngaih chhuahin hmun dangah  copy/paste in lo suan kher duh suh, ṭul kan ti lo. I duh chuan link i share zawk mai dawn nia.)

He hmeichhia hian ngainat le ngaihven a hlawh a ni chek ang chu, Mizo quote ziak/siam thin feature tur kan ngaihven zingah hming lang zing ber a ni.

 

Loretta Khawlhring  tia hriat thin, Loretta Zoremsiampuii hi a pa chu Samuel Lalbiaksanga niin, a nu chu Mercy Lalremkimi a ni. July 13, 1994 khan lo piangin, unau pali niin, a naupang ber dawttu a ni.  Roman Catholic Kohhran ah an lawi a, Thakthing, Aizawl-ah chengin an khawsa.

Loretta Khawlhring  hian zirna lamah 2011 khan Home Mission School atangin pawl 10 a pass a, 2013 khan LR Higher Secondary School atangin pawl 12 a pass leh a, 2016 khan Pachhunga University college atangin B.A (Mizo) a zo. 



*Quotes ziah bul i ṭan dan?
- 2013 kum khan Facebook-ah thuziak tawi te te ka hmu thin a. Ka share ve nasa thin. 2016 kuma page ka siam hma lawk atang khan, thu tawi ziah ka ching. 12th April, 2016 atang khan tun hi ka thleng ta a ni.

*Sum i hailut em? i hailuh dan -  a rem chuan?
- Hna pangngai tak la nei lo mah ila, ka lehkhabu atang hian engemaw zat chu ka la lut ve.


 

*I tawrhna leh lo beih tawh dan:
- Library-ah te kalin lehkhabu ka chhiar a. A chang leh ka en kual a, ka duh ang chu chhinchhiahin lehkhabu zawrhna dawrah ka va lei ṭhin. Ka ni hi lehkhabu chhiar nasa a nia, a lehkhabu bawma mi te ka hawh a, ka chhiar zawh velah dah let a ngai ṭhin si a, lehkhabu dawrah ka ta tur ka va lei leh ṭhin. Chuan, Synod bookroom-ah hian ka lut tawp a, ka duhzawng ka va lei tawp.



*Harsatna i tawh changa i hmachhawn dan:
- Kha harsatna kha rei vak lo ka inthunun tir a. (Thu ka ziah duh châng chuan, kha harsatna kha ka chenpui tawp ṭhin) Ngaihtuahna fim tak ka hmang thei ta tihah, ka rilru ka thunun a, a êng lam leh a kila malsawmna ka hmu lui tawh mai thin.



*Engtik kum aṭangin nge thu tawi phuah ang chi hi i tui/tih ṭan?
-  2016 kum chawhma lam aṭangin. Thu ziah ka chin phat atangin Poetry ka tuichilh nghal.

*I tuina hi Mizo ṭhalai tam zawkte tan tui ve chi niin i hria em?
- Tehreng mai. Literature ngaina tawh chuan hringnun hman dan kan thiam bik tlangpui. A ziah lam ti mi lo tan pawh, a chhiar lam tal taima se.

*Miin hah tak leh hun leh tha senga thuphuah, awlsam taka lo lachhawng a, mahni kutchhuak anga lo dah thin leh a ziaktu hming thaibo thin ho hi??
- A pawi ka ti. Ka tawng tawh, a thanatthlak. I ching lo vang u, a rah thei lo. Talent leh skills tel lo chuan thui tak a thlen theih loh.

Thu leh hla lam hi i tui ve reng reng em?
- Thu leh hla hi tunah hian ka chawm bawka ka hawp bawk. A bikin poetry hi ka tana chawlh hahdamna hmun, ka muanna leh inhnemna a ni.

Engtik kum atangin nge thu leh hla lam i tui?
2013 khan thu leh hla khawvel ka rap ve ṭan. Ka ziah ṭan kum 2016 aṭang khan ka tui chho viau mai.

Lehkhabu i ziah/tichhuak tawh em? Engnge a hming leh i chhuah kum?
- 8th June, 2019 khan lehkhabu pakhat ka tihchhuak ve a. A bu hming chu Chicks Magnet (Thu tawi leh ril) tih a ni.


 

I tuina lamah engnge sawi duh leh vei i neih?
Thu leh hla ka ngainat chin aṭang hian ka thil thlir leh dawnsawn dang a danglam. Vei chu ka ngah a mahse hei chauh hi ka sawi ang. Social media-ah thu ziak kan tam a bikin a tawi chi kan tih mai Quotes ang hi. Chung ang ziaktute chuan, thu ho leh mizo ṭawng dik lo hi tarlang fo lo se la ka duh. Poetry hi thu tawi tak, nuih tiza thei thu tawi emaw ti an awm ka hlau. A ziaktu chu inchhiar peih se la, inzir peih se la ka duh a ni.


 

A duhzawng leh ngainat zawngte:-
Sportsperson- Joakim Noah
Apps - Instagram, Whatsapp leh Facebook
Rawng - Blue
Chawhmeh  - Artui leh tomato kan 🤭
Incheina - Smart & Simple
Rimawi - Blues/Country/
Mizo Ziaktu zingah -JF.Laldailova, Mafaa Hauhnar, C.Ṭhuamluaia leh Zikpuii Pa
Hla- Lalnunsanga hla sak 'Di Hlui'
Hla phuahtu - Vankhama, Lallianmawia Pachuau leh Zirsangzela Hnamte

 

Mize ngainat zawng - Awmkhawmna hmuna ngawi renga lo ṭhu ve ang hi 😂 Ṭawngtam lo, mi ngaihsak mi leh rilru zau tak pua mi kawm thin mi.

#Mize ngai nat loh zawng - Phi cheng leh kan that tawk lohna hmu liana mi kher peih te.

Hobby- Reading, Writing & Photography

Relationship status - Unmarried

Kawppui atan duhzawng - Ngaihsaka duata min dah pawimawh mi. Mi rilru tha nen. Chuti ang mi chuan Pathian a dah pawimawh dawn si a.






Zawhna dang:
1. A tel lova i awm theih loh: Pathian

2. I nun kaihruaitu: Literature

3. Hringnuna i hlauh ber: Beidawn

4. I tih ngai miah loh tur: Ruihtheih thil

5. Mizo Tualzal nuna ṭha i tih: Tlawmngaihna

6.  Quote i duh ber: Bul ṭan nan mi ropui nih a ngai lo.

7. Mizoram leh Mizo tualzal nuna Mizo hmeichhiate dinhmun: 
- Mipa rorelna hmun mah ni se, hmeichhia te hian chem fawng kan vuan tawh zawk. Hmeichhe rorelna hmun a tam tawh a; hmeichhe rorel lem lohna hmunah pawh, rawn kâi ber kan ni tawh.







A post shared by Chicks Magnet | Mizo Poetry | (@chicks_magnet_) on

8. Mizote tan 'Fa neih tlem' inzirtir hi a ṭulin i hria em? 
- A ṭul hran dawn em ni? Pathian thu thu ni zawk rawh se.

9. Social Media leh Nangmah: Ka platform neih ṭhat ber a ni rih. Ka thuziak ka pholan theihna hmun.

10. Mizo ṭhalaite hian ngaihsan tur dik an ngaisangin i hria em?- Aw

11. Ngaihsan tur dik nia i hriat: Harsa taka hlawhtlinna neitute.

12. Hlawhtlinna tura pawimawh: Teirei peih leh taimak

13. I nuna hloh i hlauh ber: Min hmangaihtute

Thalaipuite hnena chah duh:
Zirtawpni awm si zir tawp theih si loh hringnun hian a ṭah tir ang che a, a hliam hrep ang che. Beidawng mah la beidawng hlen suh. Tho leh rawh. Thim kiangah êng a awm reng tih hria la, i tum i hlen theih nan duhsakna ka hlan a che.


 

EXPLOREMIZORAM.COM hmuh dan:
- Mi hlawhtlinna, mi thil ṭha tih tarlanna hmun, bengtivara mit titlaitute in ni hi a lawmawm. Tu emaw deuna hmun, hmuh hrehawm khawp thil tarlanna a nih loh vang hian ka fak che u. In kal lehzelna turah duhsakna ka hlan a che u.




H Zate
Founder/Editor
Explore Mizoram






(A hnuaia fakna hi lo hmet ve rawh.)

Post a Comment

0 Comments