Indian Pool National Championship 2023 khelh mekah Lalrina Renthlei in Semi Final lut

Aizawl | September 8, 2023: Indian National 9 Ball Pool Championship 2023, Indore, Madhya Pradesh a khelh mek-ah Mizoram aiawha kal Mizoram Snooker & Billiards Association (MSBA) player pawimawh tak Lalrina Renthlei chuan Quarterfinal match-ah Shahbas Adil Khan, Petroleum Player chu 9 - 5 frames a hneh in Semi Final a lut.

Indian National 9 Ball Pool Championship 2023 semi final match hi naktuk dar 11 hian khelh a ni ang. Lalrina kan chhuang hle mai.

September 1, 2023 aṭanga neih mek Indian Pool National Championship (9 & 10 Ball)-ah hian Mizoram state aiawhin Mizoram Snooker & Billiards Association (MSBA) Player pathum; PB Liansangzuala, Dawrpui, Aizawl, Lalrina Renthlei, Tuikhuahtlang, Aizawl leh Laltlansanga, Lunglei te an kal a ni.

Indian Pool National Championship (9 & 10 Ball) hi Daly College, Indore, Madhya Pradesh-ah nghah a ni a. September 15 hian a hmawr bawk tura ruahman a ni.

Lalrina Renthlei hi Snooker-ah 2010 - 11 khan National Junior Champion a lo ni tawh a, Snooker-ah India aiawhin Senior-ah vawi 2 leh Under 21-ah vawi 2 a lo khel tawh a. Pool-ah hian tum hnih senior-ah bronze a lo la tawh a, India aiawhin vawi hnih a khel tawh bawk.

Basketball lamah pawh player pawimawh tak a ni a. Basketbal-ah hian India Senior tean-ah player pawimawh tak niin a lo tel tawh a, South Asia Basketball Championphip (Sr) ah Champion 2021 an lo ni tawh a ni. Hemi bakah hian FIBA 3x3 world tour tum hnih a lo khel tawh a, FIBA 3X3 No 1 a lo ni tawh bawk a. Mizoram Basketball Association (MBBA) buatsaih Mizoram Super League-ah vawi 5 a zawna champion niin, Vikings ah MSL 1-3 a khel a, MSL 4 atangin tun thlengin Zarkawt BCA -ah a khel a ni.

Hawla Indoor Stadium, Republic Vengthlang-ah hian Mizoram Snooker & Billiards Association (MSBA) leh Mizoram Basketball Association (MBBA) in hall an neih ve ve avangin, Hawla Indoor Stadium-ah hian Lalrina tana zoram denchhuahna tham game a kim, an ti fiam thin.