HMANRAW HRANG HRANG HMANGIN PATHIANIN A PE THEI CHE

 _Ni 50 chhung Rinna_

*HMANRAW HRANG HRANG HMANGIN PATHIANIN A PE THEI CHE*

By Rick Warren 

— Sep 5, 2023

“Tuna a ngheh anga in pi leh pute hnena chhechhama thu thlun chu a tihnghehna turin Lalpa in Pathian chu hre reng rawh u, sum leh pai deh chhuah theihna petu che u chu amah chu a ni zawk a sin.” Deuteronomy 8:18

Bible chuan kan sum hnar chu Pathian a ni a ti a. Kan mamawh apiang min petu a ni. 

Deuteronomy 8:18  chuan, “Tuna a ngheh anga in pi leh pute hnena chhechhama thu thlun chu a tihnghehna turin Lalpa in Pathian chu hre reng rawh u, sum leh pai deh chhuah theihna petu che u chu amah chu a ni zawk a sin.” 

Chu chu i nitin nunah awmzia a nei em le? Chumi awmzia chu i hlawh hmuhna ai chuan Pathian en zawk thin rawh tihna a ni a. I saving bank account ai chuan Pathian en zawk thin rawh tihna a ni. I mamawh pe tur chein mi dang ni lo vin Pathian thlir zawk thin ang che tihna a ni bawk. 

Tehkhin thu lo sawi ila: Tui i herh haw hian, tui chu a dawt atanga lo kal a ni lo tih i hria a. Tui chu a dawtah chuan a kaltlang a ni zawk. A nihna takah chuan tui chu tuizem emaw tui chhunchhuah atang emawin a lo kal a ni. Amaherawhchu tui i hmuhna chu a dawt kaltlangin a ni thung.

Chutiang chiah chuan Pathianin sum leh pai a pek duh che chu i hna emaw mi dang emaw thil dang kaltlangin emaw a pe che a ni. 

Nimahsela a lo kalna chu Pathian atang zel a ni.

Pathianin i mamawh a pekna tur cheah eng tui dawt nge a hman dawn tihah buai lo la. Hetiang hian a sawi angah ngai la, “Tui dawt pakhat ka khar chuan, tui dawt dang awlsam takin ka hawng leh thei a. I hna i chan chuan hna dang ka pe leh thei che a. I hna chu i sum hnar a ni lo va. I bank account chu i sum hnar a ni lo va. Kei hi i sum hnar chu ka ni,” tiin.  

Pathian kan rin loh chuan kan lungngai thin a. Pathian i rin theih lohna chhan chu eng nge tih zawt la, amah i rin theih nan dil rawh. Eng nge a tih theih chu en ang che.

I lungngai a nih chuan, i buaina chu Pathian hnenah thlen rawh.

Ngaihtuah zui atan

* I hun liam tawhah Pathianin i mamawh a pek dan che engtin nge i hmuh? Eng tui dawt nge Pathianin a hman?

* Pathian rin tlakchhamna chuan engtin nge lungngaihna a lanchhuahtir?

* Eng zawnah nge Pathianin i lungngaihna chu ti tawp se i duh a, eng zawnah nge amah chu thuk zawk rin i duh le? 

*[Lettu: Sangpuia]*