GreeenRocketTV film siam 'Rawng Chawhpawlh' tlangzarh hnai

Aizawl | September 8, 2023: GreeenRocketTV film siam 'Rawng Chawhpawlh' chu an tlangzarh hnai a, nizan khan Screening neih a ni a, a hmuna entute'n hmuhnawm an ti hlawm hle.

'Rawng Chawhpawlh' hi September 19 hian tlangzarh an tum a, Lersia Play -ah an dah dawn a ni.

GreeenRocketTV in video an lo siam tawh, 'Chhungkaw Chhehchhawl' behchhana siam 'Rawng Chawhpawlh' film hi director-ah GreenRocketTV ami Abarima Lalrammawia a awm a, Screenwriter hi Mizo Series hriat hlawh 0389 director lo ni tawh Raymond Colney a ni.

A changtute hi GreenRocketTV chhungkua atangin Tommy Rosangliana, Zoparmawii, Lalchhandami, Lalduhawmi, Thangbiakzuala te an inlan a, Tommy leh Zopari hi a changtunu leh changupa ber anga chang an ni.

Annni baklah hian, Zalenna, 0389 ah te Bahhnukte ah te lo chang tawh Maruata Hnamte, Call 112 leh tlangzarh mai hmabak Ambush leh a dang danga inlan tawh Eddie Tochhawng, The lottery, 0389, Eleison, Keimahni leh a dang dangah te lo chang tawh bawk Maruata Rawite, Nukawki Pasal, Thingtlang Tlangval, Luaithli, Grace ah te leh dangah lo chang tawh Rosangpuii Ralte, Nukawki Pasal, Dengi I Love You leh Mo Kawr-ah te lo inlan tawh K Vanlalawmpuia te bakah Zomuansangi te an inlan a ni.

Kristian theuh si rinna hran vanga khawtlanga inmil lohna leh inthen hranna awm thin pholanna niin, kohhran rinna hran vanga inen hranna kara Nula tlangval hmangaihna hmuh tur a awm a, Kum upa lamin la fekfawn mahse, rinna hi thalai lam chuan inenhran phah nan hmang lova an inkawm theih dan te, thian inkarah kohhran emaw rinna hrang a len ve loh dan te tarlan a ni a. Thian inhmangaihna thuk tak tarlan a nih rualin nula tlangval hmangaihna pholan a ni bawk.

Chhungkaw chhehchhawl nun pholan a ni a, chhungkaw chhehchhawl kara hmangaihna piang chhuak tana an inhmuh theih ve chhun Gas lak ni leh tuikang nghah hun hlut zia a lang bawk.

He film hian Mobile phone hman theih tan tirh velah min hruai let a, nu leh pa hriat hlau tak chunga phone hman ruk bakah mi phone kaltlanga inbiak pawhna a lang a, lehkha inthawn hunlai-ah min hruai let tel bawk a ni.

He film hi a hmuhnawm a, a lawmawm a, nuihna tur hmuh tur a awm bawk. An tawngkam hman hrang hrangah ngaihtuah veng veng awl khawpa mawi thu a awm nual a, a changtupa leh changtunuin, an nun kalphungah hriatthiam loh an ngah a, zawhna an ngah em em lai a, "kan hriatthiam phak bak a ni, hriat tam loh hi a hahdamthlak zawk," tih lo awmte, leh an nun dan hrang lutuk leh rinna hrang bawk, inenhranna kara, "van pakhat kan intawm hi nuam ka ti!" tih tawngkam an hman te hian a ruka lo kiai suk a awl!

He film hian Tleirawl atanga kum 40 bawr velte hmuhnawm tih a hlawh zual hmel a, kum upa lam pawhin an hlimpui ngei ang.